قر پرەمەر-ءمينيسترىنىڭ ورىنباسارى ەرالى توعجانوۆ كەشە نۇر-سۇلتان قالاسىنداعى بىرقاتار نىساندى ارالاپ, سانيتارلىق تالاپتاردىڭ ساقتالۋ بارىسىن تەكسەردى, دەپ حابارلادى «ەلوردا ينفو».
ۆيتسە-پرەمەر باستاعان توپ ءبىرىنشى قالا تۇرعىندارى كوپ جينالاتىن «Mega Silk Way» ساۋدا-ويىن-ساۋىق ورتالىعىن ارالاپ شىقتى. ورتالىق ىشىندە جۇرگەن جۇرت بەتپەردەنىڭ ماڭىزدىلىعىن تۇسىنگەنمەن, بەتتۇمشانى جارتىلاي عانا كيگەندەر كەزدەسىپ جاتتى. ەرالى توعجانوۆ بىرنەشە ادامعا ەسكەرتۋ جاسادى.
جۇمىس توبى بارعان ەكىنشى نىسان — «ەتالون» ساۋدا قۇرىلىس بازارى بولدى.
«كارانتيندىك تالاپتار كۇشەيگەن شاقتا بىزدەگى جابىق نىساندار جۇمىسىن تولىعىمەن توقتاتتى. تەك سىرتتاعى ساۋدا بەلگىلى ءبىر ۋاقىتقا دەيىن عانا جۇمىس ىستەپ تۇردى. قازىر جابىق نىساندار اشىلعانمەن, قويىلعان تالاپقا ساي دەمالىس كۇندەرى جۇمىس ىستەمەيدى. كىرەبەرىستەگى كۇزەت قىزمەتى جۇرتتىڭ بەتپەردەمەن كىرۋىن قاداعالاپ, دەنە قىزۋىن تەكسەرىپ تۇرادى» دەدى «ەتالون» بازارى ديرەكتورىنىڭ مىندەتىن اتقارۋشى ومىربەك مەڭلىبەكوۆ.
ۆيتسە-پرەمەر كىرەبەرىستەگى كۇزەتتىڭ قولىنداعى اپپاراتى ازدىق ەتەتىنىن ايتىپ, ونىڭ ورنىنا تەپلوۆيزورلار ورناتۋ كەرەكتىگىن ايرىقشا اتاپ ءوتتى. كەلۋشىلەر كوپ بولعاندىقتان, ولاردىڭ ءبارىن بىردەي باقىلاۋ مۇمكىن ەمەستىگىن ايتقان ەرالى توعجانوۆ ناقتى تاپسىرما بەردى. بۇل جەردە دە ول بىرنەشە ادامنىڭ بەتپەردەسىن بەتتى تولىق جاباتىنداي ەتىپ تاعۋى كەرەكتىگى جونىندە ەسكەرتۋ جاسادى.
بۇل بازاردىڭ ءاربىر بۋتيگىنىڭ كىرەبەرىسىنە بەتپەردەسىز كىرمەۋى جازىلىپ, اراقاشىقتىق سىزىعى بەلگىلەنگەن. كەلۋشىلەر وسى ءتارتىپ بويىنشا كەزەككە تۇرىپ, ساۋدا جاساۋعا داعدىلانعانى بايقالادى.
قر پرەمەر-ءمينيسترىنىڭ ورىنباسارى باستاعان توپ قالانىڭ ورتالىق بازارىنا اتباسىن تىرەپ, مۇنداعى جاعدايمەن تانىستى. كۇن دۇيسەنبى بولعانمەن, بۇل جەردە ساۋدا قىزىپ تۇر. بىراق دەمالىستاعىداي قالىڭ توپتىڭ شوعىرى جوق. ەرالى توعجانوۆ بۇل بازاردىڭ اكىمشىلىگىنە دە تەپلوۆيزورلار ورناتۋ كەرەكتىگىن تاپسىردى.
«بازار بولعان سوڭ ادام كوپ كەلەدى. ءاربىر ادامنىڭ تەمپەراتۋراسىن باقىلاپ وتىرۋ مۇمكىن ەمەس. سول سەبەپتى كىرەبەرىستەرگە تەپلوۆيزورلار ورناتىپ, جۇرتشىلىقتى ىندەتتەن ساقتاۋىمىز قاجەت. ىندەت جۇقتىرعان ادام ماڭىنان وتكەن كەز كەلگەن جانعا زيانىن تيگىزەدى. ساقتىق شارالارىن بارىنشا ساقتاۋىمىز كەرەك» دەدى ەرالى توعجانوۆ.
