استانا قالاسى «جانۇيا» وتباسى ينستيتۋتىن قولداۋ ورتالىعىندا «جولداۋ ءتۇيىنى – جاڭا قازاقستان» تاقىرىبىندا پىكىر الماسۋ جيىنى ءوتتى.
ءىس-شاراعا قوعام بەلسەندىلەرى مەن كوپبالالى انالار جينالدى. قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى يليا سكۋب جيىنعا قاتىسۋشىلارعا مەملەكەتتىك قىزمەتكەر رەتىندە ءوز پىكىرىن ءبىلدىردى.
– پرەزيدەنتىمىزدىڭ قىركۇيەكتەگى جولداۋىندا كوپ جاڭاشىلدىقتار ايتىلدى. ەلىمىزدەگى ءاربىر مەملەكەتتىك قىزمەتكەر ءۇشىن جولداۋدا ايتىلعان ماسەلەلەر جانە ولاردى شەشۋ ۇلكەن جاۋاپكەرشىلىك دەپ بىلەمىن. بىراق بارلىعىن مەملەكەت جاسايدى دەپ وتىرۋعا دا بولمايدى. جاڭا قازاقستاندى قۇرۋ ءۇشىن بارلىعىمىز بىرگە ءىس-ارەكەت ەتۋىمىز قاجەت, – دەدى باسقارما باسشىسى.
پارلامەنت ءماجىلىسىنىڭ دەپۋتاتى ءاليا ابسەمەتوۆا جولداۋدا ايتىلعان بىرقاتار ماسەلەنى مىسال كەلتىرە وتىرىپ تالقىلادى.
– جىلدا مەملەكەت باسشىسىنىڭ جولداۋىندا الەۋمەتتىك ماسەلەلەرگە كوڭىل بولىنەدى. بيىلعى جولداۋدىڭ ەرەكشەلىگى – ۇلتتىق قوردان ءار بالا ءۇشىن 18 جاسقا دەيىن اقشا جينالادى. مۇنى ەستىگەندە ءوز باسىم كوپبالالى انا رەتىندە قۋاندىم. بۇل – بولاشاق ۇرپاق ءۇشىن قاجەت قاراجات. سونداي-اق ايەلدەر ءۇشىن زەينەتاقى جاسى 61 جاسقا دەيىن تومەندەدى. بۇل 2028 جىلعا دەيىن وزگەرمەيدى. ىسساپارمەن اۋىل-ايماققا بارساق, ايەلدەر قاۋىمى زەينەتتىك جاستىڭ 58 جاس بولۋىن قالايدى. ءبىز بۇل وزگەرىسكە جەتەمىز دەپ ويلايمىن, – دەدى ءاليا ابسەمەتوۆا.
جيىنعا قاتىسقان قارجىگەر ءارى ساراپشى ساپارباي جوباەۆ, پرەزيدەنت جانىنداعى قسزي جەتەكشى عىلىمي قىزمەتكەرى مۇحيت اسانباەۆ جانە قازاقستاننىڭ ەڭبەك سىڭىرگەن قايراتكەرى ارايلىم راحىمقىزى دا جولداۋعا قاتىستى ءوز پىكىرلەرىن ءبىلدىردى.
بايان اسىلبەكوۆا
