بۇرناعى كۇنى باسكەتبولدان قازاقستان كۋبوگىنىڭ يەگەرى بەلگىلى بولدى. اقتىق سىندا «استانا» مەن «اتىراۋ بارىستارى» كوماندالارى كەزدەسىپ, ناتيجەسىندە ەلوردالىقتاردىڭ مەرەيى ۇستەم بولدى.
العاشقى اينالىمنان-اق «استانانىڭ» ارىنى قاتتى ەكەنى اڭعارىلدى. كومانداسىن الدىمەن العا شىعارعان انتون پونومارەۆ بولدى. بىراق بۇل ەسەپتى «بارىستار» ارتىنشا تەڭەستىردى. ايتكەنمەن, ەكپىندى ەلوردالىقتار ويىننىڭ ءبىرىنشى جارتىسىندا قارسىلاستارىنان 10 ۇپاي ارتىق بولدى.
ەسەپ – 8:18.
ەكىنشى اينالىمنىڭ 4-ءىنشى مينۋتىندا رۇستەم مىرزاعاليەۆ كومانداسىنا تاعى دا 3 ۇپاي سىيلادى. اتىراۋلىقتار دا جاۋاپسىز قالمادى. ەسەپ 24:33 بولىپ ەسەلەندى.
ازداپ تىنىعىپ العاننان كەيىن پاركەتكە قايتا شىققان باسكەتبولشىلاردىڭ جەڭىس جولىنداعى تارتىستارى قىزا ءتۇستى. ءۇشىنشى اينالىم 38:47 ەسەبىمەن اياقتالدى.
قورىتىندى كەزەڭدە ەكى جاق تا ايانىپ قالمادى. كۋبوكقا ءبىر قادام قالعاندا باسىپ وزۋعا بارىن سالعان «اتىراۋ بارىستارىنىڭ» ۇمتىلىسىنا قاراماستان, ەلوردالىقتار ەكىلەنە ءتۇستى. ۇپاي ايىرماشىلىعىن 10-نان 20-عا دەيىن ارتتىرىپ تاستادى. جالپى ەسەپ – 46:66. وسىلايشا, العا الدەقايدا ۇزاپ كەتكەن «استانا» جەڭىستى جۇلىپ الدى.
بىرىنشىلىكتىڭ ناتيجەسىندە ويىنشىلاردىڭ ۇزدىك بەستىگىنە «استانا» ساپىنان ءۇش باسكەتبولشى ەندى. ولار – رۇستەم مىرزاعاليەۆ, رۋستام ەرعالي جانە انتون پونومارەۆ.
ورىنبەك وتەمۇرات
