قوس التىننىڭ قۋانىشى
وليمپيادا ويىندارى باستالعالى قازاق جانكۇيەرىنىڭ قۋانىشىندا شەك جوق…
… جەڭىس رۋحىمەن جەلپىنىپ ءجۇرمىز.
… قوس التىن قازاقتىڭ قۇدىرەتىن كوتەرىپ تۇر.
تۇنىمەن-كۇنىمەن ءبىرىن ءبىرى قۇتتىقتاعان اعايىننىڭ كوڭىلى شات-شادىمان…
تورتكۇل دۇنيەنىڭ ەڭ ۇزدىك سپورتشىلارى ءتورت جىلدا ءبىر رەت سايىسقا تۇسەتىن ءدۇبىرلى دودا باستالعان كۇنى- اق كۇللى الەمگە «قازاقستاندىق سپورتشى – وليمپيادا چەمپيونى!» دەگەن اقجولتاي اقپارات تاراپ كەتتى…
ءيا, قازاقستاندىق ۆەلوشاباندوز الەكساندر ۆينوكۋروۆ, شىنى كەرەك, كۇتپەگەن جەردەن, لوندون وليمپياداسىنىڭ قاھارمانى اتاندى. اتاقتى «ۆينو» 250 شاقىرىمدىق جارىستا الدىنا جان سالماي, مارە سىزىعىن ءبىرىنشى بولىپ كەستى. بۇل قازاقستان قورجىنىن تۇسكەن العاشقى التىن مەدال بولدى.
«مەنىڭ بۇل جەڭىسىمدى قازاقستانعا ارنايمىن. بۇل مەنىڭ جەكە جەڭىسىم ەمەس, بۇل – باپكەرلەرىمنىڭ, جانكۇيەرلەرىمنىڭ جەڭىسى. شىنىمدى ايتسام, سپورتتان ءدال وسىلاي ادەمى كەتەمىن ويلاماعان ەدىم. ەندى باپكەرلىك نەمەسە مەنەدجەرلىك كاسىپپەن اينالىساتىن شىعارمىن», – دەدى لوندونداعى «قازاق اۋىلىندا» ءباسپاسوز ءماسليحاتىن وتكىزگەن ۆينوكۋروۆ.
العاشقى التىننىڭ قۋانىشى بويىمىزدان تاراماي-اق قازاق جۇرتشىلىعى تاعى ءبىر كەرەمەت جەڭىستىڭ كۋاگەرى بولدى. بۇل جولى اۋىر اتلەت ءزۇلفيا چينشانلو بۇكىل الەمگە قازاقستان ءانۇرانىن تىڭداتتى. بيداي ءوڭدى بويجەتكەنىمىز وليمپيادا چەمپيونى بولىپ قانا قويماي, الەم رەكوردىن دا جاڭارتتى. جۇلقا كوتەرۋدە 95 كەلى, سەرپە كوتەرۋدە 131 كەلى سالماقتى باعىندىرعان ءزۇلفيا ءوزىنىڭ جەڭىس قۇرمەتىنە قازاقستان تۋى كوتەرىلىپ, ءانۇرانىمىز شارىقتاعان ساتتە كوز جاسىنا يە بولا المادى…
جەڭىستى ساتتەن كەيىن بەرگەن سۇحباتىندا ءزۇلفيا چەمپيون «مەن بۇل جەڭىسىمدى قازاقستان ەلىنە ارنايمىن. ءالى دە وليمپيادا چەمپيونى بولعانىما سەنە الماي وتىرمىن. بۇل التىن مەدال جايىندا مەن بەس جىل ويلاپ ءجۇردىم… بىراق قازىر ەشتەڭەنى ەسىمە تۇسىرگىم كەلمەيدى. ايتپەسە, تاعى دا جىلاپ جىبەرەمىن. مەن تاعى دا ءبىر وليمپيادالىق تسيكلدا, ياعني ءتورت جىلداي سپورتتا بولىپ, قازاقستاندىقتاردى جاڭا رەكوردتارمەن, جەڭىستەرمەن قۋانتا بەرگىم كەلەدى», – دەپ اعىنان جارىلدى.
سوزدەرىنەن دە, كوزدەرىنەن دە قازاق ەلىنىڭ شىنايى پاتريوتتارى ەكەنى ايتپاي-اق اڭعارىلاتىن قوس چەمپيونعا ءبىز دە ريزاشىلىق سەزىممەن قارايمىز. بۇل جەڭىستەر شىن مانىندە بۇكىل قازاقستاندىقتاردى شەكسىز قۋانىشقا بولەپ, تالاي قازاق بالاسىنىڭ جۇرەگىنە جەڭىس رۋحىن سىڭىرگەنى ايقىن. ولاي بولسا, ەلدىك مارتەبەمىزدى, ۇلتتىق مەرەيىمىزدى وسىرەتىن وسىنداي جەڭىستى كۇندەرىمىز جالعاسا بەرگەي.
لوندون تورىندە كوك بايراعىمىز جەلبىرەپ, ءانۇرانىمىز شارىقتاي ءتۇسسىن!
لوندوننان الاتىن جۇلدەمىز ءالى دە بار. وليمپيادا ويىندارىنان جۇلدەسىز قايتپايتىن بوكسشىلارىمىز بەن بالۋاندارىمىز, يلين سەكىلدى «التىن بالانىڭ» شەشۋشى سايىستارى ءالى الدا. دەمەك, قازاق جانكۇيەرى تاقىمىن قىسىپ, جۇرەگى ەلجىرەيتىن ساتتەر دە الداعى كۇندەردىڭ ەنشىسىندە.
ءار جارىسقا ەلەڭدەپ وتىرعان بار قازاقتىڭ بۇگىنگى ويى وسىنداي…
عالىم قوجابەكوۆ