ءابىلاحات ەسپاەۆ, نۇرعيسا تىلەنديەۆ, ءشامشى قالداياقوۆ, اسەت بەيسەۋوۆ سىندى كومپوزيتورلاردىڭ ءبىرىنىڭ ەسىمى اتالعاندا بىردەن اندەتە جونەلەتىنىمىز بار. ءوزىن اسا ءبىر ونەرپاز سانامايتىن ادامنىڭ ءوزى وسى مۋزىكا مايتالماندارىنىڭ كەم دەگەندە ءبىر ءانىن بىلەدى دەپ ويلايمىز.
25 قازاندا استانا قالاسى اكىمدىگىنىڭ مەملەكەتتىك اكادەميالىق فيلارمونياسى بارشامىزدىڭ سۇيىكتى اندەرىمىزدى انشىلەرمەن بىرگە شىرقاۋعا مۇمكىندىك بەرىپ وتىر. سول كۇنى وسى ۇجىمنىڭ ۇيىمداستىرۋىمەن ساعات 19.00-دە كونگرەسس-حولدا «ۇمىتىلماس اندەر» كونتسەرتى وتەدى.
«ۇستازىم», «مارجان قىز», «قايداسىڭدار, دوستارىم», «قۇستار ءانى», «ءوز ەلىم», «باقىت قۇشاعىندا», «سىر سۇلۋى», «سىرلاسۋ», «شاقىرادى كوكتەم»… جوعارىدا اتتارى اتالعان كومپوزيتورلاردىڭ تاماشا تۋىندىلارىنىڭ ءتىزىمىن وسىلاي سوزا بەرۋگە بولادى. كونتسەرتتە ەلوردالىق فيلارمونيانىڭ جانە قازاقستان ەستراداسىنىڭ بەلگىلى انشىلەرى باعدات سامەدينوۆا, ەستاي مۇقاشەۆ, التىناي جوراباەۆا, نۇرعالي تۇرلىبەكوۆ, بيبىگۇل جانۇزاق, نۇربول بالاپانوۆ, گۇلزيرا بوكەيحان, باۋىرجان نۇرىمبەتوۆ, اينۇر باينۋلدينوۆا, ديحان يلياشەۆ, گۇلميرا جۇمابەكوۆا, ديانا ماي جانە تاعى باسقا ونەرپازدار بارشامىز شىرقايتىن اندەردى جاڭعىرتادى. ولمەيتىن, وشپەيتىن اندەردىڭ كەشىنە كەلىڭىزدەر, اعايىن.
امانعالي قالجانوۆ
