ايتۆ جۇقپاسىنان ساقتانۋعا بايلانىستى شارالاردىڭ جان-جاقتى جۇرگىزىلگەنىنە قاراماستان بۇل دەرت كۇننەن كۇنگە بەلەڭ الىپ بارادى. وتكەن ون ەكى ايدىڭ ىشىندە استانا قالاسىندا ينفەكتسيانىڭ ەپيدەميولوگيالىق جاعدايى 129 ادامعا ءوستى. بۇل – الدىڭعى جىلدارمەن سالىستىرعاندا 30 پايىزعا ارتىق.
بيىل العاشقى ايدىڭ وزىندە ەلوردادا ۆيچ جۇقتىرعان 710 جاعداي تىركەلدى. ولاردىڭ باسىم كوپشىلىگى, ياعني 53,5 پايىزى – ورىنسىز جىنىستىق قاتىناسقا تۇسەتىندەر بولسا, 38,4 پايىزى – ينەكتسيالىق ەسىرتكى قولدانعاندار. 7,8 پايىزى – باسقا جۇعۋ جولدارىنىڭ ۇلەسىندە. ال, جاس شاماسىنا كەلەر بولساق, كەيىنگى جىلدارى ايتۆ جۇقتىرعانداردىڭ 77 پايىزى ەڭبەك جاسىنداعى, ياعني, 20-39 جاس ارالىعىنداعى جاستار بولىپ وتىر. بۇل كورسەتكىشتەر ەشكىمدى بەي-جاي قالدىرماسى انىق. سالا ماماندارى قاتەرلى دەرتتىڭ الدىن الۋ ماقساتىندا كوپتەگەن جۇمىستار جۇرگىزۋدە. بىراق, ناقتى ناتيجەگە قول جەتكىزۋ ءۇشىن ءار ادام ءوزىن, جاقىندارىن وسىناۋ عاسىر دەرتىنەن ساقتاۋ جولدارىن ءبىلۋى كەرەك. استانا قالاسى «جيتس-نىڭ الدىن الۋ جانە وعان قارسى كۇرەس ورتالىعى» مكقك باستاماسىمەن ەلوردانىڭ ءوندىرىس ورىندارىندا جانە ۇلكەندى-كىشىلى بيزنەس قۇرىلىمدارىندا ايتۆ جۇقپاسىن الدىن الۋعا ارنالعان وقۋ باعدارلاماسى ەنگىزىلگەن. اتالعان كاسىپورىنداردا ارنايى سەمينارلار دا وتكىزىلىپ تۇرادى. بارلىق 1 مىڭعا تارتا شاراعا سان مىڭداعان ادام قامتىلدى. ماماندار, اسىرەسە, سۇلۋلىق سالونى, ديسكو-كلۋب, مەيرامحانا, مونشا, حاۋىز سياقتى ادام اياعى كوپ جەرلەردە سەمينارلار وتكىزۋدى باستى نىساناسىنا العان.
سونداي-اق, اۋرۋدىڭ الدىن الۋ, ساقتانۋ جولدارىمەن تانىستىرۋ جايىندا كەڭىنەن اقپارات بەرۋ ءۇشىن باق-تىڭ ۇلەسى باسىم ەكەندىگىن ەسكەرە وتىرىپ, جيتس ورتالىعىنىڭ تاپسىرىسى بويىنشا مەملەكەتتىك جانە ورىس تىلدەرىندە ءتورت بەينەروليك جاسالىپ, بىرنەشە تەلەارنادان كورسەتىلدى. سونىمەن قوسا تۇرعىندار كوپ شوعىرلاناتىن جەرلەردە, قوعامدىق كولىكتەردىڭ مونيتورلارىندا, ءوندىرىس ورىندارىنداعى ورناتىلعان مونيتورلاردا بارلىعى 1 474 484 اقپارات جاريالاندى. اتالعان شارالاردىڭ جىل ساناپ ارتىپ كەلە جاتقانى كوڭىل قۋانتارلىق جاعداي جانە ونىڭ ناتيجەسىز بولمايتىنىنا سەنىمىمىز كامىل.
ايتۆ جۇقپاسى نەمەسە جيتس سيندرومى تۋرالى تالاي ايتىلىپ, جازىلىپ تا ءجۇر. سوعان قاراماستان وسى سىرقاتقا شالدىققانداردىڭ قاتارى كوبەيە ءتۇسۋىنىڭ ءبىر سەبەبى – مۇنداي اقپاراتقا كوپشىلىك «ماعان قاتىسى جوق» دەگەن كوزقاراسپەن قارايدى. وسىنداي نەمقۇرايلىلىق اۋرۋدىڭ تارالۋىنا ەرىك بەرىپ وتىر.
«ايتۆ جۇقپاسى ەسىرتكى قۇمارلار مەن جەزوكشەلەردە عانا بولادى» دەگەن جاڭساق تۇسىنىكتەن ارىلۋىمىز كەرەك. ءار ادام عاسىر ىندەتى تۋرالى, ودان ساقتانۋدىڭ جولدارىن بىلە جۇرگەنى ارتىقتىق ەتپەيدى. ال, ءبىزدىڭ ورتالىق كەز كەلگەن ۋاقىتتا ايتۆ جۇقپاسى (سپيد) تۋراسىندا كەز كەلگەن سۇراققا جاۋاپ بەرىپ, كومەك كورسەتۋگە ءازىر. مەكەنجايىمىز: استانا قالاسى, ەسەنبەرلين ك-ءسى, 5/1, انىقتاما تەلەفوندارى: 38-15-85, 38-04-71
ەركىنبەك مومىنبەكوۆ,
استانا قالاسى جيتس ورتالىعى
ۇيىمداستىرۋ ءبولىمىنىڭ مەڭگەرۋشىسى
