ەلورداداعى كوشەلەرگە تۇسەتىن شامادان تىس جۇكتەمەنى ازايتۋ ءۇشىن جولايرىقتار, كوپىرلەر مەن وتكەلدەر سالىنىپ جاتىر. بيىل 150 كوشە جوندەلىپ, كەيبىرەۋى جاڭادان سالىنادى. وسى جىلى جوسپارلانعان جول جۇمىستارىنىڭ 70 پايىزى تۇرعىن الاپتاردا جۇرگىزىلەدى. بۇگىندە جولدار قۇرىلىسى اكىمدىكتىڭ ءجىتى باقىلاۋىندا تۇر.
– Nova City تۇرعىن ءۇي كەشەنىنىڭ اۋماعى, №39 كوشەسىنەن باستاپ №27 كوشەنىڭ ءبىر بولىگىندە جول سالامىز. بۇل كوشە اۋەجاي مەن «تەلمان» تۇرعىن الابىنا اپاراتىن جولدى جالعاۋعا مۇمكىندىك بەرەدى. سونىڭ ەسەبىنەن تۇرعىن الاپ تۇرعىندارىنىڭ قالاعا جول ءجۇرۋ ۋاقىتى ەداۋىر قىسقارادى. سونىمەن قاتار, ماڭگىلىك ەل جانە ۇلى دالا داڭعىلدارىنداعى جۇكتەمەنى ازايتۋعا مۇمكىندىك بەرەدى. وسى جاڭا كوشەدەن ەسىل وزەنى مەن «نۇرا-ەسىل» ارناسى ارقىلى وتەتىن ەكى كوپىر بولادى. قازىر قۇرىلىس جۇمىستارى ءجۇرىپ جاتىر. كوپىرلەر وڭ جانە سول جاعالاۋدى جالعاپ, قالانىڭ ەكى بولىگىن اينالما ەتۋگە مۇمكىندىك بەرەدى, – دەدى قالا اكىمى التاي كولگىنوۆ.
قالا باسشىسى تۇرعىندارمەن كەزدەسۋ, ازاماتتاردى قابىلداۋ جانە ەسەپ بەرۋ كەزدەسۋلەرىندە ەلوردا حالقى جولداردى اسفالتتاۋ ماسەلەسىن كوتەرگەنىن اتاپ ءوتتى.
– ءبىز بارلىق ۇسىنىستاردى جيناپ, كەستە قۇردىق. قىستا بارلىق دايىندىق جۇمىستارىن جۇرگىزدىك. بيىل جوندەلىپ جاتقان جولدار بىرنەشە تالاپ بويىنشا تاڭدالدى. ەڭ الدىمەن بۇرىن اسفالت بولماعان جولداردى تاڭدادىق. مۇنداي جولداردىڭ كوبى تۇرعىن الاپتاردا ورنالاسقان. سونىمەن قاتار, جاڭا اۆتوبۋس باعىتتارى ىسكە قوسىلاتىن كوشەلەر مەن قوزعالىس قارقىنى جوعارى كوشەلەر قامتىلدى.
ساپاسىز جولداردى قابىلدامايمىز. جول ساپاسىز بولعان جاعدايدا مەردىگەرلەر ءوز ەسەبىنەن جولدى قايتا جاسايتىن بولادى, – دەپ اتاپ ءوتتى قالا باسشىسى.
