جۋىردا مادەنيەت جانە سپورت مينيسترلىگى ءتىل ساياساتى كوميتەتىنىڭ ۇيىتقى بولۋىمەن «باق-تاعى ءسوز مادەنيەتى» دەگەن تاقىرىپتا ونلاين كەزدەسۋ ءوتىپ, وندا انا ءتىلىمىزدىڭ قازىرگى جاي-كۇيى تۋرالى وزەكتى ماسەلەلەر ايتىلدى.
العاش بولىپ ءسوز العان ءتىل ساياساتى كوميتەتىنىڭ ادىلبەك قابا جيىننىڭ مازمۇنىنا توقتالا كەلىپ: «شۇرايلى ءتىلىمىز قازاقى بولمىسىنان اجىراپ, كوز الدىمىزدا قارابايىرلانىپ بارادى. ۇلتتى تامىرىنان ايىرىلىپ قالا ما دەپ الاڭدايمىز» دەي كەلىپ,بۇعان جول بەرىپ وتىرعان ءبىراز سەبەپتى اشىپ كورسەتتى. توراعانىڭ ايتۋى بويىنشا قۇجاتتاردىڭ تۇپنۇسقاسىن ورىس تىلىندە دايىنداۋ ءۇردىسى ءالى جالعاسىپ كەلەدى. شالا-جانسار ءسوز تىركەستەرىنىڭ تىرسەكتەپ اينالىمنان قالمايتىنى سوندىقتان.
سەناتور, بەلگىلى قالامگەر نۇرتورە ءجۇسىپ قازىرگى قازاق قاۋىمىنا انا ءتىلىمىزدىڭ اينالاسىنداعى اۋىزدى قۋ شوپپەن سۇرتكەن «قۇرىدى, ءبىتتى» دەگەن سىڭايداعى بايبالامنان ارىلىپ, ناقتى ىسكە كوشۋ كەرەك دەپ وي ءتۇيدى. بۇل كۇندەرى قازاق ءتىلى ارالاسپايتىن سالا جوق. ال بانكومات تەتىگى الدىندا تۇرىپ, قازاق ءتىلىن تاڭداۋ – اركىمنىڭ ازاماتتىق بورىشى. دەگەنمەن, ءسوز ماعىناسىنا ءمان بەرمەيتىن جاعدايلار كەزدەسەدى. «ال ونىڭ سەبەبى – كىتاپ وقىماۋدا, – دەدى سەناتور. – ءتورت جىل جوعارى وقۋ ورنىندا وقىپ, كىتاپحانانىڭ قاي جاقتا ەكەنىن بىلمەي بارا جاتقان جوعارى وقۋ ورنىنىڭ تۇلەگىن كەزدەستىردىم. وندايلاردان نە كۇتۋگە بولادى؟!».
قر پارلامەنتى سەناتىنىڭ دەپۋتاتى دانا نۇرجىگىت وتاندىق تەلەۆيدەنيە سالاسىنداعى مانەرلەپ سويلەۋدىڭ ەتالونىنا اينالعان جۇلدىزدار شوعىرى شىققان ديكتورلار مەكتەبىنىڭ جويىلۋى قازاق ءتىلىنىڭ اۋەزدىك قاسيەتىنە كەرى اسەر ەتكەنىن ايتتى. «جىعىلعانعا جۇدىرىق», باتىستان ەنگەن ءتۇرلى تۇزى جەڭىل جانرلار ساحنا ءتىلىن السىرەتىپ جىبەردى. قازىر نەعۇرلىم بەيپىل سويلەسە, سوعۇرلىم تەز تانىمال بولادى. رەداكتور-جۋرناليست, الەۋمەتتىك جەلىدە بەلسەندى پىكىر ءبىلدىرىپ جۇرگەن مەدياترەنەر نازگۇل قوجابەك وتاندىق مەديا سالاسىندا جۇرگەن جۋرناليستەر ءۇشىن سوزدەردى دۇرىس قولدانۋ جونىندە نۇسقاۋلىق قاجەت دەگەن ويىن ءبىلدىردى. «ەسىمى بەلگىلى ءتىل سالاسىنىڭ عالىمدارى ءجيى ماقالا جاريالاپ تۇرعانى دۇرىس, ايتپەسە مەكتەپ وقۋلىعىنا دەيىن ەنىپ كەتكەن «تۋىلعان» سياقتى سوزدەردەن اياق الىپ جۇرە الماي قالامىز» دەپ قورىتتى.
بۇل پىكىردى ا. بايتۇرسىنوۆ اتىنداعى ءتىل ءبىلىمى ينستيتۋتىنىڭ باس عىلىمي قىزمەتكەرى, فيلولوگيا عىلىمدارىنىڭ دوكتورى, پروفەسسور نۇركەلدى ءۋالي «تۋعان اكە» دەگەن بار, ونى دا «تۋىلعان اكە» دەيمىز بە دەپ جالعاستىردى. عالىمنىڭ ايتۋىنشا, حالىقتىڭ قۇلاعىنا ءسىڭىستى بولعان, ءسوزدىڭ ءمانىن تولىق ايقىنداپ تۇرعان «ورالماندى» «قانداستارمەن» دەپ اۋىستىرۋ ءوزىن-ءوزى قانشالىقتى اقتادى؟ الدىڭعىسى اتامەكەنىنە كەرى ورالعان ادام ءۇشىن ۋاقىتشا بەرىلگەن مارتەبە, كەيىن تۇراقتى ورنالاسقاننان كەيىن تولقۇجات الىپ, ەلىمىزدىڭ ازاماتىنا اينالادى. ال باسقا جەردە تۇرىپ جاتقان قانداستارىمىز تۋرالى نە دەيمىز؟!
قىسقاسى, ءىس-شارا بارىسىندا ءبىراز قۇندى ۇسىنىس مەن پىكىر ايتىلدى.
