قازاق ادەبيەتى – الەم نازارىندا
تاۋەلسىزدىكتىڭ شيرەك عاسىر تويىنا ارناپ قر مادەنيەت جانە سپورت مينيسترلىگى مەن استاناداعى ۇلتتىق اكادەميالىق كىتاپحاناسىنىڭ ۇيىتقى بولۋىمەن بىرقاتار شەت مەملەكەتتەردە «قازاق ادەبيەتىنىڭ ورتالىعى» اشىلدى.
حالقىمىز ءسوز ونەرىنە قۇلاگەردەي جۇيرىك ەكەنى ءمالىم. اسىرەسە, الەمدىك رۋحانياتتان ءوز ورنىن ويىپ العان قازاق ادەبيەتىنىڭ دە جۇرتشىلىق ءسۇيسىنىپ وقيتىن ءىنجۋ-مارجاندارى جەتەرلىك. ارىگە بارماي-اق, وتكەن جيىرماسىنشى عاسىردا عۇمىر كەشكەن الىبىمىز مۇحتار اۋەزوۆ «اباي جولى» رومانىمەن حالقىمىزدىڭ سان عاسىرلىق ءداستۇرى مەن دانالىعىن, مادەنيەتى مەن پاراساتتىلىعىن, عاجايىپ سۇلۋ سازعا ورىلگەن ءتىلى مەن تانىمىن جەر-جاھانعا جارقىراتىپ كورسەتكەن ەدى. مىنە, وسىنداي ساف التىن سەكىلدى ەشقاشان توت باسپايتىن اسىل قازىنالارىمىزدى الەمدىك دەڭگەيدە ناسيحاتتاۋعا جاڭا اشىلعان ورتالىقتاردىڭ بەرەرى مول بولماق.
«مۇنداي ورتالىقتى شەتەلدەردە اشۋداعى باستى ماقساتىمىز – ەلدەن جىراقتا ءجۇرگەن قانداستارىمىز بەن قازاقستان جايلى كوبىرەك بىلگىسى كەلەتىن شەتەلدىك ازاماتتارعا ەلىمىزدىڭ تاريحى, ادەبيەتى, ونەرى جانە عىلىمنىڭ ءار سالاسىندا جەتكەن جەتىستىگىمىز جايلى مالىمەتتەردى جەتكىزۋ» دەيدى وسى ىزگىلىكتى ءىستى ۇيىمداستىرۋشىلار.
بۇگىندە «قازاق ادەبيەتىنىڭ ورتالىعى» ارمەنيا, ۆەنگريا, گەرمانيا, يران, قىرعىزستان, مالايزيا, رەسەي جانە ءوڭتۇستىك كورەيا سەكىلدى مەملەكەتتەردە اشىلىپ, شەتەلدىك وقىرماندارعا وتانىمىزدى جاقىنىراق بىلۋگە مۇمكىندىك تۋدى.
تاياۋدا عانا جاڭا ورتالىق تۇركيانىڭ استاناسى – انكارا قالاسىندا اشىلدى. وعان قازاقستاننىڭ تۇركياداعى ەلشىلىگى قولداۋ كورسەتتى. ورتالىقتىڭ اشىلۋىنا تۇرىك ۇلتتىق كىتاپحاناسىنىڭ ديرەكتورى ءزۇلفي تومان, الماتىداعى ۇلتتىق كىتاپحانانىڭ ديرەكتورى جانات سەيدۋمانوۆ جانە ەلورداداعى ۇلتتىق اكادەميالىق كىتاپحاناسىنىڭ سيرەك كىتاپتار مەن قولجازبالار قىزمەتىنىڭ جەتەكشىسى ءاليا قوجابەكوۆا سەكىلدى ازاماتتار قاتىسىپ, تۇساۋى كەسىلگەن ورتالىقتىڭ ەكى ەل اراسىنداعى مادەني, رۋحاني دامۋدى جوعارعى دەڭگەيگە كوتەرەتىنى جايىندا سالماقتى ءسوز قوزعالدى.
الداعى تاڭدا وسىنداي ورتالىقتاردى تاعى باسقا شەت ەلدەردە اشۋ جوبالانىپ وتىرعان كورىنەدى.
ازامات ەسەنجول