استانا قالالىق ءماسليحاتىنىڭ دەپۋتاتتارى ەلوردامىزداعى جىلۋ ەلەكتر ورتالىقتارىن ارالادى. قالامىزدىڭ قىسقى ماۋسىمعا دايىندىق بارىسىن قاداعالاۋ ماقساتىندا دەپۋتاتتار №2 جانە جاڭادان سالىنىپ جاتقان №3 جەو قۇرىلىس جۇمىستارىمەن تانىستى.
دەپۋتاتتاردى «استاناەنەرگوسەرۆيس» اق باسقارما توراعاسى ەركەعالي ەسەنجولوۆ كۇتىپ الىپ, جىلۋ ماۋسىمىنا دايىندىق جۇمىستارى مەن جەو-2 اۋماعىنداعى جاڭادان پايدالانۋعا بەرىلگەن №7 قازاندىق اگرەگاتىن كورسەتتى. «ەلوردانىڭ جىلۋ ورتالىقتارى قىسقا دايىن دەۋگە بولادى. بۇگىنگە دەيىن دايىندىق جۇمىستارى 85 پايىزعا ورىندالدى. ماماندار قىزۋ جۇمىس جۇرگىزىپ جاتىر» دەيدى ەركەعالي ەسەنجولوۆ.
بۇگىنگى تاڭدا تۇراقتى تۇردە جۇمىس ىستەپ تۇرعان ءبىرىنشى جانە ەكىنشى جىلۋ ەلەكتر ورتالىقتارى (جەو) استانا قالاسىنىڭ سۇرانىسىن تولىقتاي وتەپ وتىر. دەگەنمەن, ءوندىرىس ورىندارى مەن تۇرعىن ءۇي اۋماعىنىڭ كەڭەيۋىنە بايلانىستى قالانىڭ سول جاق بولىگىنە جىلۋ جەتكىزۋ ماسەلەسى تۋىنداپ وتىرعانىن ايتۋ كەرەك. وسى ماقساتتا جالپى قۋاتى 480 گكال/س بولاتىن 3-جەو سالىنىپ جاتىر. قۇرىلىس جۇمىستارى 2010 جىلى باستالعان. بيىل جىل سوڭىنا دەيىن تەحنيكالىق بازاسى تولىقتاي اياقتالادى. مامانداردىڭ ايتۋىنشا, قازىرگى ۋاقىتتا جۇمىستىڭ 98 پايىزى ورىندالعان. تەك تەحنيكالىق سۋ, كارىز جۇيەسى عانا اياققا تۇساۋ سالىپ وتىر. ءبارى ويداعىداي بولسا, كەلەسى جىلى جىلۋ بەرە باستاۋى ءتيىس.
«№ 3 جىلۋ ورتالىعى وتە ءۇلكەن جوبا. باستان-اياق جاڭا تەحنولوگيا بويىنشا سالىنىپ جاتىر. ءتۇتىن مۇرجالارى تولىقتاي ەلەكترلى سۇزگىمەن جابدىقتالعان. بۇل سۇزگىلەر اۋاعا بولىنەتىن زياندى زاتتاردىڭ كولەمىن بىردەن ازايتادى. سۇزىلگەن قالدىقتار سول بويدا جول جوندەۋ جۇمىستارى مەن رەزەڭكە جاساۋ ءوندىرىسىنە جىبەرىلەدى. بۇل – تمد كولەمىندە ءالى ەنگىزىمەگەن تەحنولوگيا. العاشقى بولىپ استانالىق جىلۋ جۇيەسى پايدالانىپ وتىر. تاجىريبە رەتىندە جەو-2 اۋماعىنداعى جاڭادان پايدالانۋعا بەرىلگەن №7 قازاندىق اگرەگاتىنا پايدالانىپ كورىپ جاتىرمىز. ناتيجە جامان ەمەس – قالدىقتاردى ءسۇزۋ كورسەتكىشى 96 پايىز بولىپ وتىر» دەيدى ەركەعالي ەسەنجولوۆ.
بۇركىت نۇراسىل
