ەندى ءبىر كۇننەن كەيىن فۋتبولدان ەۋروپا چەمپيوناتى باستالادى. فرانتسيا ەلىندە وتەتىن دوپ دوداسىندا 24 ەلدىڭ قۇراماسى سىنعا تۇسەدى.
ال وسى جارىسقا تۇسەتىن كوماندالار, سونداي-اق باسقا قۇرلىقتار مەن ەلدەردىڭ دە قۇرامالارى كۇنى كەشە جولداستىق كەزدەسۋلەر وتكىزدى.سونداي ۇلتتىق قۇرامالار اراسىنداعى ويىننىڭ ءبىرى قازاقستان جانە قىتاي اراسىندا ءوتتى.
قىتايدىڭ داليان قالاسىندا بولعان ويىننىڭ ءبىرىنشى كەزەڭىندە ەسەپ اشىلمادى. ەكى جاق تا قورعانىسقا اسا ءمان بەرىپ ويناعانى بايقالدى. وكىنىشكە قاراي, قازاقستان قۇراماسىنىڭ بەلدى ويىنشىسى ۇلان قونىسباەۆ ءبىرىنشى تايم اياقتالار تۇستا اۋىر جاراقات الىپ قالدى. مامانداردىڭ ايتۋىنشا تالانتتى فۋتبولشىمىز ەندى ءۇش ايعا جۋىق ويىننان تىس قالۋى مۇمكىن.
ەكىنشى تايمنىڭ 69-شى مينۋتىندا وتانداسىمىز ازات نۇرعاليەۆ الاڭ يەلەرى قورعاۋشىلارى اراسىنان سىتىلىپ ءوتىپ, الا دوپتى قارسىلاستار قاقپاسىنا تۋلاتىپ ءتۇسىردى. وسىلايشا ەسەپ اشىلىپ, قازاقستان قۇراماسى العا شىقتى. الايدا, ەكى كوماندا دا قانشا تىرىسقانىمەن تابلوداعى ەسەپتى وزگەرتە المادى. ءسويتىپ, قازاقستان فۋتبولشىلارى قىتاي قۇراماسىن 1:0 ەسەبىمەن جەڭدى.
بۇل ويىنعا قازاقستان قۇراماسىن وتانداسىمىز تالعات بايسۋفينوۆ باپتاپ اپاردى. وسى باپكەر قۇراما تىزگىنىن ۇستاعالى ۇلتتىق قۇرامامىز ءتورت ويىندا قاتارىنان جەڭىلمەي كەلەدى. وسىعان دەيىن قازاقستان قۇراماسى لاتۆيا جانە ازەربايجان قۇرامالارىن جەڭسە, گرۋزيا قۇراماسىمەن تەڭ تۇسكەن بولاتىن.
