شىلدەنىڭ 2-ءسى كۇنگى كەشتەن 4-ىنە قاراعان تۇنگە دەيىنگى ارالىقتا الەم چەمپيوناتىندا 1/8 فينالدىڭ قالعان 4 ويىنى وينالىپ, شيرەك فينالعا شىققان قۇرامالار تولىق انىقتالىپ ءبىتتى. بۇل پلەي-وفف ويىندارى دا وسىنداي تەكەتىرەس ايقاسقا ناعىز توزىمدىلەردىڭ عانا شىعا الاتىنىن كورسەتتى.
وسى كەزدەسۋلەردە 10 گول سوعىلدى, 1 ويىنشى الاڭنان قۋىلىپ, 18 فۋتبولشىعا ەسكەرتۋ بەرىلدى. سول سياقتى 1 پەنالتي بەلگىلەنىپ, ول گولعا اينالدىرىلدى. ماتچتاردىڭ 3-ءى نەگىزگى ۋاقىتتا اياقتالسا, بىرەۋىنىڭ سوڭى پەنالتيلەر سەرياسىنا الىپ باردى.
بۇل كۆارتەتتىڭ ويىندارىندا تەك سەنساتسيا عانا ورىن العان جوق. ولاردا كوپشىلىك ۇتادى دەپ ءۇمىت ارتقان كوماندالار سول دەڭگەيدەن تابىلا ءبىلدى. بىراق بارلىق ۇشىراسۋلاردا دا كەسكىلەسكەن ايقاستار ءجۇرىپ جاتتى. سولاردىڭ اقىرىندا قارسىلاسىنا قاراعاندا دا, تاباندىراق كورىنگەن ۇجىم جەڭىسكە جەتتى. ءبىز مۇنى مەكسيكادان اسا قاتتى باسىم بولماسا دا, ونى سوققىلار دالدىگىمەن الىپ كەتكەن برازيليانىڭ ويىنىنان دا, شۆەيتساريامەن 90 مينۋت بويى تولاسسىز تايتالاسقان شۆەتسيانىڭ ۇردىسىنەن دە, جاپونيادان 0:2 بولىپ ۇتىلىپ تۇرىپ, ەڭ سوڭعى ساتتە تارازى باسىن وزىنە قاراي بۇرىپ جىبەرگەن بەلگيانىڭ تاجىريبەسىنەن دە, اقىر سوڭىندا كولۋمبيانى ءبىرىنشى تايمدا ءتۇتىپ جەيتىندەي كورىنىپ, ويىننىڭ اياعىنا قاراي تىزگىنىن بەرىپ قويعان, ءسويتىپ, ەكسترا-تايمدا ءوز-وزىنە كەلە الماي, ونى پەنالتيلەر سەرياسىنىڭ كومەگىمەن ۇتىپ شىققان انگليانىڭ اۋسەلەسىنەن دە كوردىك.
وسىمەن 1/8 فينالدىق ويىندار دا ءوزىنىڭ مارەسىنە جەتتى. ول الداعى شيرەك فينالدا ۋرۋگۆاي – فرانتسيا, برازيليا – بەلگيا, رەسەي – حورۆاتيا, شۆەتسيا – انگليا قۇرامالارىنىڭ كەزدەسەتىندەرىن انىقتاپ بەردى. بۇلاردىڭ ءبىرىنشىسى – 6 شىلدە, ەكىنشى جانە ءۇشىنشىسى – 7 شىلدە, ال سوڭعىسى 8 شىلدە كۇندەرى وينالادى.
ەندى بولعان ويىندارعا قاتىستى قىسقاشا شولۋ جاساپ وتەيىك.
برازيليا – مەكسيكا 2:0. كەڭ تۇرعىدان الىپ قاراعاندا, بۇل ماتچتا اسا ءبىر قاتتى تارتىس بولا قويعان جوق. مەكسيكالىقتار ويىننىڭ باسىندا تايتالاستان قايتپايتىنداي بولىپ كورىنگەنىمەن, تايم ورتاسى اۋا سول قارقىندارىنان ايىرىلىپ قالدى. شاماسى, تەز گول سوعىپ الۋعا قۇرىلعان جوسپارلارى جۇزەگە اسپاعاسىن بەتتەرى قايتىپ قالعان سياقتى. الايدا بۇدان كەيىن ويىن تىزگىنىن قولعا العان برازيليالىقتار ونى سوڭىنا دەيىن ۋىسىنان شىعارا قويمادى.
ءبىرىنشى تايمدا گولكيپەر گيلەرمو وچاو مەكسيكالىقتاردى بىرنەشە گولدان ساقتاپ قالدى. بىراق ەكىنشى تايمنىڭ باسىندا «پەنتاكامپەوندار» شابۋىلىنا ول دا توتەپ بەرە المادى. گولدى نەيمار سالدى. ول بۇرىشتاما بەرىلگەننەن كەيىن ايىپ الاڭىندا دوپتى وكشەسىمەن ۆيلليانعا جونەلتتى. ول قاقپا الاڭىنا جاقىن كەلىپ, ارعى باعانعا قاراي باعىتتادى. ونى وچاو ۇستاي المادى. وعان ارعى جاعىندا تۇرعان كارلوس سەلسەدو مەن گابي جەزۋس تا جەتپەدى. ەسەسىنە, سودان كەيىنگى اشىق جەرگە كەلىپ قالعان نەيمار دوپتى بوس قاقپاعا اتىپ جىبەردى.
ماتچتىڭ سوڭىنا قاراي سالىنعان ەكىنشى دوپقا دا نەيماردىڭ قاتىسى بولدى. ول قاقپانىڭ الىس باعانىنا قاراي دوپ ۇشىردى. ونى قاعىپ الماقشى بولعان وچاو تەك ساۋساعىنىڭ ۇشىن عانا تيگىزە الدى. سول-اق ەكەن, ودان ارىدا تۇرعان روبەرتو فيرمينو ەكى مەتر جەردەن دوپتى قاقپاعا قاراي باعىتتاي سالدى.
برازيليا – مەكسيكا 2:0
گولدار: نەيمار (51), روبەرتو فيرمينو (88)
بەلگيا – جاپونيا 3:2. ەسەپتى كەزەڭدەگى ەڭ تارتىستى, سونىمەن بىرگە اقىرى قالاي بىتەرى بەلگىسىز كەزدەسۋ وسى بولدى. بىراق ماتچتاعى بەس گولدىڭ ءبارى ەكىنشى تايمدا سوعىلدى. وسى رەتتە كەزدەسۋدى تايم بويىنشا ەكىگە ءبولىپ قاراستىرۋعا بولادى. ونىڭ ءبىرىنشى بولىگىندە بەلگيالىقتار ونشالىقتى تولىق اشىلا قويمادى. وسىدان-اق ولاردىڭ ءبىر بارماقتارى بۇگۋلى ەكەنىن بايقادىق.
جاپوندار بولسا, قارسىلاستارىنىڭ وسى سيرەك شابۋىلدارىنان جانتالاسا قورعانا ءجۇرىپ, قارسى شابۋىلعا شىعۋدى ۇمىت قالدىرعان جوق. كۇنشىعىس ەلى فۋتبولشىلارىنىڭ بۇل جورىقتارى كەيدە ەۋروپالىقتاردى تىعىرىققا تىرەپ تۇردى.
ال ۇزىلىستەن كەيىن ەكى جاق تا اشىق كەتتى. بۇل ويىنداعى قاۋىرتتىقتى ارتتىرىپ, ونى قىزىقتى ەتە ءتۇستى. وزدەرىنىڭ كۇشى باسىم ەكەندەرىنە سەنىمدى بەلگيالىقتار وسى تۇستا ماسەلەنى وڭاي شەشىپ تاستاۋعا تىرىستى. بىراق ازيالىقتار تاراپىنان كەزدەسكەن تەگەۋرىندى قارسىلىق ولاردىڭ بۇل ويلارىن جۇزەگە اسىرتپادى. مۇنىڭ ورنىنا جاپونداردىڭ جىلدام ۇيىمداستىراتىن قارسى شابۋىلدارى قاۋىپتى بولا بەردى. بۇلار تەز ارادا گولعا دا اينالىپ ۇلگەردى. ءسويتىپ, بار-جوعى 4 مينۋتتىڭ ىشىندە ولار ەسەپتى 2:0-گە جەتكىزدى.
بالكي, باسقا كوماندا بولسا, وسىدان كەيىن بىردەن باسىلىپ قالار ما ەدى, بىراق بەلگيالىقتار وسىدان كەيىن قايتا ورشەلەنە تۇسكەندەي اسەر قالدىردى. سوندىقتان ولاردىڭ جاپپاي شابۋىلدارىنىڭ وتكىرلىگى ءسات سايىن بايقالىپ تۇردى. ايتكەنمەن, رومەلۋ لۋكاكۋ باستاعان جىگىتتەردىڭ ەسە قايىرۋى ۇزاپ كەتتى. اقىرىندا ءوز قاقپاسىنا ءبىرىنشى گولدىڭ تۇسۋىنە كىنالى سانالعان يان ۆەرتونگەن ءبىر شابۋىل كەزىندە «پاراشيۋت» ادىسىمەن دوپ جونەلتىپ, ونى جاپوندار تورىنا توپ ەتىپ ءتۇسىردى. بۇدان كەيىن مارۋان فەللاينيدىڭ ەسەپتى تەڭەستىرۋىنە كوپ ۋاقىت كەتكەن جوق.
بەلگيالىقتار وسى قۋاتتى قارقىندى ويىننىڭ سوڭىنا دەيىن توقتاتقان جوق. بۇل ەكى ارادا جاپوندار دا قاراپ قالمادى. الايدا, سوڭعى گولدى جەڭىسكە كوبىرەك ەڭبەك سىڭىرگەن بەلگيالىقتار ءتۇسىردى.
بەلگيا – جاپونيا 3:2
گولدار: يان ۆەرتونگەن (69), مارۋان فەللايني (74), ناسەر شادلي (90+4) – گەنكي حاراگۋتي (48), تاكاسي ينۋي (52)
شۆەتسيا – شۆەيتساريا 1:0. بۇل كەزدەسۋ دە تارتىسسىز بولعان جوق. بىراق ويىننىڭ ساپاسى جاعىنان ورتاشا دەپ باعالاۋعا بولادى. مۇندا دا سوڭعى ساتكە دەيىن كىمنىڭ جەڭىسكە جەتەتىنى بەلگىسىز بولىپ تۇردى. دەگەنمەن, بۇل جولى دا كىم ۇتىسقا كوبىرەك لايىقتى بولسا, سول كەلەسى كەزەڭگە ءوتۋ مۇمكىندىگىنە قول جەتكىزدى.
شۆەتسيا – شۆەيتساريا 1:0
گول: ەميل فورسبەرگ (66)
كولۋمبيا – انگليا 1:1. بۇعان دەيىن اعىلشىندار الەم چەمپيوناتىندا ءۇش رەت ويىننان كەيىنگى پەنالتيگە تۇسكەن ەكەن. بىراق ۇشەۋىندە دە جولى بولماپتى. بۇل جولى ولاردى ساتتىلىك كۇتىپ تۇردى. ال ويىن جايىنا كەلسەك, ونىڭ ءبىرىنشى كەزەڭىندە انگليا قۇراماسى ايتارلىقتاي باسىم بولدى. ولار قارسىلاستار الاڭىنداعى قاربالاس كەزىندە ءتارتىپ بۇزىلعاندىقتان, پەنالتي ارقىلى العا شىقتى. ونى گارري كەين ءتۇسىرىپ, گولدار سانىن 6-عا جەتكىزدى. بىراق ەكىنشى تايمدا كولۋمبيالىقتار ەرىك الىپ كەتتى. سونىڭ ناتيجەسىندە ولار ەسەپتى تەڭەستىرىپ, جەڭىپ تە كەتە جازدادى.
كولۋمبيا – انگليا 1:1 (وۆەر-تايم 0:0, پەنالتي 4:3)
گولدار: ەرري مينا (90+3) – گارري كەين (57, پەنالتي)
