پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا ەلدەگى سانيتارلىق-ەپيدەميولوگيالىق احۋال قارالدى. دەنساۋلىق ساقتاۋ ءمينيسترى الەكسەي تسوي سانيتارلىق-ەپيدەميولوگيالىق جاعداي تۇراقتالعانىن ءمالىم ەتتى.
ۆيرۋستىڭ رەپرودۋكتيۆتى يندەكسى 0,90 قۇرايدى. ينفەكتسيالىق توسەكتەر – 30%, رەانيماتسيالىق توسەكتەر 26% تولى.
بۇگىنگى تاڭدا شامامەن 8,5 ملن ادام ۆاكتسينانىڭ ءبىرىنشى كومپونەنتىن, 7,7 ملن-نان استام ادام ەكىنشى كومپونەنتىن الدى. ەۋروپانىڭ بىرقاتار ەلىندە, سونداي-اق قازاقستانمەن شەكارالاس مەملەكەتتەردە سىرقاتتانۋشىلىقتىڭ ءوسۋىن ەسكەرە وتىرىپ, ۇكىمەت باسشىسى سانيتارلىق تالاپتار شارالارىنىڭ جاپپاي ساقتالۋىن قامتاماسىز ەتۋدى, مونيتورينگتىك توپتاردىڭ تالاپتاردىڭ ساقتالۋىن باقىلاۋ جونىندەگى جۇمىسىنىڭ تيىمدىلىگىن كۇشەيتۋدى جانە ەرەجە بۇزۋشىلارعا قاتاڭ شارالار قابىلداۋدى تاپسىردى.
«22 قاراشادان باستاپ بۇعان دەيىن ەكپە العان ازاماتتاردى رەۆاكتسيناتسيالاۋ باستالادى. وسىعان بايلانىستى ەگۋ پۋنكتتەرىنىڭ, مەديتسينالىق ۇيىمداردىڭ جانە مەديتسينا قىزمەتكەرلەرىنىڭ دايىندىعىن قامتاماسىز ەتۋ قاجەت» دەدى ا.مامين.
«رەۆاكتسيناتسيا مەرزىمى COVID-19 ۆاكتسيناسىنىڭ ەكى دوزاسىن العان ساتتەن باستاپ 6 ايدان 9 ايعا دەيىن وزگەرەدى. دارىگەرلەر سونىمەن قاتار كروسس-ۆاكتسيناتسيانى, باسقاشا ايتقاندا, ۆاكتسينانىڭ باسقا ءتۇرىن ەگۋدى ۇسىنادى. «سپۋتنيك V» العاننان كەيىن رەۆاكتسيناتسيانى 9 ايدان كەيىن جۇرگىزۋ كەرەك, ويتكەنى بۇل – ۆەكتورلىق, كۇشەيتىلگەن ۆاكتسينا. وتاندىق «QazVac» پەن قىتايلىق «Vero Cell» – 6 ايدان سوڭ» دەپ ناقتىلادى №5 قالالىق ەمحانانىڭ ءبولىم مەڭگەرۋشىسى گۇلنار سىزدىقوۆا.
