ساكەن تاعىلىمى

كورنەكتى مەملەكەت قايراتكەرى, اقىن, دراماتۋرگ, جازۋشى, حالىق كومپوزيتورى ساكەن سەيفۋلليننىڭ تۋعان كۇنىنە وراي ەلورداداعى ەسكەرتكىشىنە گۇل شوقتارى قويىلىپ, ساكەن سەيفۋللين مۋزەيى مەن س.سەيفۋللين اتىنداعى №80 مەكتەپ-گيمنازياسى, «استانا دارىنى» ورتالىعى مەكتەپ وقۋشىلارى اراسىندا قالالىق «ساكەن وقۋلارى» بايقاۋىن بىرىگىپ وتكىزدى.
شاراعا بەلگىلى قوعام قايراتكەرى ورالباي ابدىكارىموۆ, اقىن, مەملەكەتتىك سىيلىقتىڭ لاۋرەاتى نەسىپبەك ايتۇلى, باس قالاداعى تۇلعا مۋزەيىنىڭ تۇڭعىش ديرەكتورى روزا اسىلبەكوۆا, ساكەننىڭ ناعاشى قارىنداسى اسىلگۇل ءابىش باستاعان زيالى قاۋىم وكىلدەرى, مۋزەي قىزمەتكەرلەرى قاتىسىپ, ساكەن سەيفۋللين رۋحىنا تاعزىم ەتتى.
ءداستۇرلى قالالىق «ساكەن وقۋلارى» ۇيىمداستىرىلىپ كەلە جاتقانىنا 10 جىلدان استى. بيىلعى بايقاۋ تاۋەلسىزدىكتىڭ 30 جىلدىعى اياسىندا ءوتتى. بايقاۋعا قالامىزداعى ەلۋ ءۇش مەكتەپ قاتىسىپ, جۇزدەن اسا وقۋشى ۇمىتكەر بولدى. ءتورت اتالىم بويىنشا 36 وقۋشى جەڭىس تۇعىرىنان كورىندى.