قازاقستان مۇسىلماندارى ءدىني باسقارماسىنىڭ استانا قالاسىنداعى وكىلدىگى «نۇر استانا» ورتالىق مەشىتى رەسپۋبليكالىق قان ورتالىعىمەن بىرلەسىپ, «وزگەگە ءومىر سىيلا» دونورلىق اكتسياسىن وتكىزدى.
ەلىمىزدە دونورلاردىڭ تاپشىلىعىنان كوپشىلىك ادامدار قيىن جاعدايلارعا تاپ بولۋدا. مۇقتاج جاننىڭ قايعى-مۇڭىنا بەيجاي قارامايتىن مۇسىلمان جاماعاتى «نۇر استانا» مەشىتى جانىنا ارنايى كەلگەن قان ورتالىعى ماماندارىنىڭ مەديتسينالىق كولىگىندە قان تاپسىرۋعا كەزەككە تۇردى.
«وزگەگە ءومىر سىيلا» دونورلىق اكتسياسىن وتكىزۋگە ۇيىتقى بولىپ وتىرعان «نۇر استانا» مەشىتىنىڭ باس يمامى, قمدب-نىڭ استانا قالاسى بويىنشا وكىلى ناۋرىزباي تاعانۇلىنىڭ ايتۋىنشا اتالمىش شارانىڭ باستى ماقساتى – وزىڭە قالاعان جاقسىلىقتى وزگەگە دە تىلەۋ, ۇزىلگەلى تۇرعان تاعدىرلارعا قول جالعاۋ, ادامزاتتىڭ ءبىر-بىرىنە مەيىرىم تانىتۋى, ءبىر سوزبەن ايتقاندا مۇسىلمانشىلىق سيپاتىمىزدان اينىماۋ.
سالاۋاتتى ءومىر سالتىن ۇستانۋدى دا نازاردا ۇستاعان اكتسيا اياسىندا 50-گە جۋىق مەشىت جاماعاتى مەن قالا تۇرعىندارى قان تاپسىرىپ, قايىرى مول ىسكە اتسالىستى.
اتالمىش اكتسيا ءبىر جۇمامەن شەكتەلمەيدى, الداعى جۇما 6 ماۋسىمدا ساعات 9:00-13:00 ارالىعىندا «ازىرەت سۇلتان» مەشىتىندە جالعاسىن تابادى. ال, «س.عىلماني» مەشىتىندە 20 ماۋسىم كۇنى وتكىزۋ جوسپارلانعان.
