«رۋحاني جاڭعىرۋ» باعدارلاماسىن ىسكە اسىرۋ ماقساتىندا «قاھارماندار» قازاقستاننىڭ بوستاندىعى مەن تاۋەلسىزدىگى ءۇشىن كۇرەستە جاپا شەككەن تۇلعالاردى اقتاۋ جانە ەستە ساقتاۋ جونىندەگى رەسپۋبليكالىق قوعامدىق قور قۇرىلدى. 24 مامىر كۇنى بۇل ۇيىم ەلورداداعى ءوز كەڭسەسىنىڭ ەسىگىن سالتاناتتى تۇردە اشىپ, العاشقى جۇمىسىن «ەل بىرلىگى جانە قاھارماندار ساباقتاستىعى» تاقىرىبىندا دوڭگەلەك ۇستەلمەن باستادى.
بۇل شاراعا ورالباي ءابدىكارىموۆ, ومىرزاق وزعانباەۆ, امانگەلدى ايتالى, مامبەت قويگەلدى, زيابەك قابىلدينوۆ, بەرىك ابدىعاليۇلى سىندى ەلگە ايگىلى ساياسي تۇلعالار, قوعام قايراتكەرلەرى مەن عالىمدار قاتىسىپ, ءسوز سويلەدى. بايانداماشىلار وندا مەملەكەت قوعام قاجەتىنە اينالعان بارلىق جۇمىستى ءوزى اتقارا المايتىن بولعاندىقتان, ۇكىمەتتىك ەمەس ۇيىمدار قاجەت ەكەنىن ءبىلدىردى. «رۋحاني جاڭعىرۋ» باعدارلاماسىن جۇزەگە اسىرۋدا ازاتتىق ءۇشىن كۇرەسكەن بوزداقتاردى اقتاپ, ولاردىڭ ەسىمىن ءدارىپتەۋ, ەلدە اتىنا كوشە بەرىپ, ۇرپاققا ۇلگى بولاتىن ەرلىك ىستەرىن ساباق قىلۋ بۇل تۇرعىدا سانانى جاڭعىرتۋعا قاجەت, ۋاقىت تالابىنداعى ءىس ەكەنى ايدان انىق. سوندىقتان دا ولار «قاھارماندار» اتتى رەسپۋبليكالىق قوردىڭ قۇرىلعانىنا قۋانعاندارىن جاسىرا المادى. بۇل تۇرعىدا قور جەتەكشىسى, بەلگىلى قايراتكەر سابىر قاسىموۆ: «ءبىز ۇلكەن دەڭگەيدەگى تاريحتاعى حاندار مەن بيلەردى, باتىرلاردى, اتى ەلگە ءماشھۇر تۇلعالاردى اقتادىق. بىراق جەرگىلىكتى جەرلەردە ءالى اقتالماعان, ەلەۋسىز قالىپ قويعان ازاماتتار كوپ. مەن سول ەسىمدەر الدىنداعى ايىبىمىزدى وتەۋ ءۇشىن بۇرىننان وسى ماقساتتا جۇمىس ىستەپ كەلە جاتىرمىن. وسى ماقساتتا جۇيەلى, ناتيجەلى جۇمىس ىستەۋ ءۇشىن مىنا قوردى اشتىق, قازىر وبلىستاردان دا فيليالدارىن قۇرۋعا جۇمىس ىستەپ وتىرمىز» دەيدى.
بۇدان ءارى «قاھارماندار» قوعامدىق قورى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە وسى وقۋ ورداسى مەن قر بعم ش.ءۋاليحانوۆ اتىنداعى تاريح جانە ەتنولوگيا ينستيتۋتىمەن بىرلەسىپ «استانا – ۇلى دالا ءپاتريوتيزمى مەن جاسامپازدىعىنىڭ سيمۆولى» تاقىرىبىندا حالىقارالىق عىلىمي-پراكتيكالىق كونفەرەنتسيا وتكىزدى. بۇل كونفەرەنتسياعا پارلامەنت دەپۋتاتتارى, وتاندىق جانە رەسەي, جاپونيا, تۇركيا, ۆەنگريا سەكىلدى مەملەكەتتەردەن كەلگەن عالىمدار, ساياسي تۇلعالار قاتىستى. ساراتوۆ مەملەكەتتىك ۋنيۆەرسيتەتىنىڭ پروفەسسورى اندرەي شەنين استانانىڭ جەدەل قارقىنمەن دامۋى مەن الەمدىك ۇردىستەرگە قوسىپ وتىرعان ۇلەسى, بەيبىتشىلىك پەن تاتۋلىققا قىزمەت ەتىپ كەلە جاتقان قالا ەكەنىنە توقتالسا, جاپونيانىڭ توكۋشيما ۋنيۆەرسيتەتىنىڭ تەحنيكا عىلىمدارىنىڭ دوكتورى, پروفەسسور اكيتوشي موچيزۋكي «جاپون پروگرەسىنىڭ فەنومەنى» تاقىرىبىندا ءسوز سويلەپ,
«رۋحاني جاڭعىرۋ» باعدارلاماسىنىڭ ماڭىزدى تۇستارىن ءسوز قىلدى. زاڭ عىلىمدارىنىڭ دوكتورى, پروفەسسور مارات سارسەنباەۆ: «تاريحقا قاراساق, قازاقستاننىڭ استاناسى ىلعي ەل شەتىندە بولىپتى. ورىنبوردى الساڭىز دا, قىزىلوردانى الساڭىز دا, الماتىنى الساڭىز دا سولاي. ال شىن مانىندە الەمنىڭ قاي ەلىن الىپ قاراساڭىز دا, استاناسى ەل تەرريتورياسىنىڭ قاق ورتاسىندا. ءبىز استانانى ارقاعا كوشىرۋ ارقىلى سول كەمشىلىگىمىزدى جويدىق. استانا قازىر بايتاق ەلىمىزدىڭ ورتالىعىنان بوي كوتەرگەن» دەي كەلە, ەلوردا تاريحىن باياندادى. پروفەسسور مامبەت قويگەلدى الاش ارىستارىنىڭ قادامىنان كەيىن ءىرى رەفورما جاساپ وتىرعان ەل پرەزيدەنتى نۇرسۇلتان نازارباەۆ جانە استانا دا سول رەفورمانىڭ جەمىسى ەكەنىن اتاپ ءوتتى ول.
