ەلوردانىڭ «ستۋدەنتتەر» ساياباعىندا استانا قالاسى اكىمدىگىنىڭ جانە جاستار ساياساتى ماسەلەلەرى باسقارماسىنىڭ قولداۋىمەن پاتريوتتىق ءىس-شارا ءوتتى. قر مەملەكەتتىك رامىزدەرىنىڭ 25 جىلدىعىنا ارنالعان سالتاناتتى شاراعا حالىق قالاۋلىلارى, قوعام قايراتكەرلەرى مەن جاستار قاتىستى.
1992 جىلدىڭ 4 ماۋسىمى – ەل تاريحىنداعى ايتۋلى داتا. بۇل كۇن جىل سايىن مەملەكەتتىك رامىزدەردىڭ تۋعان كۇنى رەتىندە تويلانادى.
«پاتريوتتىق شارانى ۇيىمداستىرۋ – ءبىز ءۇشىن ۇلكەن قۇرمەت. رامىزدەر – ۇلتىمىزدىڭ, ەلىمىزدىڭ بەينەسى. ونى قورعاپ, قۇرمەتتەۋ – بۇگىنگى جاستاردىڭ اسقاق پارىزى» دەيدى استانا قالاسى جاستار ءماسليحاتىنىڭ دەپۋتاتى دانا كوبەنوۆا. ونىڭ ايتۋىنشا, شارا كەزىندە 200-گە جۋىق ادامنىڭ قاتىسۋىمەن ارنايى ساۋالناما ۇيىمداستىرىلعان. وندا ءاربىر ازاماتتىڭ مەملەكەتتىك رامىزدەردى قانشالىقتى بىلەتىندىگىنە نازار اۋدارىلدى. ناتيجەسىندە جاستاردىڭ 85 پايىزى وڭ بىلىمدەرىن كورسەتكەن.
پاتريوتتىق ءىس-شارا سوڭىندا الماس كىشكەنباەۆ, رينات مالتساگوۆ, اعايىندى جۇگىنىسوۆتەر اسەم اننەن شاشۋ شاشتى. ال اۆتوشەرۋگە قاتىسۋشىلار «ستۋدەنتتەر» ساياباعىنان باستاپ ەسىلدىڭ سول جاعالاۋىنا دەيىن ءجۇرىپ ءوتتى.
