شەبەرلىك ءدارىسىن وقىدى

استانادا قۇرىلىس قارقىندى ءجۇرىپ, قالا مارتەبەسىنە ساي حالىققا جاعداي جاسالۋدا. ءسانى مەن ساۋلەتى كەلىسكەن عيماراتتاردى تۇرعىزۋدا كوبىنە-كوپ وركەنيەتى دامىعان ەلدەردىڭ تاجىريبەسىنە جۇگىنەمىز. قازىرگى باستى مىندەتتىڭ ءبىرى – 2017 جىلى وتەتىن حالىقارالىق «ەكسپو» كورمەسى قۇرىلىسىن جۇرگىزۋدە الەمنىڭ وزىق تاجىريبەسىن قولدانۋ.
وسىعان وراي, كەشە استانا
قالاسىنىڭ اكىمى يمانعالي تاسماعامبەتوۆ دانيالىق ساۋلەتشى يان گەيلمەن كەزدەستى. ساۋلەتشى كەلۋشىلەرمەن ءوزىنىڭ تاجىريبەسىن ءبولىسىپ, ارنايى شەبەرلىك ءدارىسىن وتكىزدى.
«پروفەسسور مىرزا الەمدىك دەڭ­گەيدەگى ەڭ مىقتى ساراپشىلاردىڭ قاتارىندا سانالادى. سوندىقتان, ەسىمى الەمگە ايگىلى پروفەسسور يان گەيل مىرزانىڭ ءدارىسى جاڭا عاسىردا جاڭا استانانى تۇرعىزىپ جاتقان ءبىز ءۇشىن بەرەرى مول بەرەكەلى باسقوسۋ بولدى دەگەن سەنىمدەمىن» دەدى قالا اكىمى يمانعالي تاسماعامبەتوۆ جيىن بارىسىندا.
ءوز كەزەگىندە ساۋلەتشى يان گەيل: «قالا نەبارى 15 جاستا. ال, مەنىڭ تۋعان قالام كوپەنگاگەننىڭ 1000 جىلدىق تاريحى بار. ءبىز دە مۇنداي بەلەستەردەن وتتىك. قالانى دامىتۋدا ءتۇرلى تاجىريبەلەردى قولداندىق. سودان تۇيگەنىم, قالا سىرتقى كورىنىسىمەن عانا ەمەس, ىشكى ومىرىمەن دە ادەمى بولۋى كەرەك. بۇگىندە كوپتەگەن قالالاردا كولىكتەن اياق الىپ جۇرگىسىز. مەن جۇمىس ىستەگەن قالالاردىڭ ءبىرازى ۆەلوسيپەدكە اۋىسىپ جاتىر. ول ءۇشىن, ارينە, الدىمەن جاعداي جاسالۋ كەرەك. سىزدەر دە وزدەرىڭىزگە قولايلى, دەنساۋلىققا پايدالى جولدى تاڭدايسىزدار دەپ سەنەمىن» دەدى.