كەشە اقوردادا پرەزيدەنت نۇرسۇلتان نازارباەۆ ەلىمىزگە مەملەكەتتىك ساپارمەن كەلگەن ۇلىبريتانيا پرەمەر-ءمينيسترى دەۆيد كەمەرونمەن كەزدەستى.
مەملەكەت باسشىسى استاناعا كەلگەن مارتەبەلى مەيمانعا ىستىق ىقىلاسىن ءبىلدىرىپ, ۇلىبريتانيا پرەمەر-مينيسترىنىڭ العاشقى ساپارىنىڭ ءمان-ماڭىزىنا توقتالدى.
– ءبىزدىڭ ەلىمىز ۇلىبريتانيامەن تىعىز قارىم-قاتىناس ورناتۋعا مۇددەلى. ءسىزدىڭ ساپارىڭىز قازاقستاننىڭ مۇنايلى ولكەسى – اتىراۋدان باستالعانى قۇپتارلىق. قول قويۋعا دايىندالعان قۇجاتتار مەن ءوزارا كەلىسسوزدەر – ەكى ەل اراسىنداعى ەكونوميكالىق جانە ساياسي ىنتىماقتاستىققا جاڭا سەرپىن بەرەتىنىنە سەنەمىن, – دەدى پرەزيدەنت.
دەۆيد كەمەرون مىرزا ءوز كەزەگىندە قازاقستان باسشىسىنا ەرەكشە ىقىلاسى ءۇشىن العىسىن ءبىلدىرىپ, ءوزىنىڭ العان اسەرى تۋرالى ايتىپ بەردى. قاشاعان كەن ورنىن كورىپ, كەشە نازارباەۆ ۋنيۆەرسيتەتىندە ستۋدەنتتەرمەن كەزدەسكەن ۇلىبريتانيانىڭ پرەمەر-ءمينيسترى ستراتەگيالىق سەرىكتەستىك اياسىنداعى وسى كەزدەسۋلەر ءوزارا ىنتىماقتاستىقتى نىعايتا تۇسەتىنىن اتاپ ءوتتى.
وتكەن جىلى ەكى ەل اراسىنداعى ديپلوماتيالىق قارىم-قاتىناستاردىڭ ورناعانىنا 20 جىل تولدى. قازاقستان مەن ۇلىبريتانيا اراسىنداعى تاۋار اينالىمى بىلتىر 2 ميلليارد 300 ميلليون دوللاردى قۇراعان. الدا وسى كورسەتكىشتى ارتتىرۋ جوسپاردا بار. ۇلىبريتانيا قازاقستاندى ءوزارا ساۋدانى جانداندىرۋ جونىندە باسىمدىعى بار 14 ەلدىڭ تىزىمىنە قوسقانىنا توقتالعان ەلباسى بۇل ەكى ەلدىڭ ەكونوميكالىق مۇددەلەرىنە تولىقتاي ساي كەلەتىنىن ايتىپ ءوتتى.
كەزدەسۋ كەزىندە ىنتىماقتاستىقتىڭ ءارتۇرلى سالالارىنداعى مەملەكەتارالىق ءوزارا قارىم-قاتىناستاردى ودان ءارى نىعايتۋ پەرسپەكتيۆاسى, سونداي-اق, حالىقارالىق كۇن تارتىبىندەگى وزەكتى ماسەلەلەر تالقىلاندى.
قىمبات نۇرعالي
