س توبى: فرانتسيا. اۆستراليا. پەرۋ. دانيا
مۇنداعى قۇرامالاردىڭ فيفا رەيتينگىسىندەگى ورىندارىنىڭ ورتاشا كورسەتكىشى جەتى توپتان دا جوعارى بولىپ شىقتى. ولاردىڭ ءبارى جابىلىپ العان ورىنداردىڭ ورتاق سانىن ءتورت بولگەندە, 18 دەگەن تسيفر شىعىپ تۇر. دەگەنمەن, كوماندالارىنىڭ كۇشى شامالاس بۇل شوعىردىڭ دا ءوز ۇزدىگى بار. ول – فرانتسيا. البەتتە, انتۋان گريزمانن مەن پاۋل پوگبا باستاعان جاساقتىڭ تىم بولماعاندا توپتان شىعا الاتىنىنا ەشكىم كۇماندانىپ وتىرعان جوق. ال ەكىنشى ورىن ءۇشىن تالاستىڭ قاتتى قىزاتىن ءتۇرى بار.
فرانتسيا قۇراماسى
ەۋروپا چەمپيوناتىنىڭ 2016 جىلعى فينالىنا شىققان تەرمە كوماندا مۋنديالدىڭ فينالدىق تۋرنيرىنە سوڭعى ساتتە شۆەتسيا مەن نيدەرلاندتى ارتتا قالدىرىپ, ازەر ءىلىندى. ىرىكتەۋ جارىسىندا بىرنەشە كەرەمەت جەڭىسكە جەتكەن فرانتسۋز قۇراماسى ءوز الاڭىندا كۇتپەگەن جەردەن ليۋكسەمبۋرگپەن تەڭ ءتۇسىپ قالىپ, جاعدايىن كۇرت ناشارلاتىپ الدى. بىراق اقىرى قايىرلى بولدى.
«ۇشتۇستىلەر» وسى جولى الەم چەمپيوناتىنا 15-ءشى رەت قاتىسادى. ولار 1998 جىلى فرانتسيادا وتكەن الەم چەمپيوناتىندا توپ جارىپ, 2006 جىلى – كۇمىس, 1958, 1986 جىلدارى قولا جۇلدەگەر اتانعان بولاتىن. بۇدان بولەك, ەكى رەت كونفەدەراتسيا كۋبوگىندا (2001, 2003), ءبىر رەت (1984) وليمپيالىق ويىنداردا التىننان القا تاققان ەدى.
اۆستراليا قۇراماسى
قۇرلىق-مەملەكەتتىڭ قۇراماسى بۇل باسەكەگە جەتۋ ءۇشىن ىرىكتەۋ ءتۋرنيرى مارافونىنىڭ ەڭ ۇزاق جولىنان ءوتىپ, 22 رەت الاڭعا شىقتى. كوماندا ىرىكتەۋ توبىندا جاپونيا مەن ساۋد ارابياسىنان كەيىنگى ءۇشىنشى ورىن الىپ, ەكى راۋندتىق پلەي-وففقا قاتىستى. سوندا اۋەلى سيريانى ۇتسا (1:1, 2:1), سوسىن گوندۋراستى جولدان شىعارىپ تاستادى – 0:0, 3:0.
«جاسىل قۇرلىق» جاساعى ەندى ءوزىنىڭ بەسىنشى چەمپيوناتىنا دايىندالىپ جاتىر. كوماندا ءتورت دۇركىن (1980, 1986, 2000, 2004) وكەانيا كۋبوگىنىڭ يەگەرى اتاندى, ءبىر رەت (2015) ازيا كۋبوگىن جەڭىپ الدى. ول – ەكى كونفەدەراتسيانىڭ بىردەي باس بايگەسىن العان الەمدەگى جالعىز قۇراما.
پەرۋ قۇراماسى
پەرۋ جاساعى چەمپيوناتقا وڭتۇستىك امەريكاداعى ىرىكتەۋ توبىنان شىعا الماي, قۇرلىق ارالىق ماتچتا جاڭا زەلانديانى ۇتىپ (0:0, 2:0) بارىپ كەلدى. وسىمەن بەسىنشى ساپار جاھاندىق دوپ دوداسىنا كەلگەلى تۇرعان پەرۋلىكتەر بۇعان 36 جىلعى ۇزىلىستەن كەيىن قول جەتكىزىپ وتىر.
كوماندا ەكى رەت (1939, 1975) امەريكا كۋبوگىن ۇتقان.
دانيا قۇراماسى
دانيالىقتار ىرىكتەۋ تۋرنيرىندە الدىنا پولياكتاردى سالىپ, توپتا ەكىنشى ورىن العان ەدى. ال قايتپا-قايت ماتچىندا يرلاندتارمەن كەزدەستى. داتتار ءوز الاڭىندا تەڭ (0:0) ويناپ, قارسىلاستار الاڭىندا 5:1 ەسەبىمەن جەڭىسكە جەتتى. وسى ويىندا كريستيان ەريكسەن حەت-تريك جاسادى.
الداعى چەمپيونات دانيا ءۇشىن بەسىنشى بەلەس بولادى. ول 1992 جىلى ەۋروپانىڭ چەمپيونى اتانسا, 1995 جىلى كونفەدەراتسيا كۋبوگىن ۇتىپ العان ەدى.
ءبىر قىزىعى, داتتار 1992 جىلى قۇرلىق چەمپيونى اتانعاندا, ىرىكتەۋ توبىنان شىعا الماعان-تىن. سوسىن ساياسي سەبەپتەرمەن يۋگوسلاۆيا بىرىنشىلىككە جىبەرىلمەي قالدى. ونىڭ ورنىنا دانيا قويىلدى. مۇنىڭ سوڭى دات ەلى كومانداسىنىڭ توپتى جارىپ شىعۋىمەن اياقتالدى.
