شۆەدتەرگە شەبىن بۇزدىرمادى

بۇلاي دەۋىمىزگە سەبەپ بار. ويتكەنى, بىزگە قاراعاندا سكانديناۆيالىقتار ازۋى التى قارىس كوماندا سانالادى…

وسىلايشا ەۋروپا ليگاسىنىڭ ىرىكتەۋ كەزەڭىنىڭ ءۇشىنشى اينالىمىندا شۆەتسيانىڭ اتىنان ات ۇركەتىن «ايك» كومانداسىن قابىلداعان «استانا» ءوز الاڭىندا 1:1 ەسەبىن ۇستاپ قالدى.

ويىننىڭ 9-مينۋتىندا قوناقتار ساپىنان باۋي گول سوعىپ, جەرگىلىكتى جانكۇيەرلەردىڭ جۇيكەسىنە شي جۇگىرتكەن بولاتىن. الايدا, العاشقى تايم تۇگەسىلەر تۇستا, ياعني 42-مينۋتتا تاڭات نوسەرباەۆ قارسىلاستار قاقپاسىن باسپەن ءدال كوزدەپ, تارازى باسىن تەڭەستىرىپ, ءبارىمىزدى ءبىر جەلپىنتىپ تاستادى. وسىدان كەيىن الما-كەزەك شابۋىلدار ءجيى ۇيىمداستىرىلعانمەن, ناتيجە سول كۇيى ساقتالىپ قالدى. ويىن سوڭىنا قاراي فوكسي كەتەۆواما الاڭ يەلەرىن العا شىعاراتىن تاماشا مۇمكىندىكتىڭ بىرنەشەۋىنەن ايىرىلدى.

قارىمتا ويىن 7 تامىز كۇنى شۆەتسيا استاناسى ستوكگولمدە استانا ۋاقىتىمەن ساعات 23:00-دە وتەدى. ول كۇنى استانالىقتار قالايدا ءبىر گول سوعۋدىڭ قامىنا كىرىسەدى.
سونداي-اق, وسى ليگاداعى ەكىنشى كوماندامىز قاراعاندىلىق «شاحتەر» حورۆاتيانىڭ «حايدۋك» كلۋبىن قابىلداپ, 4:2 ەسەبىمەن جەڭىسكە جەتتى. توپچاگيچ, فينونچەنكو, دجيديچ جانە جانقىلىشباي سوققان ءتورت دوپ الاڭ يەلەرىن كەلەسى كەزەڭگە الىپ شىعۋعا تاماشا مۇمكىندىك بولىپ وتىر. ەندى سىرت الاڭداعى كەزدەسۋ 7 تامىزدا استانا ۋاقىتىمەن 23.00-دە وتەدى دەپ كۇتىلۋدە.

ال چەمپيوندار ليگاسىندا ونەر كورسەتىپ جاتقان «اقتوبە» رۋمىنيالىق «ستياۋانى» قابىلداپ, 2:2 ناتيجەسىنە قول جەتكىزدى. قارسىلاستاردىڭ قارقىنىنا توتەپ بەرە العان قازاقستاندىق فۋتبولشىلار پلەي-وفف كەزەڭىنە ءوتۋ ءۇشىن قارىمتا ويىندا كەم دەگەندە ەكى دوپ سوعۋ مىندەتىن ورىنداۋ كەرەك. دەسەك تە, ۆالەري كوروبكين مەن روبەرت ارزۋمانيان سوققان قوس دوپ 6 تامىز كۇنى رۋمىنيادا وتەتىن ەكىنشى كەزدەسۋگە ءۇمىت سىيلاپ تۇر.

نۇريسلام قۇسپانعالي