ورتالىق كوممۋنيكاتسيالار قىزمەتىنىڭ كەزەكتى بريفينگىنە «سامۇرىق-قازىنا» ۇلتتىق ءال-اۋقات قورىنىڭ باسقارما توراعاسى ومىرزاق شوكەەۆ قاتىسىپ, قوردىڭ بىلتىرعى جىلدىڭ جۇمىس قورىتىندىسى مەن الداعى جوسپارلارى جونىندە ءسوز قوزعادى.
«سامۇرىق-قازىنا» ۇلتتىق ءال-اۋقات قورى – ەلىمىزدىڭ ستراتەگيالىق ماڭىزى بار اكتيۆتەرى شوعىرلانعان ءىرى كومپانيا ەكەنىن اتاپ وتكەن ومىرزاق ەستايۇلى ونداعى جاعدايعا از-كەم توقتالدى.
بۇگىندە قوردىڭ اكتيۆتەرى 14 ترلن 543 ملرد تەڭگەنى قۇرايدى ەكەن. مۇندا 342 904 قىزمەتكەر جۇمىس ىستەيدى. بىلتىر كومپانيانىڭ تازا تابىسى 641,2 ملرد تەڭگەگە شىققان. سوعان قاراماستان وزدەرىنىڭ جۇمىس قارقىنىن انىقتاۋ ءۇشىن حالىقارالىق «ماككينزي» كومپانياسىمەن بىرلەسىپ, الەمدىك تاجىريبەگە ساي تالداۋ جاساعان «سامۇرىق-قازىنا» اكتيۆتەرىنىڭ كولەمى بويىنشا 9-شى ورىنعا تۇراقتاپتى. زەرتتەۋگە سايكەس, كورسەتكىشتەرى كوڭىلدەن شىقپايتىن وسال اكتيۆتەردى ىرىكتەۋ جۇمىستارى جۇرگىزىلىپ, وتكەن جىلدىڭ اياعىندا 713 اكتيۆ پەن نىساننىڭ 482-ءسى شىعارىلىپتى. جالپى بەيىندى ەمەس اكتيۆتەردى قايتا قۇرىلىمداۋ – ەلباسىنىڭ تاپسىرماسى. ەندى الداعى ەكى جىل ىشىندە 30 اكتيۆ پەن 45 نىسان قايتا قۇرىلىمداۋدان وتەتىن بولادى. باسقارما توراعاسى اكتيۆتەر مەن نىسانداردى شىعارۋ شارالارى اشىق جۇرگىزىلەتىنىن, مۇنداي اقپارات بارلىق كومپانيالاردىڭ سايتتارىندا جارىق كورەتىنىن اتاپ ءوتتى.
ومىرزاق شوكەەۆ ەلىمىزگە ءىرى ينۆەستورلاردى تارتۋ جولىندا ۇلتتىق قوردىڭ قولعا العان جۇمىستارىنا توقتالا كەلە, 2014-2016 جىلدارى 23,2 ملرد دوللار كولەمىندەگى 18 جوبانى جۇزەگە اسىرىلۋ جوسپارلانىپ وتىرعانىن جەكىزدى. سونىڭ التاۋى بيىل قولعا الىنادى. جاڭا جوبالاردىڭ ارقاسىندا 8 مىڭعا جۋىق ادام جۇمىسپەن قامتىلماق. جوبالاردىڭ ىشىندە كولىك تەحنولوگياسى ەرەكشە ماڭىزعا يە كورىنەدى. سوندىقتان, ءال-اۋقات قورى بيىل مامىر ايىنا دەيىن «ەير استانا» مەن «ەير قازاقستاننان» باسقا تاعى ءبىر اۋە كومپانياسىن اشۋدى كوزدەپ وتىر. كەلەسى جىلى جۇمىسىن باستايتىن كاسىپورىننىڭ 10 جاڭا ۇشاعى الداعى جىلى كوكتە قالىقتايتىن بولادى.
بريفينگتە كەزىندە ۇلتتىق قوردان قارجى العان ەكىنشى دەڭگەيلى بانكتەردىڭ بەرەشەگىن قانشالىقتى قايتارعانى تۋرالى دا ءسوز بولدى. وسىدان بىرنەشە جىل بۇرىن داعدارىستى جاعدايعا بايلانىستى مەملەكەت «بتا بانك», «تەمىربانك», «اليانس بانك», «حالىق بانك» جانە «كازكوممەرتسبانككە» ۇلتتىق قورداعى قاراجاتتان 332 ملرد تەڭگە بولىنگەن ەدى. ەندى بۇل قارىز قايتارىلدى ما؟ ومىرزاق ەستايۇلىنىڭ ايتۋىنشا, «حالىق بانكى» اق كاپيتالىنا قۇيىلعان قارجى تولىعىمەن قايتارىلعان. ال, باسقا ءۇش بانكتەن قايتارىلعان اقشا قازىر 200 ملرد تەڭگەدەن اسقان. ەندى «قازكوممەرتسبانكتە» قالعان قارىز مەملەكەتكە تيەسىلى پاكەتتى ساتقان كەزدە تولىققاندى قايتارىلماق.
قىمبات نۇرعالي
