ۋەفا اياسىنداعى چەمپيوندار ليگاسىنىڭ ءبىرىنشى كەزەڭىندە برەست قالاسىنىڭ «دينامو» كومانداسىمەن ويناعان «استانا» مارتەبەلى تۋرنيردەن شىعىپ قالدى. قازاقستاننىڭ التى دۇركىن چەمپيونى 6:3 ەسەبىمەن ۇتىلدى.
COVID-19 جاعدايىنا بايلانىستى ەرەجەگە سايكەس وتكىزىلگەن جەرەبە بويىنشا استانالىق كلۋب ءبىرىنشى ويىندى سىرت الاڭدا وتكىزەتىن بولعان. سونداي-اق كەلەسى اينالىمعا شىعاتىن كوماندا ءبىر ويىننىڭ ناتيجەسىمەن انىقتالاتىن ەدى.
نەگىزى مامانداردىڭ پىكىرىنشە, بۇل كەزدەسۋدە «استانا» جەڭىسكە جەتۋگە ءتيىس بولاتىن. الايدا «استانالىقتار» برەست الاڭىندا وڭباي ۇتىلدى. ءبىرىنشى تايمنىڭ ورتاسىنا جەتپەي-اق «دينامو» شابۋىلشىلارى ءۇش گول سوعىپ ۇلگەردى. ودان ءارى جاعداي تىپتەن قيىنداپ بەلارۋس فۋتبولشىلارى تاعى ءۇش گول سوقتى. دەگەنمەن ءبىزدىڭ فۋتبولشىلار دا ءۇش مارتە قارسىلاستار قاقپاشىسىن قاپىدا قالدىردى. الايدا بۇل جاي عانا جۇبانىش كورسەتكىشىندەي بولعانى انىق.
سونىمەن, ەۋروپانىڭ ەڭ بەدەلدى كلۋبتىق تۋرنيرىنەن «استانا» شىعىپ قالدى.
«استانا» ەندى قايتادان جالعاسقان قازاقستان چەمپيوناتىنا الاڭسىز قاتىساتىن بولدى. ەلوردالىق كوماندا ۇلتتىق بىرىنشىلىكتەگى كەلەسى ويىنىن 22 تامىزدا كوكشەتاۋدىڭ «وقجەتپەس» كلۋبىنا قارسى وتكىزەدى. ال پرەمەر-ليگانىڭ ءتورتىنشى تۋرىندا مىنانداي ناتيجەلەر تىركەلدى: «قايرات» –«كاسپي» 3:0, «جەتىسۋ» – «ورداباسى» 2:3, «تاراز» – «قىزىلجار» 0:0.
