اينالا تىگىلگەن قىزىلدى-جاسىلدى شاتىرلاردان اياق الىپ جۇرگىسىز. ولاردىڭ 80 شاتىرىنا سىرتتان كەلگەن باردتار ورنالاسسا, 40 شاتىرعا ەلوردالىقتار جايعاستى. ال, قالادان كونتسەرت تاماشالاۋعا اعىلعان حالىق سانىندا شەكتەۋ بولمادى.
قازاقستاننىڭ بارلىق ايماقتارىنان اتىشۋلى فەستيۆالگە تايلى-تۇياعى قالماي باردتار اعىلدى. تەك ءبىزدىڭ ەلىمىزدەن كەلگەن قوناقتار عانا ەمەس, جالپى اۆتورلىق اندەردى جانىنا جاقىن بالاعان انسۇيەر قاۋىم وسى شاتىرلى اۋىلدان تابىلدى.
فەستيۆال ۇيىمداستىرۋشىلارى – استانا قالاسىنىڭ اكىمدىگى مەن «دومينانتا» اۆتورلىق اندەر قورى. جىل سايىن وتكىزىلىپ, اتاعى اسپانداپ كەتكەن فەستيۆال جىلدان جىلعا كەرەگەسىن كەڭەيتىپ كەلەدى.
بارد انشىلەردىڭ سۇيىكتى باسقوسۋىنا اينالىپ, ونىڭ ءمان-ماڭىزىنىڭ ارتۋىنىڭ ايعاعى بولا باستادى. جالپى, سوناۋ 1979 جىلدان بەرى باستاۋ الىپ كەلە جاتقان ءان مەرەكەسى 1999 جىلدان بەرى حالىقارالىق مارتەبەگە يە. بۇعان دەيىن دە فەستيۆالگە تانىمال بارد انشىلەر لەگ-لەگىمەن كەلىپ جاتاتىن. ولاردىڭ اراسىندا تمد اۋماعىنا ەتەنە تانىس اۆتور-قوناقتار از بولعان جوق. مىسالى, بارد انشىلەر ءپىر تۇتاتىن الەكساندر دۋلوۆ, الەكساندر سۋحانوۆ, ۆيكتور لۋفەروۆ, ميحايل كوچەتكوۆ, يرينا مەن ميحايل ستوليارلار, اندرەي شيرياەۆ, رايسا نۋرمۋحامەتوۆا (ماسكەۋ), يۋري كۋنين جانە ەۆگەني كلياچكين (سانكت-پەتەربور), اندرەي كوزلوۆسكي (ۆولوگدا), گەننادي پەرەۆالوۆ (ەكاتەرينبور), شۋحرات حۋساينوۆ (سامارا), ولگا كاچانوۆا, ۆاديم كوزلوۆ (الماتى), نيكولاي ستارچەنكوۆ (تۇمەن), لەونيد ماراكوۆ (كراسنوتۋرينسك), جەنيس يسكاكوۆ (ومبى), سەرگەي اكسەنوۆ (يۆانوۆو), مەرەكە يسكاكوۆ (كراسنويارسك) سىندى تانىمال باردتار استانالىق دۋماندى جىلدا جىبەرمەيدى.
وسى جىلى باردتاردىڭ فەستيۆالىنە سوناۋ ماسكەۋدەن ات ارىلتىپ جەتكەن الەكساندر ۆينيتسكي, توبىلدىڭ تۋماسى ۆەرا ۆوتينتسەۆا سىندى مايتالماندار قاتىسىپ, ارقانىڭ دالاسىندا ءان ءۇش كۇن اۋەلەدى.
وعان كۇننىڭ كوزىن شاربى بۇلتتار تۇمشالاعانى دا, نوسەردىڭ قۇيعانى دا كەدەرگى كەلتىرە المادى. قايتا اسپاننان توككەن جاۋىندى نۇرعا بالاپ, قۋانعان, شابىت شاقىرعان شىعارماشىل جاندار ءبىر جاساپ, ءماز بولىستى.
«18-ءدىڭ جاسى» دەپ اتالاتىن بولىمدە تەك جاس باردتاردىڭ ورىنداۋ مانەرى سىنالدى. كوزگە تۇسكەن جاس تالانتتاردىڭ كوبەيۋىن قازىلار القاسى جوعارى باعالاپ جاتتى. ءار قالانىڭ اتىنان ورتاعا شىققاندار دا ۇتىمدى ءسوز تاۋىپ, ۇتقىرلىقتارىن پاش ەتتى. بالالار شىعارماشىلىعىنا دا زور ءمان بەرەتىن فەستيۆال, «التىن كىلت» اتالىمىندا جاسوسپىرىمدەر مەن جەتكىنشەكتەردىڭ جاۋقازىن جىرلارىن تىڭدادى. كەشكە تامان الاۋ ماڭىنا توپتاسقان انشىلەر ءان- جىردى كەمەرىنەن اسىرىپ, توگىلتتى.
اۆتورلىق اندەر سوڭعى جىلدارى ءورىسىن كەڭەيتىپ, ورگە باسىپ كەلەدى. كوپشىلىك اراسىندا مۇنداي اندەردىڭ تەز تارالاتىنى دا بەلگىلى. ونىڭ ءتۇپ نەگىزى ورىس باردتارىنىڭ كوپتىگىنەن بولسا, ەكىنشىدەن, وسىناۋ حالىقارالىق فەستيۆالدەردىڭ كوپتەپ ۇيىمداستىرىلۋى دا سەبەپشى.
سونىمەن, قازىلار القاسىن ۆەرونيكا ۆوتنيتسكايا (تۇمەن), رومان لانكين (توم), ليديا چەبوك- ساروۆا مەن ەۆگەني بىكوۆتىڭ وتباسىلىق دۋەتى, سەرگەي ترۋحا- نوۆ, الەكساندر ۆينيتسكي, الەكساندر رودوۆسكي, جەڭىس يسكاكوۆ (ماسكەۋ) جانە قازاقستاندىق الەكساندر گۋبەرت پەن ەۆگەني زينيندەر قۇرادى. ولاردىڭ باعالاۋىمەن جەتى ديپلومانت ىرىكتەلدى. جەڭىمپازدار مىنالار بولدى: كومپوزيتور بوريس گورديەنكو (استانا), اۆتورلار قايرات كەڭەسوۆ (الماتى) پەن مىرزامۇرات قاشارباەۆ (شىمكەنت).
ال, انسامبلدەر اراسىنان سۋىرىلىپ شىققاندار ومبىدان كەلگەن «كازانتسەۆتەر» ءانسامبلى بولدى. ولاردىڭ سوڭىن الا جەرلەستەرى «كامەرتون» ءانسامبلى جوعارى ماراپاتقا يە بولدى. پەتروپاۆلوۆسكىدەن كەلگەن «نادەجدا» ءانسامبلى دە ديپلومانت اتاندى. قاراعاندىلىق انشىلەر ناتاليا چەپارسكايا مەن يرينا جۋراۆلەۆا دا توپ جارىپ شىعىپ, ديپلومانت مارتەبەسىن قانجىعاعا بايلادى.
بارلىعى 50-دەن اسا جەكە ءانشى جانە 7 توپ قاتىسقان فەستيۆالدىڭ كورىگى كەشكى الاۋ كەزىندە ەرەكشە قىزدى. اۋا-رايى دا كەشقۇرىم قارايلاسىپ تۇردى. ەڭ باستىسى, بۇل باسقوسۋ ءان مەن دوستىق سالتانات قۇرعان مەيرامعا ۇلاستى.
ءبىر اتتەگەن-ايى, مۇنداي مەرەكە حالىقارالىق بولعاننان كەيىن اندەر كوبىنە ورىسشا ايتىلادى. بۇل ورىس ينتەلليگەنتسياسىنىڭ قالىبىنا سالىنىپ بارا ما دەگەن كۇماندار ايتىلا باستادى. تابىلدىڭ ءىزىن باسقان, قازاقشا سايراعان قاراكوز بارد انشىلەر قاتارىنان تابىلىپ, توبە كورسەتە الماي كەلەدى.
شىنار ءابىلدا
