ورتالىقتاندىرىلعان كىتاپحانالار جۇيەسىنە قاراستى №5 بالالار كىتاپحاناسىندا قازاقستاننىڭ ەڭبەك سىڭىرگەن قايراتكەرى, بەلگىلى ءانشى, ونەرتانۋشى سەرىك وسپانوۆپەن كەزدەسۋ ءوتتى. بۇل شارا داۋىلپاز اقىن, كورنەكتى مەملەكەت جانە قوعام قايراتكەرى ساكەن سەيفۋلليننىڭ 125 جىلدىعىنا ارنالدى.
سەرىك اعامىز دا ساكەن اتامىز تۋعان جاڭاارقادا ومىرگە كەلگەن. بالا كۇنىنەن ايتۋلى اقىندى كوزى كورگەن اۋىلداعى كارىقۇلاق قاريالاردىڭ اڭگىمەسىن تىڭداپ وسكەن ورەن ءوزى دە جاس شاعىنان ونەرگە ىنتىق بولىپ, دومبىرامەن ساكەن اندەرىن ايتىپ, ەلگە تانىلدى.
كەش بارىسىندا سەرىك كارىبايۇلى ساكەن سەيفۋلليننىڭ ءومىرى مەن شىعارماشىلىعى تۋرالى تاعىلىمدى اڭگىمە ءوربىتىپ, اقىننىڭ كوپشىلىك بىلە قويمايتىن قىرلارىن ايتىپ بەردى. قايراتكەردىڭ مۇراسىن ىندەتە زەرتتەي ءجۇرىپ, زايىبى نازگۇل ساپيانوۆامەن بىرگە «ساكەن سەيفۋللين – ۇلت رۋحانياتىنىڭ كوشباسشىسى» اتتى كىتاپ جازىپ, اقىننىڭ 16 جاڭا ءانىن حالقىمەن قايتا قاۋىشتىردى. سونىمەن بىرگە كەش يەسى جينالعاندارعا اتاقتى بالۋان, سازگەر بالۋان شولاق تۋرالى دا تاماشا ەستەلىك ايتتى. ايتپاقشى, بيىل ءانشىنىڭ «بالۋان شولاقتىڭ ءومىرى مەن مۋزىكالىق مۇراسى» اتتى جيناعى جارىق كورگەن.
ءانشى ساكەن مەن بالۋان شولاقتىڭ اندەرىن تامىلجىتىپ ورىنداپ, كوپشىلىكتىڭ كوڭىلىن كوركەم كۇيگە بولەدى. سونداي-اق كەشتە تاريح عىلىمدارىنىڭ كانديداتى, پروفەسسور داۋرەنبەك ەسكەكباەۆ, وسپان سۇلەيمەنوۆ سەكىلدى ازاماتتار سەرىك كارىبايۇلىنىڭ انشىلىگى مەن ونەرتانۋشىلىعى جايىندا جىلى لەبىزدەرىن ءبىلدىردى.
– مەن سەرىكتى ءبىراز جىلداردان بەرى بىلەمىن. ونەرىنە ءتانتى ازاماتتىڭ ءبىرىمىن دەسەم بولادى. ول ءان ايتىپ قانا قويماي, زەرتتەۋشىلىكپەن دە زەردەلى اينالىسىپ ءجۇر. ساكەن اعامىزدىڭ مۋزىكالىق مۇراسى تۋرالى تولىمدى ەڭبەك جازدى. بالۋان شولاق جايىنداعى كىتابىن دا قىزىعىپ وقىدىم. سەرىك – سان قىرلى دارىن ەكەندىگىن مويىنداتقان ازامات, – دەدى ءبىلىم بەرۋ ءىسىنىڭ ۇزدىگى وسپان سۇلەيمەنوۆ.
