رەجيسسەر ءادىلحان ەرجانوۆتىڭ «سارى مىسىق» كوركەم ءفيلمى 77-ءشى حالىقارالىق ۆەنەتسيا كينوفەستيۆالىنىڭ «كوكجيەكتەر» كونكۋرستىق باعدارلاماسىنا قاتىسادى.
الەمنىڭ ءىرى جانە بەدەلدى فەستيۆالدەرىنىڭ ءبىرى الداعى قىركۇيەكتىڭ 2-ءسى مەن 12-ءسى ارالىعىندا بۇرىنعى فورماتتا وتەدى. «كوكجيەكتەر» باعدارلاماسىنىڭ حالىقارالىق قازىلار القاسىن اتاقتى فرانتسۋز كينوگەرى كلەر دەني باسقارادى.
«سارى مىسىق» كينوتۋىندىسىن Short Brothers (قازاقستان) كومپانياسى, ش.ايمانوۆ اتىنداعى «قازاقفيلم» اق جانە Arizona Productions (فرانتسيا) كينوستۋدياسىنىڭ قاتىسۋىمەن ZERDE FILMS كومپانياسى تۇسىرگەن.
«سارى مىسىق» – رەجيسسەر ءادىلحان ەرجانوۆتىڭ توعىزىنشى تولىقمەتراجدى كوركەم ءفيلمى. ءتۇسىرىلىم جۇمىستارى بىلتىر الماتى وبلىسىندا ءوتتى.
– مەن ءۇشىن كەرمەك كەيىپكەرلەرىمىزدىڭ ىشىندەگى ەڭ مەيىرىمدىسى, ونىڭ قازىرگىدەي كۇردەلى ۋاقىتتا پايدا بولۋىندا دا ءبىر ءمان بار. ارينە, «كوكجيەكتەر» باعدارلاماسىنا قاتىساتىنىمىزعا قۋانىشتىمىن. مەنىڭ ويىمشا, ۆەنەتسيا كينوفەستيۆالىنىڭ بۇرىنعى فورماتتا ءوتۋىنىڭ ءوزى, تۇساۋكەسەرى بولاتىن كەز كەلگەن فيلم ءۇشىن ۇلكەن ساتتىلىك. وسىنداي مۇمكىندىك ءۇشىن فەستيۆال ىرىكتەۋشىلەرىنە جانە شىعارماشىلىق ۇجىمعا العىس ايتامىن, – دەيدى ءادىلحان ەرجانوۆ.
فيلم قازاقستاندىق «بونني مەن كلايدتىڭ» وقيعاسىن باياندايدى. كەرمەك ەسىمدى جاس جىگىت تۇرمەدە جازاسىن وتەپ, قىلمىستىق توپ يەمدەنىپ, ءوزىنىڭ قاتال زاڭدارىن ورناتقان تۋعان قالاسىنا ورالادى. جىگىتتىڭ عاشىعى, ەۆا قىلمىسكەرلەردىڭ ىقپالىنان تەرىس جولعا تۇسكەن, كەرمەك ءوزى دە قىلمىسقا بەلشەسىنەن باتادى. بىراق ول سۇيگەن قىزىمەن بىرگە ەركىندىككە قول جەتكىزىپ, كينوتەاتر سالۋ تۋرالى ارمانىن دا ۇمىتپايدى.
