ساحا تەاترى – استانا ساحناسىندا
24-25 قازان كۇندەرى استانادا «ساحا تەاترىنىڭ اڭىزدارى» باعدارلاماسىنىڭ اياسىندا پ.ا.ويۋنسكي اتىنداعى ساحا اكادەميالىق تەاترىنىڭ گاسترولدەرى وتەدى. ياكۋتيانىڭ ۇلتتىق تەاترىنىڭ 110 جىلدىعىنا وراي تمد ەلدەرىن ارالاپ جۇرگەن ونەر ۇجىمى ەلوردانىڭ جاستار تەاترىنىڭ تورىندە ياكۋتيا ادەبيەتىنىڭ نەگىزىن سالۋشىلاردىڭ ءبىرى الەكسەي كۋلاكوۆسكيدىڭ «شاماننىڭ ءتۇسى» جانە سيۋزاننا وورجاكتىڭ «بەرناردا البانىڭ ءۇيى» سپەكتاكلدەرىن قويادى.
رەجيسسەر رۋسلان تاراحوۆسكي قويعان العاشقى سپەكتاكل فيلوسوفيالىق ءماتىن, رۋحاني مۋزىكا جانە پلاستيكانىڭ قوسپالارىنان تۇرادى. ونىڭ باس كەيىپكەرى روك مۋزىكانت قازىرگى كۇيبەڭ تىرلىكتە ءوزىن-ءوزى ىزدەپ, ۇلكەن سىناقتاردان وتەدى. اقىرى رۋحاني تازارىپ, حالقىنىڭ باستاپقى بولمىسى مەن تابيعاتىنا, نانىم-سەنىمىنە ورالادى. قويىلىمعا «چولبون» روك توبى قاتىسادى.
«بەرناردا البانىڭ ءۇيى» سپەكتاكلىمەن ونەر ۇجىمى 2007 جىلى «التىن بەتپەردە» اتتى ۇلتتىق تەاتر سىيلىعىنىڭ «ۇزدىك سپەكتاكل», «ۇزدىك رەجيسسەر» اتالىمدارىندا توپ جارىپ, ستەپانيدا بوريسوۆا اتتى باستى ءرولدى سومدايتىن اكتريسا «ۇزدىك ايەل بەينەسى» اتالىمىندا جەڭىمپاز اتانعان.
اتالمىش قويىلىم – اركتيكا مەملەكەتتىك مادەنيەت جانە ونەر ينستيتۋتىن 2006 جىلى اياقتاعان سيۋزاننا وورجاكتىڭ ديپلومدىق جۇمىسى.
وقيعا يسپانيا ەلىندە, بەرناردا ەسىمدى وكتەم ايەلدىڭ وتباسىندا ءوربيدى. ونىڭ بويجەتكەن, تۇرمىسقا شىقپاعان ەكى قىزى بار ەكەن. قويىلىم ولاردىڭ قۇپيالارى مەن ارماندارى تۋرالى سىر شەرتەدى.
امانعالي قالجانوۆ