ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە وفلاين جانە ونلاين فورماتتا قازاق سپورت جۋرناليستيكاسىنىڭ نەگىزىن قالاعان كورنەكتى قالامگەر سەيداحمەت بەردىقۇلوۆتىڭ 90 جىلدىعىنا ارنالعان «قازىرگى قازاق سپورت جۋرناليستيكاسى جانە مەدياكوممۋنيكاتسيا ماسەلەلەرى» تاقىرىبىندا حالىقارالىق عىلىمي-تاجىريبەلىك كونفەرەنتسيا ءوتتى. جيىن ونىڭ اتىنداعى اۋديتوريانىڭ اشىلۋ سالتاناتىمەن, دەرەكتى فيلمنەن ءۇزىندى كورسەتۋمەن باستالدى.
كونفەرەنتسيانى كىرىسپە سوزبەن اتالمىش جوعارى وقۋ ورنىنىڭ رەكتورى ەرلان سىدىقوۆ اشىپ, قالامگەردىڭ شىعارماشىلىعى مەن ونىڭ قازاق سپورت جۋرناليستيكاسىنىڭ قالىپتاسۋىنا سىڭىرگەن ەڭبەگىنە توقتالدى. گازەت رەداكتورى بولعان كەزدەگى تاقىرىپ قويۋ شەبەرلىگىن, ماتەريالدى جەرىنە جەتكىزىپ, قىزىقتى دا تارتىمدى ەتىپ جازعانىن ايتىپ, سونىسىمەن قالام ۇستاعان كەز كەلگەن ادامعا ۇلگى كورسەتكەنىن اتاپ ءوتتى. وسى جيىننىڭ ءمانى مەن ماڭىزىن كەڭىنەن تولعادى. سەيداحمەت بەردىقۇلوۆ اتىنداعى اۋديتوريانىڭ اشىلۋىنا قولداۋ كورسەتكەن Altyn Qyran Foundation قوعامدىق قورىنا, ونىڭ باسشىسى, بەلگىلى مەتسەنات يسلامبەك سالجانوۆقا العىسىن ايتتى.
ودان كەيىن تۋريزم جانە سپورت ءمينيسترى ەرمەك مارجىقپاەۆتىڭ, قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆتىڭ قۇتتىقتاۋى وقىلدى. بەردىقۇلوۆتىڭ بەشپەتىنەن شىققان قازاقستان رەسپۋبليكاسى پرەزيدەنتىنىڭ كەڭەسشىسى, ۇعا اكادەميگى, بەلگىلى قالامگەر باۋىرجان ومارۇلى ەستەلىگىن ايتتى. ول ارداقتى ۇستازىنىڭ 16 جىل «لەنينشىل جاس» گازەتىن باسقارعانىن, وسىناۋ كەزەڭ ىشىندە قازاق جۋرناليستيكاسىندا ەكى مەكتەپ قالىپتاستىرعانىن, العاشقىسى جازۋ شەبەرلىگىنىڭ مەكتەبى بولسا, ەكىنشىسى قازاق سپورت جۋرناليستەرىنىڭ مەكتەبى ەكەنىن اتاپ ءوتتى. ونىڭ وسى ەكىنشى مەكتەبىنەن نەسىپ ءجۇنىسبايۇلى, ءدۇرالى دۇيسەباي, قىدىربەك رىسبەك سىندى شىنايى شاكىرتتەرى شىققانىن, وزگە شاكىرتتەرى ەرەكشە ستيل ىزدەۋدى, توسىن تاقىرىپ قويۋدى, كەيىپكەردى ايالاي ءبىلۋدى, ماقالانى تارتىمدى ەتىپ جازۋدى, ءومىر مەن يۋموردى ۇيلەستىرۋدى ۇيرەنگەنىن ايتتى.
بەردىقۇلوۆ يدەياعا باي ادام بولعان. ونىڭ تۇلا بويى يدەيا ەدى. جازۋشىنىڭ جولجازبالارى مەن وچەركتەرى كەزىندە وقىرمان ىزدەپ ءجۇرىپ وقيتىن دۇنيەلەرگە اينالعان. سول سەبەپتى قازىرگى جۋرناليستەر بەردىقۇلوۆتىڭ ەڭبەكتەرىن جاتا جاستانىپ وقىپ, ودان كوپ نارسە ۇيرەنسە, قالىڭ وقىرماننىڭ ىقىلاسىنا بولەنىپ, ناعىز مايتالمان قالامگەرگە اينالار ەدى
«سەيداحمەت بەردىقۇلوۆ باتىر باس رەداكتور بولدى. ەشكىمنەن ىقپادى. تۋىن جىقپادى. ساربازدارىن اركەز قورعاپ ءجۇردى. ول اسا باتىل, قاجىرلى قايراتكەر بولدى. ءبىر كەزدە الماتى قالاسىنىڭ باسشىسى بولعان, ءبىز بىلەتىن جەردەگى شۋليكو ما, الدە «شىعىسىم باتىس بوپ كەتتى» دەگەندەي, كەيىنگى ۆەرسياداعى سولومەنتسەۆ پە, ماسەلە وندا ەمەس, شىكىرەيگەن شوڭ شەنەۋنىككە ەلدىڭ كوزىنشە «ساۋساعىڭىزدى شوشايتپاڭىز, ءبىزدى قۇرتقان وسى سۇق ساۋساقتار» دەۋ ءۇشىن دە ارىستاننىڭ ايباتى, جولبارىستىڭ جۇرەگى كەرەك شىعار» دەدى باۋىرجان ومارۇلى.
بەلگىلى قالامگەر, عالىم, ۇعا اكادەميگى ءۋاليحان قاليجانۇلى سەيداحمەت بەردىقۇلوۆپەن «جاس الاشتا» بىرگە ىستەگەن كەزىن ەسكە الىپ, ونىڭ قالامگەرلىگى مەن قايراتكەرلىگىنە توقتالدى.
«بەردىقۇلوۆ يدەياعا باي ادام بولعان. ونىڭ تۇلا بويى يدەيا ەدى. جازۋشىنىڭ جولجازبالارى مەن وچەركتەرى كەزىندە وقىرمان ىزدەپ ءجۇرىپ وقيتىن دۇنيەلەرگە اينالعان. سول سەبەپتى قازىرگى جۋرناليستەر بەردىقۇلوۆتىڭ ەڭبەكتەرىن جاتا جاستانىپ وقىپ, ودان كوپ نارسە ۇيرەنسە, قالىڭ وقىرماننىڭ ىقىلاسىنا بولەنىپ, ناعىز مايتالمان قالامگەرگە اينالار ەدى» دەدى اكادەميك.
ونىڭ ءسوزىن جالعاعان مەملەكەت جانە قوعام قايراتكەرى, قالامگەر, عالىم, اباي اتىنداعى مەملەكەتتىك سىيلىقتىڭ لاۋرەاتى ساۋىتبەك ابدراحمانوۆ سەيداحمەت بەردىقۇلوۆتىڭ قالامگەرلىگىمەن قوسا قايراتكەرلىگىن, ونىڭ باسشىلىق قىزمەتىن, رەداكتورلىعىن جان-جاقتى اڭگىمەلەپ بەردى.
سەيداحمەت بەردىقۇلوۆتىڭ شاكىرتى, جازۋشى, جۋرناليست نەسىپ ءجۇنىسبايۇلى ۇستازى قايتالانباس تۇلعا بولعانىن, ونى ەلىمىزدەگى ءنومىر ءبىرىنشى جۋرناليست سانايتىنىن, بەردىقۇلوۆتىڭ ادامي بولمىسىن, جۋرناليستەرگە جاناشىرلىعىن, قامقورلىعىن ايتىپ, ۇستازىمەن بىرگە قىزمەت ەتكەن جىلدارىن, ونىمەن بىرگە وتكىزگەن ۋاقىتىن ەسكە الدى.
«كەشكە ۇيگە كەتىپ, تاڭەرتەڭ جۇمىسقا كەلگەندە ءبىر يدەيانى تاۋىپ كەلەدى. بىردەن شاقىرىپ الىپ تاپسىرما بەرەتىن. ول كىسى جۋرناليستيكادا قۇدىرەت ادام بولدى. جازعاندارى قانداي! سول كەزدە «لەنينشىل جاس» گازەتى 300 مىڭ تيراجعا جەتتى. قازاق باسپاسوزىندە ونداي تيراجعا جەتكەن گازەت بولعان جوق. وسىنىڭ ءبارى سەيداحمەت اعانىڭ كەرەمەت ۇيىمداستىرۋشىلىق قاسيەتى ەدى. ول كىسى سپورت ءجۋرناليسى عانا بولدى دەگەندەر قاتەلەسەدى. سپورت جۋرناليستيكاسى ول كىسىنىڭ مىڭ ونەرىنىڭ ءبىرى بولدى. ول كىسىنىڭ جازعاندارى قانداي! «تۇيعىن» پوۆەسى قانداي!» دەدى نەسىپ ءجۇنىسبايۇلى.
تاعى ءبىر شاكىرتى قىدىربەك رىسبەكۇلى سەيداحمەت بەردىقۇلوۆ نەگىزىن قالاعان قازاق سپورت جۋرناليستيكاسىنىڭ بۇگىنگى اياقالىسىنا توقتالدى.
«سەيداعاڭدى قازاق سپورتى اتتى عاجاپ سالانىڭ كوشباسشىسى, رۋحاني كوسەمى دەسەك, ارتىق ايتقاندىق ەمەس. ۇستازىمىز ۇلتىمىزدىڭ اقتاڭگەر ۇلدارى شوقىر بولتەكۇلى, حامزا مۇحامەدجانوۆ, وكتيابر جارىلعاپوۆ, عۇسمان قوسانوۆ, تيمۋر سەگىزباەۆ, ءابدىسالان نۇرماحانوۆ, ولەگ ءتۇسىمحانوۆ, جاقسىلىق ۇشكەمپىروۆ, سەرىك قوناقباەۆ, تاعى باسقا ساڭلاقتار تۋرالى كەرەمەت تارتىمدى, كوركەمدىك قۋاتى كۇشتى, سەزىمگە تولى دۇنيەلەر جازدى» دەي كەلە, ۇستازىنىڭ كەيىپكەرلەرى تۋرالى جازعان ماقالالارىن تالدادى.
فيلولوگيا عىلىمدارىنىڭ دوكتورى سەرىك نەگيموۆ سەيداحمەت بەردىقۇلوۆتىڭ ادەبيەتكە سىڭىرگەن ەڭبەگى تۋرالى ءسوز ساباقتادى. ونىڭ ءسوزىن جالعاعان ادەبيەتتانۋشى عالىم راقىمجان تۇرىسبەك ادەبي شىعارماشىلىق مۇراسىنا توقتالدى. بەلگىلى قالامگەر, Egemen Qazaqstan گازەتى باس رەداكتورىنىڭ ورىنباسارى تالعات باتىرحان سانالى عۇمىرىندا كوپكە ۇلگى بولعان قالامگەر-قايراتكەردىڭ شىعارماشىلىعى مەن باسشىلىق قىرى, ادامي جانە ۇستازدىق بولمىسى تۋرالى ويىن ورتاعا سالدى. كونفەرەنتسياعا ونلاين ارقىلى قوسىلعان پارلامەنت سەناتىنىڭ دەپۋتاتى, شەتەلدەگى قازاق ءتىلدى بۇقارالىق اقپارات قۇرالدارى اسسوتسياتسياسىنىڭ توراعاسى نۇرتورە ءجۇسىپ بەردىقۇلوۆتىڭ قازاق جۋرناليستيكاسىن دامىتۋداعى ولشەۋسىز ەڭبەگى تۋرالى ايتتى.
جيىندا قازىرگى قازاق سپورت جۋرناليستيكاسىنىڭ وزەكتى ماسەلەلەرى ءسوز بولدى. ماسەلەن, بەلگىلى اقىن, فيلولوگيا عىلىمدارىنىڭ دوكتورى وڭايگۇل تۇرجان سپورت جۋرناليستەرىنىڭ تىلىنە توقتالدى. سوڭىندا قارار قابىلداندى. وندا كەلەسى جىلى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە سەيداحمەت بەردىقۇلوۆتىڭ وقۋلارىن وتكىزىپ, جيناق دايىنداۋ, ستۋدەنتتەرگە جازۋشى اتىنداعى ستيپەنديا تاعايىنداۋ كورسەتىلگەن.
