پرەزيدەنت «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى بيىلعى جولداۋىندا جاڭا كەزەڭ جاعدايىندا مەملەكەتتىك اپپاراتتىڭ قالاي وزگەرۋى كەرەكتىگىن ايتقان بولاتىن.
وسىعان بايلانىستى قر پرەزيدەنتى جانىنداعى مەملەكەتتىك باسقارۋ اكادەمياسىنىڭ Kyzmet Talk ساراپشىلاردىڭ پىكىرتالاس الاڭىندا مەملەكەت باسشىسىنىڭ جولداۋى تالقىلاندى.
جيىنعا پارلامەنت ءماجىلىسىنىڭ دەپۋتاتتارى ارمان قوجاحمەتوۆ پەن قانات مۋسين, پرەزيدەنت اكىمشىلىگى مەملەكەتتىك قىزمەت جانە كادر ساياساتى ءبولىمىنىڭ سەكتور مەڭگەرۋشىسى دياس جۇباندىقوۆ پەن ستراتەگيالىق زەرتتەۋ جانە تالداۋ ورتالىعىنىڭ سەكتور مەڭگەرۋشىسى سۆەتلانا گامارنيك, سونىمەن قاتار مەملەكەتتىك ورگانداردىڭ قىزمەتكەرلەرى مەن جەرگىلىكتى بيلىك وكىلدەرى, پروفەسسور-وقىتۋشىلار قۇرامى, زەرتتەۋ ورتالىقتارىنىڭ ماماندارى, اكادەميانىڭ ماگيسترانتتارى مەن دوكتورانتتارى قاتىستى.
پروفەسسور گۇلسارا جۇنىسبەكوۆا مەن دوتسەنت ءاليا داۋەشوۆانىڭ جەتەكشىلىك ەتۋىمەن وتكەن جيىندا ازاماتتىق قوعامدى دامىتۋ مۇددەسىندە مەملەكەتتىك ورگانداردىڭ تيىمدىلىگىن ارتتىرۋ, مەملەكەتتىك ورگانداردىڭ جانە مەملەكەتتىك قىزمەتشىلەردىڭ قىزمەت ەتۋىنىڭ اشىقتىعىن قامتاماسىز ەتۋ تۋرالى ءسوز قوزعالدى.
ساراپشىلار مەملەكەتتىك اپپاراتتىڭ اشىقتىق دارەجەسىن قالاي كوتەرۋگە بولاتىندىعىنا توقتالىپ, سونىڭ ناتيجەسىندە قوعامدىق سەنىم دارەجەسىن كوتەرۋگە قاتىستى ءوز پىكىرلەرىن ايتتى.
«مەملەكەتتىك قىزمەتتىڭ ءيميدجى ماڭىزدى فۋنكتسيونالدىق جانە مارتەبەلىك ماڭىزعا يە. بۇل وعان قوعامنىڭ سەنىم دەڭگەيىنىڭ كورسەتكىشى جانە كومپانيا قىزمەتىنىڭ باسقارۋ تيىمدىلىگىن باعالاۋ كريتەريى بولىپ سانالادى» دەيدى ءماجىلىس دەپۋتاتى ارمان قوجاحمەتوۆ.
