قالالىق دوستىق ۇيىندە قازاقستان حالقى اسسامبلەياسىنىڭ ۇيىمداستىرۋىمەن «قازاقتانۋ – ەل بىرلىگىنىڭ نەگىزى» اتتى رەسپۋبليكالىق عىلىمي-تاجىريبەلىك كونفەرەنتسيا ءوتتى.
قالا اكىمىنىڭ ورىنباسارى باحتيار ماكەن «قازاقتانۋ» جوباسىنىڭ باستى مىندەتتەرىنىڭ ءبىرى – جالپى مادەني كود, بىرىڭعاي قۇندىلىقتار جانە بارلىق قازاقستاندىقتاردىڭ ەتنيكالىق قاتىستىلىعىنا قاراماستان تاريحي سانا نەگىزىندە حالىق بىرلىگىن نىعايتۋ ەكەنىن اتاپ ءوتتى. «جوبانىڭ تاعى ءبىر مىندەتى – ءوزارا ءىس-قيمىل سالاسىن كەڭەيتۋ جانە ەتنوستار كوممۋنيكاتسياسىنىڭ جاڭا ارنالارىن جانداندىرۋ, ورتاق تاريحىمىز نەگىزىندە بىرلىكتى نىعايتۋ» دەدى ول.
كونفەرەنتسيادا قازاقتىڭ ۇلى ويشىلى اباي قۇنانبايۇلىنىڭ 175 جىلدىعىنا ارناپ اباي شىعارمالارىن ورىنداۋ بويىنشا چەللەندج وتكىزىلدى. ەلوردالىق ەتنومادەني بىرلەستىكتەر «كوزىمنىڭ قاراسى» ءانىن شىرقاعان سوڭ, ەستافەتانى الماتى قالاسى قازاقستان حالقى اسسامبلەياسىنا تاپسىردى.
رەسپۋبليكالىق عىلىمي-پراكتيكالىق كونفەرەنتسيانىڭ قورىتىندىسى بويىنشا قارار قابىلداندى. ءىس-شاراعا قاتىسۋشىلار ەلباسىنىڭ «قازاقتانۋ» قحا جوباسى نەگىزىندە جوو-دا «قازاقتانۋ» ءپانىن ەنگىزۋ, قحا مەكتەپتەرى مەن ەتنولينگۆيستيكالىق ورتالىقتارىندا ۇيىرمەلەر اشۋ, ەتنوستاردى قازاق قولونەرى مەن كاسىپشىلىكتەرىنە وقىتۋ بويىنشا دوستىق ۇيلەرى جانىنداعى شەبەرلىك-سىنىپتار مەن كۋرستار تۋرالى ۇسىنىستار ەنگىزدى.
كونفەرەنتسياعا قازاقستان حالقى اسسامبلەياسى توراعاسىنىڭ ورىنباسارى – قحا حاتشىلىعىنىڭ مەڭگەرۋشىسى جانسەيىت تۇيمەباەۆ, سونداي-اق پارلامەنت ءماجىلىسى توراعاسىنىڭ ورىنباسارى ۆلاديمير بوجكو, كورنەكتى مەملەكەت جانە قوعام قايراتكەرلەرى, قر پارلامەنتى ءماجىلىسىنىڭ دەپۋتاتتارى, شىعارماشىل زيالى قاۋىم, ەلوردالىق ەتنومادەني بىرلەستىكتەر, قحا جاستار قاناتى, ۇكىمەتتىك ەمەس ۇيىمدار وكىلدەرى قاتىستى.
