كەشە «الاۋ» مۇز ايدىنى سارايىندا ۇستەل تەننيسىنەن مۇمكىندىگى شەكتەۋلى جانداردىڭ اراسىندا رەسپۋبليكالىق چەمپيونات باستالدى. بايراقتى باسەكەگە ەلىمىزدىڭ ءار وڭىرىنەن كەلگەن 100-دەن استام ازامات قاتىسىپ جاتىر.
سپورتتىق ءىس-شارانى قايىرىمدىلىقپەن اينالىساتىن «سپەشيال وليمپيكس قازاقستان» قوعامدىق بىرلەستىگى ۇيىمداستىردى. اتالعان قوعامدىق بىرلەستىكتىڭ باس ديرەكتورى ولگا باحارەۆا شارانىڭ باستى ماقساتى مۇمكىندىگى شەكتەۋلى ادامدارعا كومەك كورسەتۋ ەكەنىن ايتادى.
– وكىنىشكە قاراي, ءبىزدىڭ قوعامدا مۇمكىندىگى شەكتەۋلى ازاماتتاردى شەتتەتىپ جاتاتىن وقيعالار كەزدەسىپ جاتادى. بۇل, ارينە, اتالعان ادامدارعا وتە اۋىر اسەر ەتەدى. سوندىقتان دا ءبىز ولاردى قوعامنىڭ تولىققاندى مۇشەسى رەتىندە سەزىندىرۋ ءۇشىن سپورتتىق ءىس-شارالاردى ءجيى وتكىزىپ تۇرامىز. ماسەلەن, ءبىزدىڭ ۇيىم وليمپيادالىق سپورت تۇرلەرىنەن ءارتۇرلى جارىستاردى جىل سايىن ۇيىمداستىرىپ وتىرادى. وسىنىڭ ارقاسىندا مۇمكىندىگى شەكتەۋلى ازاماتتار دەنەسىن شىنىقتىرىپ ءارى قۋانىپ جاتادى, – دەدى ول.
ولگا باحارەۆانىڭ ايتۋىنشا, سپورت مۇمكىندىگى شەكتەۋلى ازاماتتاردىڭ الەۋمەتتىك جانە رۋحاني دامۋىنا ايتارلىقتاي ۇلەس قوسادى. سول سەبەپتى ولار بايراقتى باسەكەدە ەرەكشە بەلسەندىلىك تانىتادى. جارىس جەڭىمپازدارى بۇگىن انىقتالادى.
سەرىك جولداسباي
