ونىڭ اتى – نۇرسۇلتان. قازاقستان تاۋەلسىزدىك الىپ, الەۋمەتتىك-ەكونوميكالىق تۇرمىسىمىز ءتاي-ءتاي باسقان, ەلدىڭ جاعدايى ءتاۋىر ءبىر قالىپقا تۇسە قويماعان ءولىارا مەزگىلدە ومىرگە كەلگەن جاس. بالاڭ شاعىنان ولەڭ مەن اڭگىمە جازىپ, ادەبيەتكە بەيىم وسكەن ونى اقىن اتاسىنىڭ «اۋزىنان تۇسە قالعانداي» دەسەك, ارتىق بولماس. جيىرمادان جاڭا اسقان جىگىتتىڭ سپورتتا دا اۋىز تولتىرىپ ايتاتىن جەتىستىگى بارشىلىق. ءوزى – دجيۋ-دجيتسۋدان الەم چەمپيونى.
نۇرسۇلتانمەن ۇلتتىق اكادەميالىق كىتاپحانادا تانىستىم. ونىمەن اڭگىمەلەسە كەلە, وسىنداي جالىن اتقان جاستاردى تاسادا, ەسكەرۋسىز قالدىرۋعا بولمايتىنىن ءبىلىپ, جازۋعا بەكىندىم.
«اتىراۋ وبلىسى قۇلسارى قالاسىنداعى №1 مەكتەپتىڭ توعىزىنشى سىنىبىن ۇزدىك اياقتاعان سوڭ, استاناداعى ساۋدا جانە ەكونوميكالىق كوللەدجىنىڭ قۇقىقتانۋ بولىمىنە وقۋعا ءتۇستىم. كىشكەنتاي كەزىمنەن سپورتتى ۇناتتىم. تەلەديداردان كورگەن سپورتشىلاردىڭ ەڭبەگىنە قۇمارتتىم» دەگەن جاس جىگىت اكەسى ماراتتىڭ سەبەپشى بولۋىمەن سپورتتاعى جولىن قازاقشا كۇرەستەن باستاعان ەكەن. مەكتەپ تابالدىرىعىندا ءجۇرىپ, وبلىستىق ماحامبەت وقۋلارىندا جۇلدەگەر اتانىپ, كەيىن 2011 جىلى حالىقارالىق «شابىت» فەستيۆالىندە پروزا جانرى بويىنشا ديپلومانت بولعان ونىڭ العاشقى شىعارمالارى «قاۋىرسىن قالام», «كوكجيەگىم – كەلەشەگىم», «تاۋەلسىزدىك تولعاۋى» سىندى جيناقتارعا ەنگەن. ءتىپتى, ونىڭ رەسپۋبليكالىق باسىلىم بەتتەرىندە جارق ەتىپ كورىنگەن ساتتەرى دە بولعان.
نۇرسۇلتاننىڭ اتاسى امانقوس ەرشۋوۆتىڭ ەسىمى رەسپۋبليكا جۇرتشىلىعىنا جاقسى تانىس. ەلگە تانىمال تۇلعالاردىڭ ءبىرى. اسقار تاۋداي اكەنى ۇلگى ەتكەن قىزى مارجان بۇگىنگى جاس اقىنداردىڭ ءبىرى ەمەس, بىرەگەيى. ونەرلى وتباسىدان شىققان نۇرسۇلتاننىڭ دا قاعاز بەن قالامعا قۇمار بولۋى زاڭدىلىق ىسپەتتى.
تاياۋدا ارگەنتينانىڭ پوساداس قالاسىندا دجيۋ-دجيتسۋدان الەم چەمپيوناتى ءوتتى. ۇلتتىق قۇرامانىڭ ساپىندا ونەر كورسەتكەن جەتى سپورتشىمىز تولاعاي تابىستارعا جەتىپ, جاھانعا جەكپە-جەك ونەرىندەگى قازاقتىڭ ورنىن كورسەتىپ قايتتى. اتالمىش سپورتتىڭ ءتورت تۇرىنەن (گوشين دجيتسۋ, سۋبميسسيون, شياي, فۋل كونتاكت) سايىسقا تۇسكەن جىگىتتەرىمىز جيىرما ءبىر مەملەكەتتەن جينالعان 500-دەن اسا سپورتشىنىڭ اراسىنان الاڭ يەلەرىن عانا العا جىبەرىپ, جالپى ەسەپتە ەكىنشى ورىنعا تۇراقتادى. ەنشىمىزدە – 18 التىن, 5 كۇمىس جانە 3 قولا مەدال.
77 كگ سالماق دارەجەسىندە ءۇش رەت شارشى الاڭعا شىققان نۇرسۇلتان ءبىر التىن, ەكى كۇمىس مەدالدى ەنشىلەپ, «الەم چەمپيونى» اتانىپ, التىننان القا تاعىندى. «حالىقارالىق دارەجەدەگى سپورت شەبەرى» اتاعىن قورعادى.
– ءوزىم چەمپيون بولعان سالماقتىڭ اقتىق سىنىنا دەيىن ەكۆادور, كولۋمبيا, ارگەنتينا ەلدەرىنىڭ سپورتشىلارىمەن كەزدەسىپ, بارىنەن باسىم ءتۇستىم. شەشۋشى ساتتە الاڭ يەلەرىنىڭ تاعى ءبىر اتلەتىمەن بەتپە-بەت كەلدىم. جەرگىلىكتى حالىقتىڭ سۇيىكتىسىنە اينالىپ ۇلگەرگەن ۆەرگنانو دجاۆيەر ماعان تەگەۋرىندى قارسىلىق تانىتسا دا, قازاققا ءتان قايسارلىقپەن دەگەنىمە جەتىپ, التىننان القا تاقتىم, – دەيدى نۇرسۇلتان.
ءبىز اڭگىمەلەپ وتىرعان الەم چەمپيونى ارگەنتينادان العان التىننىڭ قۇنى قازاقستان ءۇشىن قىمبات بولسا دا, ءوزى ءۇشىن ەل بىرىنشىلىگىندەگى جەتىستىكتەردەن اسا جوعارى ەمەستىگىن تىلگە تيەك ەتتى. ويتكەنى, جەڭىس وڭاي كەلمەيتىنىن تۇسىنگەنىنەن شىعار. جەڭىلىستەر, ساتسىزدىكتەر, قيىندىقتار دا كەزدەستى. تاجىريبەنىڭ جەتىسپەگەنىنەن دەيدى. قولىنان دا, اياعىنان دا ءتۇرلى جارىستاردا جاراقات الىپ, بىرنەشە اي گيپستە بولعانىندا دا قايراعان وسى جىگەر ەدى. دەنساۋلىعىنا بايلانىستى اكادەميالىق دەمالىس ال دەيدى وقىپ جاتقان جوعارعى وقۋ ورنى. بۇل جاي دا نۇرسۇلتاننىڭ جانىن قينايدى. سۇيىكتى پاندەرىنەن قول ءۇزىپ قالعىسى جوق. ءسويتىپ, قينالىپ ءجۇرىپ كوللەدجدە دە, ينستيتۋتتا دا ساباعىنان قالماعان. ۇزدىكتەر قاتارىنان كورىنگەن. ءوزىن قينالعان ساتتەرىندە دەمەگەن بىرگە وقىعان كۋرستاس دوستارىنىڭ ادامگەرشىلىگىن ۇمىتپايدى. جارىستان جاراقات الىپ, بالداقپەن, گيپسپەن جۇرگەن كەزىندە, دوستارى كەزەك-كەزەك بولاشاق الەم چەمپيونىن ماشينالارىمەن ساباققا اپارىپ, اكەلىپ ءجۇرىپتى.
سول كەزدەردە ءوزى وقيتىن ەۋرازيا گۋمانيتارلىق ينستيتۋتىنىڭ سايتىندا «سەگىز قىرلى ستۋدەنت» اتتى ماقالا جاريالانىپ, وندا ۇستازدار قاۋىمى «نۇرسۇلتان ەرشۋوۆ – بولاشاعىنان ءۇمىت كۇتتىرەتىن وزىق ويلى جاس» دەپ سەنىم بىلدىرەدى.
سونداي-اق, ول وزىنە ءبىلىم-ءتالىم بەرگەن ارداقتى ۇستازدارىن, ەاگي-ءدىڭ رەكتورى امانگەلدى قۇسايىنوۆتى, پروفەسسورلار قايىربەك مۇقاجانوۆتى, المات امانباەۆتى جانە سپورتتاعى باپكەرلەرىن ماقتانىش ەتەتىنى تۋرالى ءسوز اراسىندا ايتا كەتتى. ادس دجيۋ-دجيتسۋ جانە شىن ايكيدو فەدەراتسياسىنىڭ نەگىزىن قالاۋشى سايات ەرجانوۆ پەن «قول سايىسىنىڭ قالالىق فەدەراتسياسى» قوعامدىق بىرلەستىگىنىڭ پرەزيدەنتى ماقسات شابدانبەكوۆ – استانادا دجيۋ-دجيتسۋ, دزيۋدومەن قويان-قولتىق كۇرەس ونەرىنىڭ دامۋىنا زور ۇلەس قوسىپ كەلە جاتقان ازاماتتار, ۇيرەتۋدەن جالىقپايتىن, قاتال تالاپ قويا بىلەتىن جاتتىقتىرۋشىلار. ولاردىڭ الدىن كورگەن شاكىرتتەرى سپورت دودولارىندا جەڭىس تۇعىرىنان كورىنىپ ءجۇر.
-ءبىزدىڭ ۆيتالي ۆالەروۆيچ دەگەن جاتتىقتىرۋشىمىز بولاتىن. زەينەت جاسىنا جەتىپ قالعان بۇل اعايىمىزدىڭ جۇمىسى كۇندە جاتتىعۋعا كەلگەن بالالاردى تىزىمدەپ, جۋرنالعا تىركەپ وتىراتىن. قاشان كورسەڭ دە قولىنان كىتاپ تۇسپەيتىن كىتاپقۇمار ادام. سويلەپ كەتسە, ورىس ادەبيەتىنىڭ بىلگىرى. بۇل مەنى قىزىقتىردى. ءبىر كۇنى ول كىسىدەن: «جەكە كىتاپحاناڭىزدان ماعان وقۋعا كىتاپ بەرەسىز بە؟», – دەپ سۇرادىم. ۆيتالي ۆالەروۆيچ ماعان يساي كالاشنيكوۆتىڭ «جەستوكي ۆەك» دەگەن رومانىن وقۋعا بەردى. بۋريات جازۋشىسىنىڭ شىڭعىس حان تۋرالى رومانىنىڭ ءتىلى جەڭىل, وقيعاسى قىزعىلىقتى ەكەن. سونداي ۇنادى, – دەيدى نۇرسۇلتان. سونداي-اق, ول كۇلە وتىرىپ, دوستارىنىڭ «قازاقفيلمدە» كاستينگ بولىپ جاتىر, بارساڭشى نەمەسە تەلەارنالار كاستينگ جاريالاپتى دەپ حابارلاپ جاتاتىنىن ايتادى. بىراق, ءوزى كينو نەمەسە تەلەارنا جۇلدىزى بولۋعا قىزىقپايدى.
ارگەنتيناداعى چەمپيونات كەزىندە نۇرسۇلتان اعىلشىن ءتىلىن مەڭگەرۋىنىڭ ارقاسىندا ءبىزدىڭ قۇرامانىڭ ءار مۇشەسى مەن شەت ەلدىك تۇلعالار اراسىندا ءتىلماش قىزمەتىن اتقارعان ەكەن. قازاق «بەساسپاپ جىگىت» دەپ وسىندايدا ايتسا كەرەك.
قازىر اعىلشىن ءتىلىن تەرەڭدەتىپ وقىپ ءجۇر. بولاشاقتاعى ارمان-ماقساتى – قۇقىقتانۋ سالاسى بويىنشا ءبىلىمىن جەتىلدىرىپ, جاقسى مامان بولۋ, ەلىنە قىزمەت ەتۋ.
بۇگىنگى «قوي ۇستىنە بوزتورعاي جۇمىرتقالاعان» زاماننىڭ ورناۋىنا سەبەپشى بولعان ەلباسىمىزدىڭ قۇرمەتىنە نۇرسۇلتان ەسىمىن يەمدەنگەن سۇلۋ كەلبەتتى, كەڭ يىقتى جاس جىگىتتىڭ قوڭىر كۇزدە التىن جۇلدەمەن ءيسى قازاقتى قۋانىشقا بولەگەنى ۇمىتىلا قويماس. نۇرسۇلتانمەن از عانا ۋاقىت اڭگىمەلەسكەن سوڭ مەن ونىڭ ءالى دە تالاي اسۋدى باعىندىرۋىنا تىلەۋلەس بولىپ قالا بەردىم. ويتكەنى, ارمانى بيىك ادامنىڭ الار اسۋى دا بيىك دەمەي مە حالقىمىز؟!
نۇريسلام قۇسپانعالي
