ميلليونەر اتانعان استانامىز ءتورت قۇبىلاسىنان قارىشتاپ, كۇن سايىن قاناتىن جايىپ ءوسىپ كەلەدى. اجارلانىپ, كوركەيە تۇسكەن قالا كەلبەتىمەن كوڭىلىڭ دە لەزدە كوتەرىلىپ, اقىن بولماساڭ دا, ولەڭگە جاقىن جان ەكەنىڭ سەزىلىپ تە قالارى شىندىق.
كوتەرىڭكى كوڭىلمەن «الاتاۋ» ىقشام اۋدانىنداعى تۋىستىڭ ءۇيىن ىزدەپ باردىق. قيقى-جيقى تۇيىقتالعان شولاق كوشەلەر تاۋسىلمايدى. اكادەميك سكريابين دەگەن كوشەمەن كەلىپ گەتەدەگى ۇيگە قاشان تاكسي جەتەدى-اۋ دەپ سول ماڭايدى شارلاساڭ, الدىڭنان مۋزىكانت چايكوۆسكي, پەداگوگ ماكارەنكو, دەكابريست راديششەۆ تاعى-تاعى قايتالانىپ, ەكى شولاق كوشەدە كوسىلىپ تۇر. سۋرەتشى سەروۆ تا ءبىر كوشەنى يەمدەنىپ, رەسپۋبليكا داڭعىلىنا باسىن تىرەگەن. ەڭ وكىنىشتىسى, اكادەميك ليحاچەۆ تە ءبىر بۇيىردەن جالت ەتىپ الدىڭنان شىعىپ, «از ي يا» كىتابىنا ايتقان سىنىم از با, مىنە, مەن دە تاريحتا قالدىم عوي دەپ تابالايتىنداي. اقىرى ىزدەي-ىزدەي تۋىس ءۇيى دە تابىلادى. گەتە دەگەن كوشەمەن قۇلدىراپ وتىرىپ, «كوكتال-2» دەگەن ىقشام اۋدانعا جەتتىك. مۇندا دا تولىپ جاتقان ۇشقىشتار اتىن يەمدەنگەن كوشەلەر كەزدەسىپ, گروموۆتان قۇتىلىپ ەدىك, چكالوۆ قاسقيىپ قارسى الدى. ودان كەيىن قىلىشتارىن جارقىلداتقان سۋۆوروۆ, كاربىشەۆ سياقتى ساردارلار تىپ-تىنىش شولاق كوشەلەردى پانالاپ العان. گەرتسەننەن دەكابريستەردىڭ «كولوكول» جۋرنالىن ىزدەگەندەي, ول كوشەنى دە «تىمىسكىلەي» ءجۇرىپ, قايتار جولىمىزداعى بوگەنباي داڭعىلىنا تۇسكەندە قالانىڭ تىنىسى سەزىلىپ, بيىك-بيىك ۇيلەر مەن قۇرىلىس نىساندارى جىمىڭداعان ەلەكتر جارىعىمەن قۇشاعىن جايا ءتۇسىپ قارسى الدى.
شىنىندا, تۇنگى استانا ءتىپتى تاماشا. قالانىڭ ورتالىعىنا كىرگەن سايىن سيقىرلى الەمگە بويلاي بەرەسىڭ. استانامىزدىڭ بۇگىنگى كەلبەتى كوڭىلگە قۋانىش ۇيالاتادى. ال جوعارىداعى ايتىلعان جايتتاردى ۇساق-ءتۇيەكتەرگە بالاپ, باس قالانىڭ 2014 جىلى جاسالعان كارتا-سحەماسىنا سايكەس كەلەتىن دۇنيەلەر ەكەنىن وقىرماندار بىلگەنى ءجون. «كوش جۇرە تۇزەلەدى» دەيدى عوي, قالامىز 20 جىلدا جاستىق جىرىن سۇلۋلاپ, الداعى ۋاقىتتا ءالى دە شىرايلانا تۇسەدى عوي دەپ, بولاشاققا ۇلكەن ۇمىتپەن قارايمىز.
سۇيەۋباي بايقاديۇلى,
مادەنيەت قايراتكەرى
