بۇكىلالەمدىك بوكس سەرياسىندا, كوپشىلىك كۇتكەندەي, «استانا ارلاندارى» ءوز توبىنان ەكىنشى بولىپ شىقتى. ول دا جامان كورسەتكىش ەمەس. كوكتەمنىڭ العاشقى كۇنى ولار پولشادان كەلگەن قوناقتاردى ءبىر «قۋىرىپ» الدى.
بالۋان شولاق اتىنداعى سپورت سارايىندا وتكەن كەزدەسۋدە ءتورت بىردەي بوكسشىمىز كلۋب ساپىندا العاشقى رەت رينگكە كوتەرىلگەن بولاتىن. پولياكتارعا قارسى الەم چەمپيونى دانيار ەلەۋسىنوۆ پەن الەم چەمپيوناتىنىڭ ەكى دۇركىن كۇمىس جۇلدەگەرى ادىلبەك نيازىمبەتوۆ شىقتى. 60 كەلى سالماقتا الەمدىك دودانىڭ قولا جۇلدەگەرى بەرىك ءابدىراحمانوۆ تا ءوزىنىڭ العاشقى جەكپە-جەگىنە شىعۋى كەرەك بولاتىن. بىراق, كەزدەسۋ الدىندا باپكەرلەردىڭ شەشىمىمەن بەرىكتىڭ ورنىن عاني جايلاۋوۆ باستى. ال, عاني – الەم چەمپيوناتىنىڭ 2011 جىلعى قولا جۇلدەگەرى.
رينگكە العاشقى بولىپ كوتەرىلگەن 52 كەلى سالماقتاعى ءىلياس سۇلەيمەنوۆ پەن گجەگورج كوزلوۆسكي كىم مىقتىنى انىقتادى. ءاپ دەگەننەن-اق جەكپە-جەك تىزگىنىن ءوز قولىندا ۇستاعان ءىلياس سوڭعى راۋندقا دەيىن قارسىلاسىن ساباۋدان شارشامادى. تورەشىلەردەن جوعارى باعا العان وتانداسىمىز وسىلايشا العاشقى جەڭىستى اكەلدى.
كەيىن رينگكە عاني جايلاۋوۆ, دانيار ەلەۋسىنوۆ جانە ادىلبەك نيازىمبەتوۆتەر كەزەك-كەزەگىمەن كوتەرىلدى. 60 كەلى سالماقتاعى عاني جايلاۋوۆ داۆيد پاۆەل ميحەلۋستى ۇتسا, 69 كەلى سالماقتاعى دانيار ەلەۋسىنوۆكە جورا سيمونيان قارسىلىق تانىتا المادى. ال, 81 كەلى سالماقتا ادىلبەك نيازىمبەتوۆ كازيۋج زىتسينسكيدى وڭدىرمادى. كومانداداعى «سۋ جاڭا» بوكسشىلار العاشقى جەكپە-جەكتەرىن وتە جاقسى وتكىزدى دەۋگە بولادى. سونىمەن ءتورت كەزدەسۋدىڭ بارلىعىندا باسىم بولعان «ارلاندار» بەسىنشى كەزدەسۋدىڭ قورىتىندىسىن كۇتپەي-اق ءۇش ۇپايدى قالتاعا باسىپ قويعان ەدى.
بىراق, اسا اۋىر سالماقتاعى ارمەن سيمونيان كوماندالاستارىنىڭ جەڭىستى جولىن جالعاستىرا المادى. «سالت اتتىلار» ساپىنداعى ۋكراينالىق لەگيونەر سەرگەي ۆەرۆەيكومەن قولعاپ تۇيىستىرگەن «ارلانىمىز» جەكپە-جەكتى ۋاقىتىنان ەرتە اياقتاۋعا ءماجبۇر بولدى.
بۇكىلالەمدىك بوكس سەرياسىنىڭ توپتىق كەزەڭى بىرنەشە كوماندا ءۇشىن اياقتالعانىمەن, كەيبىر كەزدەسۋلەر ءالى وتە قويعان جوق. «استانا ارلاندارىنىڭ» شيرەك فينالداعى قارسىلاسى – «Team Germany». العاشقى كەزدەسۋى 28 ناۋرىز كۇنى سىرتتا وتسە, قارىمتاسى 5 ءساۋىر كۇنى ءوز الاڭىمىزدا بولماق.
