20 شىلدەدە استانادا «ساياباقتار شەرۋى» اكتسياسى وتكىزىلمەك. وسىعان وراي, شارانى ۇيىمداستىرۋشى ستۋدەنتتىك قۇرىلىس جانە «جاسىل ەل» جاستار ەڭبەك جاساقتارى شتابىنىڭ توراعاسى ادىلبەك بەكتاشەۆتى اڭگىمەگە تارتقان ەدىك.
– اكتسيانىڭ نەگىزگى ماقساتى قانداي؟
– «ساياباقتار شەرۋى» – بۇل ەكولوگيانى قورعاۋ اكتسياسى. ونىڭ تاريحى 1990 جىلدارى اقش-تا باستاۋ العان. ونى 1995 جىلدان رەسەي, ۋكراينا, بەلورۋسسيا, ارمەنيا, قىرعىزستان, وزبەكستان, تاجىكستان جانە باسقا دا مەملەكەتتەردە جۇيەلى تۇردە وتكىزۋ داستۇرگە اينالعان. حالىقارالىق اكتسيا ادامداردى تابيعاتتى ايالاۋعا, ونىڭ قاجەتتىلىگىن جەتە تۇسىنۋگە جانە جۇرتتى وسى باستاماعا ۇيىستىرۋدى كوزدەيدى. بۇل شارا ەلىمىزدە دە جىل سايىن ۇيىمداستىرىلادى. سونىڭ اياسىندا ءتۇرلى كونفەرەنتسيالار, سەنبىلىكتەر, مەكتەپتەردە تاربيە ساعاتتارى دا وتەدى.
– ال, سىزدەر ناقتى قانداي جۇمىس جۇرگىزۋدى جوسپارلاپ وتىرسىزدار؟
– وزدەرىڭىز بىلەتىندەي, ورتالىق ساياباققا كۇردەلى جوندەۋ جۇمىستارى جۇرگىزىلۋدە. سوندىقتان وندا قۇرىلىس ماتەريالدارىنىڭ قالدىقتارى بارشىلىق. سونداي-اق, ەسىل جاعاجايىندا دەمالۋشىلار وتىرعان جەرلەرىن جيناماي, قانشاما قوقىس قالدىرىپ كەتەدى. ەندىگى ءبىزدىڭ ماقساتىمىز – سول ساياباقتى تازارتىپ قانا قويماي, ادامداردى قورشاعان ورتاسىنا قامقور بولۋعا ۇندەۋ. ويتكەنى, ساياباق – قالا تۇرعىندارىنىڭ ورتاق دەمالىس ورنى.
– ول ىسكە كىمدەر جۇمىلدىرىلماق؟
– اكتسياعا جاستار ساياساتى ماسەلەلەرى باسقارماسىنىڭ قولداۋىمەن «جاسىل ەل» ەڭبەك جاساعى جانە ءوز قالاۋى بويىنشا كەلگەن قالا تۇرعىندارى قاتىسادى.
ءمادينا جاقىپ
