كەشە ساراتوۆ وبلىسىنىڭ استاناداعى كۇندەرى اياسىندا ەلوردادا ساراتوۆتىق «رۋبەج» كومپانيالار توبى فيليالىنىڭ اشىلۋ سالتاناتى ءوتتى.
راسىمدە الدىمەن ءسوز العان ساراتوۆ وبلىسىنىڭ گۋبەرناتورى ۆالەري راداەۆ رەسەي مەن قازاقستان بيزنەسى اراقاتىناسىنداعى دامۋدىڭ جاڭا كەزەڭى باستاۋ العانىن اتاپ ءوتتى. «بۇگىن ەكى ەل اشىپ جاتقان بيزنەستىڭ باعىتى وزگەشە – ادامدار ءومىرىنىڭ قاۋىپسىزدىگى مەن مۇلىكتىڭ ساقتالۋىنا كەپىلدىك بەرەدى. قازاقستان مەن ءبىزدىڭ ءوڭىر بارلىق دەڭگەيدە تىعىز قارىم-قاتىناستا. ساراتوۆ وبلىسىندا 80 مىڭنان استام قازاق تۇرادى. شەكارالاس جاتقان قازاقستان ايماقتارى مەن ەلدەرىڭىزدىڭ ورتالىعىنداعى وڭىرلەردەن ساراتوۆتىڭ جوعارى وقۋ ورىندارىنا ءبىلىم الۋعا كەلەتىن ستۋدەنتتەردى ەسەپكە الساق, بۇل سانعا تاعى بىرنەشە مىڭدى قوسۋعا بولادى. ءار جىل سايىن ساۋداداعى بايلانىستارىمىز نىعايىپ كەلەدى. اسىرەسە, قازىرگى زامانعا ساي يننوۆاتسيالىق ونەركاسىپ, اقپاراتتىق جانە نانوتەحنولوگيالار سالالارىندا. بۇل فاكت قۋانتپاي قويمايدى» دەگەن ول «رۋبەج» كومپانياسىن دا تانىستىرۋدى ۇمىتپادى.
اتالمىش فيرما ءوز ونىمدەرىن ازىرلەۋ مەن ىسكە قوسۋدا ەشكىمنىڭ كومەگىنە جۇگىنبەيدى ەكەن. ياعني, بارلىق جۇمىستاردى وزدەرى اتقارادى. كومپانيا جيىرما بەس جىلدان استام ۋاقىت كەز كەلگەن نىساندى باقىلاۋعا الىپ, ادامدار ءومىرىنىڭ قاۋىپسىزدىگىن قامتاماسىز ەتىپ كەلەدى. ونىڭ جارتىلاي نەمەسە تولىقتاي اۆتوماتتاندىرىلعان جۇيەسى تۇتانعان ءورتتىڭ ءارى قاراي ورشۋىنە جول بەرمەيتىن كورىنەدى. ساراتوۆتاعى بالاحوۆ اتوم ەلەكتر ستانساسىنىڭ جۇمىسىن قاداعالايتىن كومپانيانىڭ استانادا ينجەنەرلىك ورتالىعى اشىلىپ وتىر.
ءوز كەزەگىندە استانا قالاسى اكىمىنىڭ ورىنباسارى ۆاسيلي كرىلوۆ اشىلعان ورتالىق ەلوردالىقتار ءومىرىن ودان ءارى قاۋىپسىز قىلاتىنىنا سەنىمىن ءبىلدىردى. بۇل باعىتتا استانالىق بيلىكتىڭ دە قول قۋسىرىپ وتىرماعانىن, ءورتتى باستاپقى كەزەڭدە انىقتايتىن سىمسىز جۇيەنى ىسكە اسىرۋ جۇرگىزىلىپ جاتقانىن, بۇل جۇيەگە بۇگىنگى كۇندە 140-تان استام ءبىلىم بەرۋ, دەنساۋلىق ساقتاۋ جانە مادەني نىساندارى قوسىلعانىن جەتكىزدى. قالا تىرشىلىگىن قامتاماسىز ەتەتىن كەشەندى جۇيە بويىنشا اتقارىلعان جۇمىستى تىلىنە تيەك ەتىپ, بۇل تولىعىمەن ىسكە قوسىلعاندا, زامانعا ساي جۇيە استانالىقتار ومىرىنە قاۋىپ تۋىنداعان جاعدايلاردا جەدەل سونى انىقتايتىنىن ايتتى.
«رۋبەج» كومپانيالار توبىنىڭ ۆيتسە-پرەزيدەنتى رۋسلان ساپارعاليەۆ قازاقستان, رەسەي, بەلورۋس ەلدەرى اراسىنداعى ەۋرازيالىق ەكونوميكالىق وداقتىڭ قۇرىلۋى استانادا ورتالىقتىڭ اشىلۋىنا سەرپىن بەرگەنىن اتاپ ءوتتى. كومپانيانىڭ جۇمىسى جايلى: «باستى ميسسيامىز – ادامداردىڭ ءومىرىن ساقتاۋ. ءبىز حالىقتىڭ قاۋىپسىزدىگى ءۇشىن – ورتكە قارسى جابدىقتاردى, بەينەباقىلاۋ, حابارلاۋ جۇيەلەرىن شىعارۋمەن اينالىسامىز. كونسترۋكتورلىق-ازىرلەۋ ورتالىعىمىز, جوبالاۋ ينستيتۋتىمىز, رەسەيدىڭ 50-دەن استام قالالارىندا ساۋدا ۇيلەرىمىز بار. ءوز ونىمدەرىمىزدى جاقىن جانە الىس 15 شەتەل ەلدەرىنە جەتكىزەمىز. قازاقستان بۇگىندەرى باستى جانە ستراتەگيالىق ارىپتەسىمىزگە اينالىپ وتىر» دەدى.
«رۋبەج» فيليالى «وركەن» بيزنەس ورتالىعىندا ورنالاسقان. سول نىساننىڭ الدىندا كومپانيا تۋىن كوتەرۋ راسىمىنەن كەيىن ر. ساپارعاليەۆ كەڭسەلەرىن ارالاتىپ, قۇرال-جابدىقتارمەن تانىستىردى.
امانعالي شميتۇلى
