بيىل جەلتوقسان وقيعاسىنا 35 جىل تولىپ وتىر. وسىعان وراي «اتامۇرا» باسپاسىنان بەلگىلى جازۋشى قايىم-مۇنار تابەەۆتىڭ قايرات رىسقۇلبەكوۆ, جامبىلبەك تايجۇماەۆ, تۇگەلباي تاشەنوۆ, قايىرگەلدى كۇزەمباەۆ, ەرتاي كوپەسباەۆ جانە باسقا جەلتوقساندىقتار تۋرالى باياندالاتىن «قاراعايدىڭ قارسى بۇتاعى» اتتى كىتابى جارىققا شىقتى.
قۇندى كىتاپتىڭ وقىرماننىڭ قولىنا تيۋىنە ۇلت رۋحانياتىنىڭ شىن جاناشىرى, «اتامۇرا» باسپاسىنىڭ ديرەكتورى راقىمعالي قۇل-مۇحاممەد بىردەن-ءبىر سەبەپشى بولعان.
«جاز بويى ۋاقىتىمدى ەكى كىتاپ جازۋعا ارنادىم. سونىڭ ءبىرى وسى – «قاراعايدىڭ قارسى بۇتاعى». بۇل كىتاپتىڭ وقىرمانعا جەتۋ جولى وتە اۋىرلاۋ بولدى! العاشقى دۇنيەلەرىم 1989-90 جىلدارى كوممۋنيستىك رەجيمنىڭ قىلىشىنان قان تامىپ تۇرعان كەزەڭدە, «ۇلتشىلدار» مەن «ناشاقورلار», «ماسكۇنەمدەر» تاڭباسى ءالى ارىلماعان, جەلتوقساندىق جاستاردىڭ اتىن اتاۋدىڭ ءوزى قورقىنىشتى زاماندا جازىلعانى وقىرمانداردىڭ ەسىندە بولار. ءبىرازى ادەبي گازەتتە, ۇزىندىلەرى بىرنەشە تاۋەلسىز باسىلىمداردا جارىق كوردى. جارىق كورمەگەنى قانشاما؟! ءوزىم دە سول جەلتوقسان تاقىرىبىن قازبالايمىن دەپ, ۇقك تاراپىنان كورەسىنى كوردىم! پروكۋراتۋرا ارقىلى قىلمىستىق ءىس قوزعاتىپ, ءبىراز ۋاقىت سەرگەلدەڭگە دە سالدى! ايتەۋىر, دەرەكتەردى قىلدان ماي سۋىرعانداي تىرنەكتەپ جيناي ءجۇرىپ, جازىپ ءبىتىردىم-اۋ. كىتاپتا بۇل تۋرالى كەڭىنەن ايتىلادى دەپ جازدى قايىم-مۇنار تابەەۆ ءوزىنىڭ الەۋمەتتىك جەلىدەگى پاراقشاسىندا.
