كەشە جوعارى ەۋرازيالىق ەكونوميكالىق كەڭەستىڭ (جەەك) بەينەكونفەرەنتسيا فورماتىنداعى كەزەكتى وتىرىسى ءوتتى. ونلاين سامميتتە ەەو-نى دامىتۋ ماسەلەلەرى تالقىلاندى. وتىرىستا جوعارى ەۋرازيالىق ەكونوميكالىق كەڭەستىڭ قۇرمەتتى توراعاسى نۇرسۇلتان نازارباەۆ وزبەكستان مەن كۋبا رەسپۋبليكالارىنا ەۋرازيا ەكونوميكالىق وداعى جانىنداعى باقىلاۋشى مەملەكەت مارتەبەسىن بەرۋ ارقىلى بىرلەستىكتىڭ گەوگرافيالىق اۋقىمىن كەڭەيتۋدىڭ كەلەسى كەزەڭىنىڭ ماڭىزىن اتاپ ءوتتى.
«ءبىز جۇمىستى ودان ءارى كۇشەيتىپ, وداقتىڭ وزگە ەلدەرمەن جانە ينتەگراتسيالىق بىرلەستىكتەرمەن ءوزارا ىقپالداستىعىن جالعاستىرۋىمىز كەرەك» دەدى ەلباسى.
تۇڭعىش پرەزيدەنت ەۋرازيالىق ەكونوميكالىق وداققا مۇشە ەلدەر اراسىندا COVID-19 پاندەمياسىنا قارسى كۇرەستە ءوزارا گۋمانيتارلىق كومەك الماسۋداعى ىنتىماقتاستىقتىڭ دەڭگەيى جوعارى ەكەنىن اتاپ ءوتتى. «بىرلەسكەن ءىس-شارالار داعدارىس سالدارىن ەڭسەرۋگە جانە وداقتىڭ دامۋىن جوعارى دەڭگەيگە كوتەرۋگە سەپتىگىن تيگىزەدى دەپ سەنەمىن» دەدى جوعارى ەۋرازيالىق ەكونوميكالىق كەڭەستىڭ قۇرمەتتى توراعاسى.
2021 جىلى جوعارى ەۋرازيالىق ەكونوميكالىق كەڭەستىڭ توراعالىعى بەلارۋستەن قازاقستانعا وتەدى. كەڭەستە مەملەكەت باسشىسى قاسىم-جومارت توقاەۆ قازاقستان بۇل ماقساتتا قانداي جۇمىسقا ءمان بەرەتىنىن مالىمدەدى. «ەۋرازيالىق ەكونوميكالىق وداقتىڭ جارعىلىق ورگاندارىنداعى توراعالىق جاڭا جىلدان باستاپ بەلارۋستەن قازاقستانعا وتەدى. كەلەسى جىلى باستى باسىمدىقتى ەكونوميكالىق وداق تۋرالى كەلىسىمدى تولىققاندى ورىنداۋعا, كەدەرگىلەردى جويۋعا, ءوزارا ءتيىمدى كووپەراتسيالىق جانە حالىقارالىق ىنتىماقتاستىقتى دامىتۋعا, كوميسسيانىڭ كادرلىق قۇرامىن قالىپتاستىرۋ پروتسەدۋراسىن جەتىلدىرۋگە, ونىڭ فۋنكتسيونالدىعىن نىعايتۋعا بەرگەلى وتىرمىز. قۇرمەتتى ارىپتەستەر, مەنىڭ رەسمي ۇسىنىستارىم كەلەسى جىلدىڭ قاڭتار ايىندا سىزدەرگە جولدانادى» دەدى قاسىم-جومارت توقاەۆ.
مەملەكەت باسشىسى ەاەو اياسىنداعى ىنتىماقتاستىق ەكونوميكالىق وداققا مۇشە مەملەكەتتەردىڭ باسىمدىققا يە باعىتى بولىپ قالا بەرەتىنىن جەتكىزدى. «الدا ءبىزدى تاعى ءبىر كۇردەلى جىل كۇتىپ تۇر. كۇش بىرىكتىرۋ ارقىلى ەۋرازيالىق ينتەگراتسيانىڭ جاڭا ءارى ساپالى دەڭگەيىنە شىعارمىز دەگەن ۇمىتتەمىن» دەدى پرەزيدەنت قاسىم-جومارت توقاەۆ.
