الەم چەمپيوناتىندا قازىلىق جاسايتىن اربيترلاردىڭ اراسىندا وزبەكستاندىق راۆشان يرماتوۆ ەرەكشە ناتيجەنىڭ اۆتورى بولىپ تابىلادى. ول مۋنديالدىڭ فينالدىق بولىگىندە 9 رەت باس تورەشى رەتىندە قىزمەت ەتكەن ەكەن. بۇل – ءتۋرنيردىڭ رەكوردى. بۇعان دەيىن چەمپيوناتتا وسىنشاما رەت الاڭ ورتاسىندا جۇرگەن رەفەري بولعان ەمەس.
ر.يرماتوۆ ءوزىنىڭ دەبيۋتىن 2010 جىلى وڭتۇستىك افريكا رەسپۋبليكاسىندا وتكەن جاھاندىق جارىستىڭ وسى ەلدىڭ قۇراماسى مەن مەكسيكا اراسىندا وتكەن ءبىرىنشى ويىنىندا باستاعان. بۇدان كەيىن تاعى 4 ويىننىڭ تىزگىنىن قولعا ۇستاعان. سولاردىڭ قاتارىندا نيدەرلاند – ۋرۋگۆاي كوماندالارى ۇشىراسقان جارتىلاي فينالدىق ماتچ تا بار. ال 2014 جىلى برازيليادا جالاۋ جەلبىرەتكەن وزبەك مامانى تاعى 4 كەزدەسۋدى باسقاردى. ءسويتىپ, ول بۇعان دەيىن 8 ويىنعا قازىلىق ەتكەن جوەل كينيۋ (فرانتسيا), بەنيتو ارچۋنديا (مەكسيكا) جانە حورحە لارريوندا (ۋرۋگۆاي) دەگەن ءۇش بىردەي تورەشىنى ارتتا قالدىردى.
راۆشان يرماتوۆ 2003 جىلى FIFA اربيترى اتاندى. سودان بەرى ول ۇدايى وسۋمەن كەلەدى. وزبەك رەفەريى ازيا چەمپيوندار ليگاسىنىڭ 4 فينالدىق ماتچىنا, فيفا-نىڭ كلۋبتار الەم چەمپيوناتىنىڭ 2 فينالدىق ويىنىنا, ازيا كۋبوگى فينالىنا قازىلىق جاسادى.
ەندى راۆشانعا رەسەيدەگى الەم چەمپيوناتىندا ءوز رەكوردىن جاڭارتۋعا مۇمكىندىك تۋىپ وتىر.
