5-7 شىلدەدە ەلوردالىق ءتورت ءىرى پاركتە «استانا اسپانى» اتتى مەرەكەلىك شارا ۇيىمداستىرىلادى. فەستيۆالدىڭ نەگىزگى ماقساتى – قالا سىرتىندا دەمالىس اتموسفەراسىن قۇرۋ. مۇندا قاتىسقان استانانىڭ ءار تۇرعىنى كوك اسپان استىندا, تابيعات اياسىندا دەمالعانىن سەزىنەدى دەسەك بولادى.
فەستيۆال قوناقتارى شارا بارىسىندا تالعامىنا ساي ەرمەك تابا الادى. قالالىق پاركتەردى استانانىڭ اسپانى بىرىكتىرەدى. ءار پاركتىڭ ءوز ەرەكشەلىگى بولادى. مىسالى, ستۋدەنتتىك باقتا «مەنىڭ ەستەلىكتەرىمنىڭ بۇلتتارى» رەترو باعدارلاماسى كوپشىلىك نازارىنا ۇسىنىلادى. «جەرۇيىق» پاركىندە ەلوردا تۇرعىندارى مەن قوناقتارى «الەم جۇلدىزدارى» ەتنوباعدارلاماسىمەن تانىسادى, ال ورتالىق مادەنيەت جانە دەمالىس باعىندا جاس استانالىقتارعا ارنالعان «بالالىق شاق كەمپىرقوساعى», عاشىقتار باعىندا ارمانشىل جاندارعا «ماحاببات كۇنشۋاعى» سىندى شارالارى وتكىزىلەدى.
ءار پاركتە كەلۋشىلەرگە تاڭ اتقاننان كەش باتقانشا ويىن-ساۋىق باعدارلاماسى ۇسىنىلادى. دەمالۋشىلارعا قولايلى جاعداي جاساۋ ماقساتىندا قوعامدىق تاماقتانۋ ورىندارى مەن ورازا ۇستايتىندارعا اۋىز اشۋعا ارنالعان ورىندار اشىلادى.
