1978 جىلى جەزقازعان تاۋ-كەن كومبيناتىنىڭ جارتى عاسىرلىق مەرەيتويى اتاپ ءوتىلدى. سول كەزدە اتاقتى كومپوزيتور ءشامشى قالداياقوۆ كەنشىلەر قالاسىنا ارنايى كەلىپ, حالىقپەن كەزدەستى. بۇعان ءوڭىر فوتوشەجىرەسىن جاساعان, مىستى ايماققا بەلگىلى فوتوشەبەر بەكەت تۇبەكوۆتىڭ مىنا سۋرەتتەرى ايعاق.
سول ساپارىندا نەمەسە ودان كەيىن ءشامشى اقىن نۇرسۇلتان الىمقۇلوۆتىڭ ولەڭىنە «جارقىرايدى جەزقازعان» ءانىن جازدى.
قانداي تەڭەۋ ويلاپ تابام,
قول جەتپەستەي قۇز ەدىڭ.
ەكى كوزىڭ ويناقتاعان,
جەزقازعاننىڭ قىزى ەدىڭ.
كەشىرە گور, وتىنەمىن,
ءجۇرسىڭ بە الدە ەلەڭدەپ؟
سىرعا تاعىپ كەتىپ ەدىم,
بيىل كۇزدە كەلەم دەپ.
كوزگە وتتاي باسىلادى,
كەندى بەلەس, ادىرلار.
سارى التىندى ساپىرادى
سوم بىلەكتى باتىرلار.
كەنشىلەردىڭ قالاسىنان
وتتىڭ كوردىم تىزبەگىن.
سول جالىننىڭ اراسىنان
ساۋلەم, سەنى ىزدەدىم.
تاپتىم سەنى, ءان شىعاردىم,
قۇلاشىمدى سەرمەدىم.
جۇرەگىمنىڭ شامشىراعىن
جاعىپ تۇرعان سەن بە ەدىڭ؟!
بۇل انىمە قوسىلاسىڭ,
بار ما بىزدە وزگە ارمان؟
قىزىل گۇلدەي اشىلاسىڭ,
جارقىرايدى جەزقازعان, – دەپ كەلەتىن بۇل ءاننىڭ العاشقى ورىنداۋشىسى بەلگىسىز. انىعى 1992 جىلى جەزقازعاندىق ءانشى, اكتەر دۇيسەن كەنجەەۆ وسى تۋىندىنى ءشامشى اندەرىنىڭ ءبىرىنشى فەستيۆالىندە ورىنداپ, ارنايى جۇلدەنىڭ لاۋرەاتى اتاندى. بۇل ءاندى سول ۋاقىتتا جەزقازعاندا قىزمەت ىستەگەن بەلگىلى كۇيشى, ۇستاز جانعالي ءجۇزباي ىزدەپ تاۋىپ, انشىگە ۇسىنعان ەدى. ءاندى نوتاعا دا ءتۇسىردى.
ءشامشىنىڭ وسىنداي ءانى بار ەكەنىن ستۋدەنت كۇنىمدە كۋرستاسىم, مارقۇم بەرەن بودانوۆتان ەسىتىپ ءبىلدىم. ءماتىنىن دە سودان جازىپ الدىم. ەكەۋىمىز ءاندى شىرقايتىن ادامدى ىزدەپ كورگەن ەدىك, تابا المادىق. وسىدان ون شاقتى جىل بۇرىن بۇل تۋرالى ماقالا جازعانىمنان سوڭ, ءاننىڭ ورىنداۋشىسى تابىلدى. وعان جۋرناليست ابدوللا داستانوۆ دانەكەر بولدى. بىراق ارادا قانشا ۋاقىت وتسە دە, ءان قالىڭ جۇرتقا جەتپەي جاتىر.
بىراق ايتامىن دەگەن انشىگە شىرقاۋعا بولادى, نوتاسى ءشامشىنىڭ ءان جيناقتارىنان تابىلۋى ءتيىس. «جارقىرايدى جەزقازعان» ءانىن قاشان ەستيدى ەكەنبىز؟
P. S. ءشامشىنىڭ جەزقازعان ساپارى تۋرالى دەرەك پەن فوتوسۋرەتتەر بەلگىلى جۋرناليست ءاشىمحان جامپەيىسوۆتىڭ فەيسبۋكتەگى پاراقشاسىنان الىندى.
