كەشە الماتىداعى ءبىر تانىس اقساقال حابارلاسىپ «توڭىرەگىمىزدەگى جۇرتتىڭ ءبارى «قازاقستاننىڭ قۇرمەتتى ازاماتى», «قازاقستاننىڭ قاھارمانى», «جاڭا قازاقستاننىڭ پاراساتتى تۇلعاسى» دەيسىڭ بە, ءارتۇرلى اتاق الىپ, كەۋدەسىنە مەدال تاعىپ جاتىر. «تۇيە مىنگەن قۇدايعا ءبىر تابان جاقىن» دەيدى, ەلوردادا ءجۇرسىڭ عوي, سول مەدالدان ماعان دا بىرەۋ الىپ بەرسەڭشى, تويعا بارعان شالداردىڭ جانىندا ۇيالماي وتىرايىن» دەگەن ءوتىنىش ءبىلدىردى.
سوڭعى كەزدەرى اۋىلداعى اڭقاۋ اعايىنعا مەدال ساتىپ اقشا تاباتىن قۋلار كوبەيدى. بۇرىن قىزمەت ىستەگەن زەينەتكەرلەردى, جۇرتقا بەت-بەدەلى بار اق ساقال, قارا ساقالدارى, ودان قالسا ارزان اتاققا جانى قۇشتار جاستاردى جاعالايتىن ولار ءارتۇرلى قوعامدىق بىرلەستىك اتىنان ات ۇركەتىن ءتۇرلى اتاق پەن مەدال تاراتىپ, اقشا جاساپ ءجۇر. ال وتىرىك اتاققا ەسى اۋعان اعايىن ول اتاق پەن مەدالدى قانداي ۇيىم بەرىپ جاتقانىمەن شارۋاسى جوق, كەۋدەسىنە جىلتىراعان تەمىر تاققانىنا ءماز بولىپ, الدى سول كوك تيىن قۇنى جوق ماراپاتتى «جۋىپ», توي جاساۋعا دەيىن بارادى. شىن ماراپاتقا لايىق, ابدەن ىرىكتەۋدەن وتكەن ادامدارعا ماراپات قۇزىرلى ورگانداردىڭ بۇيرىق-قاۋلىسىمەن, ءتىپتى مەملەكەت باسشىسىنىڭ جارلىعىمەن بەرىلمەي مە, جوق, الدە مەدال ساتۋدى كاسىپ ەتكەندەر وڭاي قارجىعا كەنەلىپ جۇرە بەرە مە؟! قازىر اۋىلدا دا, قالادا دا كەۋدەسىنە مەدال تاققاندار جانە سونى تاققىسى كەلەتىندەر بارعان سايىن كوبەيىپ كەلەدى.
ارينە, ەلىمىزدىڭ زاڭدارىندا قوعامدىق ۇيىمدار اتىنان ءتۇرلى ماراپات بەرۋگە تىيىم جوق. بىراق «قازاقستاننىڭ قۇرمەتتى ازاماتى», «قازاقستانىڭ قاھارمانى», «قازاقستانعا ەڭبەگى سىڭگەنى ءۇشىن» جانە ءار سالانىڭ ۇزدىگى اتاعىن كىم كورىنگەن بەرىپ, ءيتتىڭ ۇلى بايقوتانعا مەدال تاعا بەرسە, اقوردانىڭ ارناۋلى بۇيرىعىمەن بەرىلەتىن جوعارىداعى شىن اتاقتاردىڭ نە قادىر-قاسيەتى قالادى؟! قوعامدىق ۇيىمدار «قازاقستاننىڭ قۇرمەتتى ازاماتىن», «قاھارمانىن» قالاي, نەنى ولشەم ەتىپ انىقتايدى؟
ماراپات پەن مەدالدى كىم كورىنگەن, كەز كەلگەن ۇيىم بەرە بەرسە, شىنايى ماراپاتقا كولەڭكەسىن ءتۇسىرىپ, بەدەلىن تومەندەتەدى. سوندىقتان مەملەكەت بۇل ماسەلەگە نازار اۋدارعانى دۇرىس. ءبىر اۋىز سوزبەن ايتقاندا, «قازاقستاننىڭ ەڭبەك ەرى», «قازاقستاننىڭ قاھارمانى», «قازاقستاننىڭ قۇرمەتتى ازاماتتى» اتاقتارىن ساتۋعا, قوعامدىق ۇيىمداردىڭ بەرۋىنە زاڭمەن شەكتەۋ قويماسا, ەرتەڭ شىن ماراپاتتى تاعۋدان دا ۇيالاتىن كۇيگە تۇسەمىز.
