بيىل باريتوندار كورولى, اسا كورنەكتى وپەرا ءانشىسى, كسرو حالىق ءارتىسى ەرمەك سەركەباەۆ 90 جاسقا تولار ەدى. استانادا قازاقتىڭ اتىن الەمگە پاش ەتكەن شەبەر ورىنداۋشىنىڭ قۇرمەتىنە كونتسەرت ۇيىمداستىرىلماق. 1 قاراشا كۇنى «استانا وپەرا» تەاترىنىڭ تورىندە «توبەمدە كوك اسپان» اتتى ەسكە الۋ كەشى وتەدى.
ەرمەك بەكمۇحامەدۇلى جان-جاقتى ناعىز تالانت يەسى بولعان. وپەرا ساحناسىنان بولەك كينو جانە ەسترادانى باعىندىرىپ, ۇستازدىقتى قاتار الىپ ءجۇردى. «تاقيالى پەرىشتە», «مەدەۋدەگى كەزدەسۋ», «ءبىزدىڭ سۇيىكتى دارىگەر» فيلمدەرىنە ءتۇستى. ونىڭ ورىنداۋىنداعى وپەرالىق اريالار مەن اندەر ءالى كۇنگە دەيىن ءوز بيىگىنەن تۇسكەن جوق. قازاق وپەراسىنىڭ دۇلدۇلىنە جاس انشىلەر قاشاندا تەڭەسۋگە تىرىسادى. قازاقتىڭ ءان ونەرىن كەڭىنەن ناسيحاتتاپ, بيىككە كوتەرگەن كورنەكتى ونەر قايراتكەرىنىڭ ەسىمى ەل جادىندا.
كەشتە تەاتردىڭ جەتەكشى سوليستەرى دينا حامزينا, ايگۇل نيازوۆا, جاس ءانشى ماريا مۋدرياك ءوز ونەرىن ۇلى ءارتىستىڭ شىعارماشىلىعىنا ارنايدى. سونداي-اق, تالعات مۇساباەۆ, جانات شىبىقپاەۆ جانە تالعات عالەەۆ باريتوندار شەرۋىن وتكىزەدى. ولار ەرمەك سەركەباەۆتىڭ رەپەرتۋارىنداعى ەڭ تانىمال پارتيالاردى ورىندايدى. اتاپ ايتساق, «سەۆيلدىك شاشتارازداعى» فيگارو كاۆاتيناسىن, «ايسۇلۋ» وپەراسىنان سەركەنىڭ كاۆاتيناسىن, «اباي» وپەراسىنان اباي ارياسىن شىرقايدى.
شاقىرىلعان ارتىستەر قاتارىندا قازاقستاننىڭ ەڭبەك سىڭىرگەن قايراتكەرى, قۇرمەتتى پەداگوگ, باريتون داۋىستى شاحماردان ابىلەۆ پەن وپەرا ءانشىسى ازامات جىلتىرگوزوۆ تە بار. كونتسەرتتە ەرمەك سەركەباەۆتىڭ شاكىرتى بايعالي مومبەكوۆ ونەر كورسەتەدى. كەش قوناعى – بەلارۋس رەسپۋبليكاسىنىڭ ەڭبەك سىڭىرگەن ءارتىسى اناستاسيا موسكۆينا بولماق.
كونتسەرتتىڭ باستالۋى: 19:00-دە.
گۇلدانا تالعاتقىزى
