ەلوردادا «رۋحاني جاڭعىرۋ» باعدارلاماسى اياسىندا «قازاقستاننىڭ مادەني مۇراسى الەمىنە ساياحات» اتتى جاڭا جوبا قولعا الىندى.
جاڭا جوبا قازاقتىڭ مادەني مۇراسىن ساقتاپ, ناسيحاتتاۋعا باعىتتالعان. «بۇگىنگى شارا «رۋحاني جاڭعىرۋ» باعدارلاماسى اياسىندا جۇزەگە اسىپ جاتىر. وسى باعدارلاما اياسىندا قانشاما اسىل مۇرالارىمىز تانىلىپ تا, تابىلىپ تا ءجۇر. قازاق مادەنيەتى عاسىرلار بويى ۇرپاقتار اراسىنداعى ساباقتاستىقتى جالعاستىرىپ كەلەدى. 30 جىلعا جۋىق تاۋەلسىزدىك تاريحىمىزدا دا ۇلتتىق قۇندىلىقتارىمىز از دارىپتەلىپ جۇرگەن جوق. جوبانىڭ كوزدەگەنى – جاس ۇرپاققا ءتول مادەنيەتىمىزدى تانىستىرا وتىرىپ, ولاردىڭ ساناسىنا رۋحاني جاڭعىرۋ كودىن ءسىڭىرۋ. جانە الەمگە قازاقستاندىق مادەنيەتتى جاڭا تۇرپاتتا تانىستىرۋ. جوبا اياسىنداعى شارالاردىڭ العاشقىسى – بۇگىنگى تۇساۋكەسەر. ودان ءارى جوسپارعا ءتۇرلى باعىتتاعى تاريحي-مادەني ءىس-شارالار ۇيىمداستىرىلادى» دەدى قر تۇڭعىش پرەزيدەنتى كىتاپحاناسى ديرەكتورىنىڭ ورىنباسارى بوتاگوز قايىپوۆا. ونىڭ ايتۋىنشا, جوبا 1 جىلعا ارنالعان. جوبا جەتەكشىلەرى ونى تاۋەلسىزدىكتىڭ 30 جىلدىعىنا دەيىن جالعاستىرۋدى ويىمىزدا بار». بەلگىلى بولعانداي, جوبا اياسىندا ەلوردالىق وقۋشىلار تاريحي-مادەني ورىندارمەن تانىسىپ, عىلىمي زەرتتەۋلەر جۇرگىزەدى. «وقۋشىلارعا ارنالعان بۇل شارانىڭ باستى ماقساتى – وقۋشىلاردى تاريحي جادىگەرلەر مەن ەسكەرتكىشتەر تۋرالى تەرەڭ تانىپ ءبىلۋ مەن ونى قۇرمەتتەۋ. سونداي-اق ەل وڭىرلەرىنىڭ مادەنيەتىمەن تانىسا وتىرىپ, وقۋ-تانىمدىق باعدارلامالاردى ازىرلەۋ. جوبا 2019-2020 وقۋ جىلىنا ارنالعان. ءبىر جىل بويى وقۋشىلاردىڭ قاتىسۋىمەن ءتۇرلى باعىتتاعى شارالار ۇيىمداستىرىلادى. ونىڭ ىشىندە, تانىمال تۇلعالارمەن كەزدەسۋ, ادەبي كەش, ءتۇرلى بايقاۋ جانە عىلىمي جوبالار جازۋ. سونىمەن قاتار, كورمەلەر مەن اشىق ساباقتار وتەدى. جوبانى ءبىلىم باسقارماسىنىڭ باستاماسىمەن قالاداعى 5 مەكتەپ بىرىگىپ جۇزەگە اسىراتىن بولامىز» دەدى قالالىق №15 مەكتەپ-ليتسەيى ديرەكتورىنىڭ تاربيە ءىسى جونىندەگى ورىنباسارى عاليا وماشەۆا. ايتا كەتەيىك, «قازاقستاننىڭ مادەني مۇراسى الەمىنە ساياحات» اتتى جوباعا قالانىڭ №15, 18, 19, 21, 35 مەكتەپ ۇجىمى مەن وقۋشىلارى قاتىسىپ جاتىر.
