ساپتىڭ قاتارى سەتىنەي ءتۇستى

وتكەن سەنبى جانە جەكسەنبى كۇندەرى فۋتبولدان الەم چەمپيوناتىندا 1/8 فينالدىڭ پلەي-وفف ويىندارى وينالىپ, شيرەك فينالعا قادام باسقان العاشقى ءتورت قۇرامانىڭ اتتارى بەلگىلى بولدى. وسى 4 ماتچتا 14 گول سوعىلدى. ولاردا 2 دۋبل تىركەلدى, 1 اۆتوگول سوعىلدى. بۇلاردان بولەك, 3 پەنالتي بەلگىلەنىپ, ولاردىڭ 2-ەۋى قاقپا تورىنان تابىلدى. كەزدەسۋلەردىڭ ادەپكى ەكەۋى نەگىزگى ۋاقىتتا جەڭىمپازدى انىقتاپ بەرسە, قالعان ەكەۋىندە بۇل ءۇشىن الدىمەن وۆەرتايمعا, سودان كەيىن پەنالتيلەر سەرياسىنا جۇگىنۋگە تۋرا كەلدى.

ەڭ باستىسى, وسى جان الىسىپ, جان بەرىسكەن تارتىستى ۇشىراسۋلاردا مۋنديالدىڭ فاۆوريتتەرى سانالىپ كەلگەن ارگەنتينا, پورتۋگاليا جانە يسپانيا ۇلتتىق كوماندالارى جارىس جولىنان شىعىپ قالىپ, مۇنىڭ الدىندا چەمپيوناتپەن قوشتاسقان گەرمانيانىڭ قاتارىنا قوسىلدى. ولارمەن بىرگە, ارينە, سوڭعى ون جىلدان استام ۋاقىتتان بەرى جاھان فۋتبولىنىڭ كوگىندەگى ەڭ جارىق تا جارقىن ەكى جۇلدىز بولىپ قاتار جانىپ كەلگەن كريشتيانۋ رونالدۋ مەن ليونەل مەسسي دە كەتتى. دەمەك, بۇل الاماننىڭ ۇزدىك اتاناتىن فۋتبولشىلارىن ءبىز ەندى جارىس جولىن ودان ءارى جالعاستىراتىن قۇرامالاردىڭ قۇرامىنان ىزدەۋىمىز كەرەك. سوعان قاراماستان, جانكۇيەر قاۋىم اتالعان ەكى سا­يىپقىرانعا وسى كەزگە دەيىنگى عالامات ويىندارى ءۇشىن العىستارىن ايتىپ, قوشەمەتپەن شىعارىپ سالدى.
ءسويتىپ, 30 ماۋسىمنىڭ كەشىندە باستالىپ, شىلدەنىڭ 2-سىنە قاراعان ءتۇنى اياقتالعان 4 ويىننىڭ ناتيجەسىندە قارسىلاستارىن تارتىس ۇستىندە تىزە بۇكتىرگەن نەمەسە ولاردان باعى باسىم شىققان فرانتسيا, ۋرۋگۆاي, رەسەي جانە حورۆاتيا قۇرامالارى 1/4 فينالعا شىقتى. ولار كەلەسى كەزەڭدە وسى تۇرعان رەتتىك ورىندارى بويىنشا ءبىر-بىرلەرىمەن جۇپ قۇرادى.
بۇگىن تۇندە پلەي-وفف كەزەڭىنىڭ سوڭعى ويىندارى وينالىپ, شيرەك فينالدى تۇزەتىن 8 كوماندا تولىق انىقتالادى.
ەندى بولعان ويىندارعا قاتىستى قىسقاشا شولۋ جاساپ وتەيىك.

فرانتسيا – ارگەنتينا 4:3. قازاندا وينالعان ماتچتا ءبىرىنشى بولىپ فرانتسۋزدار ەسەپ اشتى. گولدى انتۋان گريزمانن 13-مينۋتتا پەنالتيدەن ءتۇسىردى. بىراق بۇل ارگەنتينالىقتاردىڭ سالىن سۋعا كەتىرە قويعان جوق. ويىندى جوعارى دەڭگەيدە وتكىزگەن ولار تايمنىڭ سوڭىنا قاراي انحەل دي ماريانىڭ كۇش سالۋىمەن ەسەپتى تەڭەستىردى. ال ەكىنشى تايمنىڭ باس جاعىندا ءتىپتى العا دا شىقتى. بۇل جولى شابۋىلعا تىلدان كەلىپ قوسىلعان قورعاۋشى گابريەل مەركادو مەرگەندىگىمەن كوزگە ءتۇستى.

الايدا ارگەنتينا فۋتبولشىلارى بۇدان كەيىن ءوز قاقپالارىنا قاراي داۋىلداتا لەكىگەن قاۋىرت شابۋىلدارعا توتەپ بەرە الماي قالدى. سول داۋىلدىڭ وتىندە فرانتسۋز قۇراماسىنىڭ 19 جاسار تۇيعىنى كيليان مباپپە ءجۇردى. ويىن بىتكەننەن كەيىن ونى «فۋتبول كورولى» پەلەنىڭ ءوزى قۇتتىقتاپ, 1958 جىلى 17 جاسىندا الەم چەمپيوناتىندا دۋبل جاساعان ءوز جەتىستىگىن قايتالاعانىن اتاپ ءوتتى. دەگەنمەن جاڭا جاس تالانتتىڭ جارق ەتە تۇسۋىنە دەيىن تابلوداعى ەسەپتى قورعاۋشى بەنجامەن پاۆار تەڭەستىرىپ بەرىپ ەدى. سودان كەيىن كيليان ەكى گول سالىپ, ءوز كومانداسىنىڭ باسىمدىعىن نىعىز­داي ءتۇستى.
بۇعان دەيىن دە جاقسى ويىنىمەن كورىنىپ جۇرگەن مباپپەگە ارگەنتينالىقتار كەدەرگى كەلتىرىپ-اق باقتى. ونى الىپ تا شىقتى, شالىپ تا جىقتى, بىراق قۇيىنپەرەن جاس پەرىنى ءبارىبىر تۇساۋلاي المادى. مىناداي نايزاعايدىڭ جانىندا مەسسيدىڭ ءوزى كۇڭگىرت تارتىپ, قاتارداعى كوپ ويىنشىنىڭ ءبىرى سياقتانىپ قالدى. ويىندارىندا ولقىلىق كوپ كەزدەسكەن ارگەنتينا قۇراماسى نەگىزگى ۋاقىتقا قوسىلعان 3-مينۋتتا عانا تاعى ءبىر دوپتىڭ قارىمتاسىن قايتارا الدى. سونىمەن, بۇل ويىنداعى ينتريگا دا اياقتالدى.

30 ماۋسىم
1/8 فينال
قازان. فرانتسيا – ارگەنتينا 4:3
گولدار: انتۋان گريزمانن (13, پەنالتي), بەنجامەن پاۆار (57), كيليان مباپپە (64, 68) – انحەل دي ماريا (41), گابريەل مەركادو (48), سەرحيو اگۋەرو (90+3)

ۋرۋگۆاي – پورتۋگاليا 2:1. سەنبى كۇننىڭ تۇنىندە سوچيدە وينالعان بۇل ەكىنشى ماتچ تا بىرىنشىسىنە قاتتى ۇقساس بولىپ شىقتى. ەكى جاقتا دا كوماندالاردىڭ تالاسسىز ليدەرلەرى مەسسي مەن رونالدۋ ەمەس, مباپپە مەن كاۆاني ەرلەدى. ءبىرى «البيسەلەستەنى» تالقانداپ بەرسە, ەكىنشىسى «سەلەستەنى» ەكىنشى كەزەڭگە شىعاردى.
راس, وزىمەن دەڭگەيلەس كۇشتى شابۋىلشى لۋيس سۋارەستىڭ كومەگىنسىز ەدينسون كاۆاني «ەۋروپالىق برازيلدەر» قاقپاسىنا بىرىنەن-ءبىرى وتەتىن تاماشا ەكى گولدى سالا الماعان بولار ەدى. ءبىرىنشى جاعدايدا لۋيس ەدينسونعا كەرەمەت پاس شىعارىپ بەردى. بۇدان كەيىن پورتۋگال پەپە ەسەپتى تەڭەستىرىپ ۇلگەردى. سودان سوڭ رودريگو بەنتانكۋردىڭ سولعا قاراي كولبەي جونەلتكەن دوبىن سۋارەس وزىنەن كەيىن تۇرعان كاۆانيگە قاراي وتكىزىپ جىبەردى. ال ەديسون ونى توقتاتپاستان قيالاي ۇرىپ, توردان شىعاردى. وسىلايشا تاعى دا قۋعىنشى رولىندە قالىپ قويعان پيرەنەيلىكتەر تۇيىقتان شىعاراتىن تۇلعا رەتىندە كوماندا كاپيتانى رونالدۋگە ءۇمىت ارتتى. بىراق جان-جاقتان قورشاپ, قىسپاققا الىپ قويعان قارسى جاق ويىنشىلارى ونىڭ ەركىن قيمىلداۋىنا جول بەرمەدى. سول ساتتە فەرناندۋ سانتۋش شاكىرتتەرى اراسىندا ونىڭ ورنىن باسىپ كەتە الاتىن ەشكىم تابىلمادى. ءسويتىپ, ءبىر ويىنشىنىڭ ىڭعا­يىنا باعىنىپ, ىعىنا جىعىلعان قۇراما باسقالاي قاۋقار تانىتا الماي, جەڭىلىسكە ۇشىرادى.

1 شىلدە
سوچي. ۋرۋگۆاي – پورتۋگاليا 2:1
گولدار: ەدينسون كاۆاني (7, 62) – پەپە (55)

يسپانيا – رەسەي 1:1. رەسەي قۇراماسى تۋرنيردە جانكۇيەرلەرىن جەلپىندىرۋدى جالعاستىردى. ول مۇنىڭ الدىندا توپتىق جارىس­تىڭ سوڭعى تۋرىندا ۋرۋگۆايدان 0:3 ەسەبىمەن ۇتىلىپ قالعانى بولماسا, الدىڭعى ەكى كەزدەسۋدە وتە جوعارى دەڭگەيدە وتكىزگەن ەدى. ەندى, مىنە, پلەي-وففتىڭ ءبىرىنشى ماتچىن دا ءوزىنىڭ پايداسىنا شەشە ءبىلدى.
راسى كەرەك, بۇل ويىندا مۋنديالدىڭ باستى فاۆوريتتەرىنىڭ ءبىرى سانالعان يسپانيا قۇراماسى جان-جاقتى باسىم وينادى. پيرەنەي تۇبەگىنىڭ كەلەسى جاساعى ويىننىڭ 74 پايىز ۋاقىتىندا دوپقا ەگەلىك ەتتى. ونىڭ قارسى قاقپاعا ۇرعان دوپتارىنىڭ سانى دا الدەقايدا ارتىق. بىراق سولاردان ءبىر-اق رەت ناتيجە شىعارا ءبىلدى. وندا دا ءوز قاقپاسى الدىندا دوپتى قايتارامىن دەپ جاتىپ, قورعاۋشى سەرگەي يگناشەۆيچ ءوز قاقپاسىنا ءتۇسىرىپ الدى. ال تايم تۇگەسىلۋگە قاراعان شاقتا يسپان جەرار پيكە ءوز ايىپ الاڭىندا دوپتى قولىمەن قاعىپ, پەنالتي تاعايىندالۋىنا سەبەپ بولدى. ون ءبىر مەترلىك سوققىنى ارتەم دزيۋبا ءدال ءتۇسىرىپ, تەپە-تەڭدىكتى قايتا قالپىنا كەلتىردى.
«قىزىل فۋريا» ۇجىمى كەزدەسۋدىڭ سوڭىنا دەيىن تىنباي شابۋىلداي بەردى. بىراق بۇدان وڭ ناتيجە شىعارا العان جوق. الاڭ يەلەرىنىڭ تاس-ءتۇيىن قورعانىسى قايتا قاتەلەسە قويمادى. سوندىقتان ويىن وۆەر-تايمعا اۋىس­تى. باسەكەلەستەر وندا دا ەسەپتى وزگەرتە المادى. اقىرىندا 1/8 فينالداعى ءبىرىنشى پەنالتيلەر سەرياسىنا كەزەك كەلدى. وندا يسپانداردىڭ ەكى دوبىن قايتارعان قاقپاشى يگور اكينفەەۆ كومانداسىن كەلەسى كەزەڭگە سۇيرەپ شىعاردى.

1 شىلدە
ماسكەۋ, «لۋجنيكي». يسپانيا – رەسەي 1:1 (وۆەرتايم 0:0, پەنالتي سەرياسى 3:4)
گولدار: سەرگەي يگناشەۆيچ (12, اۆتوگول) – ارتەم دزيۋبا (41, پەنالتي)

حورۆاتيا – دانيا 1:1. بۇل ويىن دا ءوزىنىڭ الدىنداعىعا ءبىرشاما ۇقساس ستسەناري بويىنشا ءوربىدى. بىراق مۇندا ەكى گول دا كەزدەسۋدىڭ باسىنداعى 4 مينۋتتىڭ ىشىندە سوعىلىپ ءبىتتى. الدىمەن دات قۇراماسىنىڭ ويىنشىسى ماتياس زانكا يورگەنسەن 1-مينۋتتا ەسەپ اشىپ, چەمپيوناتتاعى ەڭ تەز گولدى سوقتى. ارادا 3 مينۋت وتكەندە, حورۆات ماريو ماندجۋكيچ ونىڭ ەسەسىن قايتاردى. بۇدان ارعى ويىن ەكى جاقتىڭ كەزەك-كەزەك شابۋىلداۋى ارقىلى ءوتتى. الايدا ماتچ سوڭىنا قاراي حورۆاتتاردىڭ باسىمدىلىعى ايقىندالا بەردى. ول ءتىپتى وۆەر-تايمدا انىق بايقالدى. سونىڭ بىرىندە يورگەنسەن داربازاعا اشىق كەلىپ قالعان قارسىلاسىن قاعىپ قۇلاتىپ, پەنالتي بەلگىلەنۋىنە سەبەپ بولدى. ايتكەنمەن, ونى ۇرۋدى موينىنا العان حورۆاتتار كوماندا كاپيتانى لۋكا مودريچ تەپكەن دوپ گولكيپەرگە تۋرا بارىپ, قاقپاعا كىرمەي قالدى.

تەكەتىرەس سوڭى اقىرىندا مۇندا دا پەنالتيگە الىپ باردى. بۇل «لوتەرەيا» سىناعىندا باسىندا ەكى جاقتان ەكى فۋتبولشى دوپتارىن قاقپاشىنىڭ وڭاي ولجاسىنا اينالدىرىپ الدى. تەك سوڭىنان يۆان راكيتيچ جاساعان سوققى عانا كەزدەسۋ تاعدىرىن حورۆاتيا پايداسىنا شەشىپ بەردى.

2 شىلدە
نيجني نوۆگورود. حورۆاتيا – دانيا 1:1 (وۆەرتايم 0:0, پەنالتي سەرياسى 3:2)
گولدار: ماريو ماندجۋكيچ (4) – ماتياس زانكا يورگەنسەن (1)