وسى مامىر ايىندا ەلوردادا مەملەكەتتىك رامىزدەردىڭ تىگىلۋ جانە ورنالاستىرۋ ءتارتىبى, مەملەكەتتىك مەكەمەلەر مەن كاسىپكەرلىك نىساندار ماڭدايشاسىنداعى مەملەكەتتىك تۋ مەن ەلتاڭبانىڭ جاي-كۇيى تەكسەرىلدى. كەشە استانا قالاسى اكىمدىگى جانىنداعى مەملەكەتتىك رامىزدەر جونىندەگى كوميسسيا وتىرىسىندا اتالمىش تەكسەرىستىڭ قورىتىندىلارى جاريا ەتىلدى. وتىرىستى كوميسسيا توراعاسى, استانا اكىمىنىڭ ورىنباسارى ەرمەك امانشاەۆ اشىپ, جۇرگىزىپ وتىردى.
كۇن تارتىبىندەگى ماسەلە بويىنشا قالالىق ىشكى ساياسات باسقارماسىنىڭ باسشىسى ەرلان قاناليموۆ بايانداما جاسادى. ول تەكسەرىستىڭ ناتيجەسىندە مەملەكەتتىك رامىزدەرگە قاتىستى انىقتالعان كەمشىلىكتەردى جانە بۇل ولقىلىقتارعا جول بەرگەن بىرقاتار مەكەمەلەر مەن كاسىپكەرلىك نىسانداردى ءتىزىپ شىقتى. رامىزدەرگە سالعىرت قاراعانداردىڭ قاتارىندا قر اۋىل شارۋاشىلىعى مينيسترلىگى, قر پرەزيدەنتى جانىنداعى مەملەكەتتىك باسقارۋ اكادەمياسى, استانا قالاسى مەملەكەتتىك كىرىستەر دەپارتامەنتى, قالالىق قازىناشىلىق دەپارتامەنتى, استانا قالاسى ادىلەت دەپارتامەنتى مەن الماتى اۋدانىنىڭ ادىلەت باسقارماسى, س. سەيفۋللين اتىنداعى قازاق اگروتەحنيكالىق ۋنيۆەرسيتەتى, استانا قالاسى تۇتىنۋشىلاردىڭ قۇقىعىن قورعاۋ دەپارتامەنتى, جىلجىمايتىن مۇلىك ورتالىعىنىڭ استانا قالالىق فيليالى, «رامادا پلازا استانا», «اق بۇلاق», «رەديسسون استانا», «اققۋ», «پارك ينن», «مارريوت» قوناق ۇيلەرى اتالدى.
سونىڭ ىشىندە مەملەكەتتىك تۋ ءتۇسىنىڭ وڭۋى مەن جىرتىلۋى جانە تۇعىرىنا ورالىپ قالۋى نەمەسە قارالى كۇندەردەگىدەي تومەن ءتۇسىرىلۋى, تىگىلۋ جانە ورنالاستىرۋ تارتىبىنە سايكەس كەلمەۋى سىندى كەمشىلىكتەر انىقتالدى. استانا قالاسى ينۆەستيتسيالار جانە دامۋ باسقارماسى مەن ورتالىقتاندىرىلعان كىتاپحانالار جۇيەسى ماڭدايشاسىنا مەملەكەتتىك رامىزدەردى مۇلدە ىلمەپتى.
– «مەملەكەتتىك رامىزدەر تۋرالى» قر زاڭىن بۇزۋ فاكتىلەرى انىقتالعان جاعدايدا جەرگىلىكتى بيلىك ورگاندارى ارەكەتىنىڭ الگوريتمىن جاسادىق. بۇل الگوريتمدى تالقىلاپ, ماقۇلداۋدى سۇرايمىن. سونداي-اق, قالالىق ىشكى ساياسات باسقارماسى اتالعان زاڭعا ەنگەن وزگەرىستەردى ەسەپكە الىپ, قالا پروكۋراتۋراسى, قالالىق ءىىد جانە تەحنيكالىق رەتتەۋ جانە مەترولوگيا كوميتەتىنىڭ قالالىق دەپارتامەنتىمەن بىرلەسىپ, رامىزدەرگە قاتىستى زاڭدىلىقتىڭ ساقتالۋىن تەكسەرۋ كەستەسىن ازىرلەدى. بۇل كەستە ماقۇلدانعان سوڭ, جۇمىسقا كىرىسۋگە ءازىرمىز, – دەدى ە. قاناليموۆ.
الدا مەملەكەتتىك رامىزدەر كۇنى مەرەكەسى كەلە جاتىر. مەملەكەتتىك تۋ مەن ەلتاڭبانىڭ ەل ومىرىندەگى, اسىرەسە, بيىل قازاقستان رەسپۋبليكاسى تاۋەلسىزدىگىنىڭ 25 جىلدىعى تويلاناتىن كەزەڭدە اتقاراتىن ۇلكەن رولىنە توقتالعان ەرمەك امانشاەۆ ەلورداداعى بارلىق مەكەمەلەر مەن كاسىپكەرلىك نىسانداردى تەكسەرىپ شىعۋ كەرەكتىگىنە نازار اۋداردى.
– استانا قالاسى ىشكى ساياسات باسقارماسى مەن قالالىق ىشكى ىستەر دەپارتامەنتى, اۋداندىق اكىمدىكتەر, تەحنيكالىق رەتتەۋ جانە مەترولوگيا كوميتەتىنىڭ قالالىق دەپارتامەنتىمەن بىرلەسىپ, انىقتالعان كەمشىلىكتەردى جويۋ بويىنشا جۇمىستاردى قولعا السىن. اتقارىلعان شارالار تۋرالى 1 ماۋسىمعا دەيىن حابارلانسىن, – دەگەن استانا اكىمىنىڭ ورىنباسارى ءتيىستى ورگاندارعا وزگە دە ماڭىزدى تاپسىرمالاردى بەردى.
وتىرىس سوڭىندا استانا قالاسى تىلدەردى دامىتۋ باسقارماسىنىڭ باسشىسى تىلەۋعالي قىشقاشباەۆ پەن قالالىق دەنساۋلىق ساقتاۋ باسقارماسىنىڭ باسشىسى ەرىك ءبايجۇنىسوۆ ءوز ۇسىنىستارىن ەنگىزدى.
كوميسسيانىڭ كەلەسى وتىرىسى ماۋسىم ايىنىڭ سوڭىنا بەلگىلەندى.
امانعالي قالجانوۆ
