استانا مەملەكەتتىك فيلارمونياسى 1997 جىلى قۇرىلعانى بەلگىلى. جىلدان-جىلعا اتاعى داۋىرلەپ, شىعارماشىلىق مۇمكىندىكتەرىمەن ۇلكەن بەلەستەردى باعىندىرىپ كەلە جاتقان ونەر ورداسىنا 15 ۇجىم توپتاسقان. سولاردىڭ ءبىرى – حالىق اسپاپتار وركەسترى تۋرالى بۇگىن ونىڭ كوركەمدىك جەتەكشىسى ءارى باس ديريجەرى, قر ەڭبەك سىڭىرگەن قايراتكەرى ايتقالي جايىموۆ اڭگىمەلەيدى.
– وركەستردىڭ ەڭبەك جولىنا قىسقاشا توقتالساڭىز؟
– وركەستردىڭ ومىرگە كەلۋىنە مۇرىندىق بولعان – كومپوزيتور تولەگەن مۇحامەدجانوۆ. ول قر ەڭبەگى سىڭگەن قايراتكەرى مىرزاعالي ايدابولوۆتى استانالىق وركەستردى باسقارۋعا شاقىرىپ, 1998 جىلدىڭ 7 ساۋىرىندە «كونگرەسس-حولل» سارايىندا وركەستردىڭ العاشقى تۇساۋكەسەر كونتسەرتى ءوتتى. ونەر ۇجىمىنىڭ حالىق الدىندا كەرەمەت ونەر كورسەتۋىنە سول كەزدە قر ەڭبەگى سىڭگەن ارتيسى تۇرار الىپباەۆ, مەملەكەتتىك «دارىن» جاستار سىيلىعىنىڭ يەگەرى انار مۇزداحانوۆا, حالىقارالىق جانە رەسپۋبليكالىق كونكۋرستاردىڭ لاۋرەاتتارى كەنجەگۇل مۇساەۆا, بوتاگوز ءتاشىموۆا, قاجىمۇقان ورازباقوۆ, قۇرمانعازى اتىنداعى ۇلتتىق كونسەرۆاتوريانىڭ جانە قازاق ۇلتتىق ونەر ۋنيۆەرسيتەتىنىڭ دارىندى تۇلەكتەرى بەلسەنە اتسالىستى. سودان بەرگى ون بەس-ون التى جىلدا وركەستر ۇلكەن تابىستارعا جەتتى.
– بۇگىنگى جەتىستىكتەر تۋرالى ايتساڭىز؟
– بۇگىنگى كۇندە ۇجىمنىڭ رەپەرتۋارىندا قازاقتىڭ حالىق كومپوزيتورلارى ىقىلاستىڭ, سۇگىردىڭ, قورقىتتىڭ, قۇرمانعازىنىڭ, داۋلەتكەرەيدىڭ, دينا نۇرپەيىسوۆانىڭ, تۇركەشتىڭ, ءتاتتىمبەتتىڭ, احمەت جۇبانوۆتىڭ, ەۆگەني برۋسيلوۆسكيدىڭ, مۇقان تولەباەۆتىڭ, نۇرعيسا تىلەنديەۆتىڭ, لاتيف ءحاميديدىڭ, كەنجەبەك كۇمىسبەكوۆتىڭ, بالنۇر قىدىربەك جانە تاعى باسقا كومپوزيتورلاردىڭ شىعارمالارى بار.
– ءوزىڭىز وركەسترگە قاشان كەلدىڭىز؟
– مەن 1991-96 جىلدارى قۇرمانعازى اتىنداعى مەملەكەتتىك اكادەميالىق قازاق اسپاپتار وركەسترىنىڭ كوركەمدىك جەتەكشىسى ءارى باس ديريجەرى بولدىم. استاناعا 2008 جىلى قالا اكىمدىگىنىڭ شاقىرۋىمەن كەلدىم.
1978 جىلى قۇرمانعازى اتىنداعى قازاق ۇلتتىق كونسەرۆاتورياسىن ديريجەر, دومبىرا ماماندىقتارى بويىنشا بىتىرگەن سوڭ وسى سالادا ۇزدىكسىز ەڭبەك ەتىپ كەلەمىن.
گاسترولدىك ساپارمەن اقش, جاپونيا, يتاليا, اۆستريا, فرانتسيا, نورۆەگيا, تۇركيا, كۋبا, چەحوسلوۆاكيا, قىتاي ەلدەرىندە بولدىم. 2007 جىلى ۇلىم ارمان ەكەۋمىز «بەيبارىس سۇلتان» وپەراسىن جازدىق (ليبرەتتوسىن جازعان ۇلىقبەك ەسداۋلەت).
سونىمەن قاتار, «ەرەۋىل اتقا ەر سالماي» (حالىق اسپاپتار وركەسترىنە ارنالعان كۇي-پوەما), «شالقىما» (دومبىرا مەن وركەسترگە ارنالعان كونتسەرتتىك كۇي), «تولعاۋ» (قوبىز بەن وركەسترگە ارنالعان پوەما), «بالداۋرەن» (دومبىرا مەن فورتەپيانوعا ارنالعان ءۇش ءبولىمدى كونتسەرتينو), تاعى باسقا دا ونداعان رومانس, اندەرىم, وتىزعا جۋىق كۇي مەن پەسالارىم بار.
الداعى جوسپارعا كەلسەك, 6 جەلتوقسان كۇنى «قورقىت» تەاترلاندىرىلعان مۋزىكالىق قويىلىمى ۇسىنىلىپ, 20 جەلتوقساندا قۇرمانعازى بابامىزدىڭ 190 جىلدىعىنا «كونگرەسس حولدا» ۇلكەن كونتسەرت بەرىلەدى.
