قازىر قالادا ءتۇرلى جۇقپالى اۋرۋلاردىڭ كورىنىس بەرۋىنە بايلانىستى استانا قالاسى تۇتىنۋشىلار قۇقىعىن قورعاۋ دەپارتامەنتى سپورت كەشەندەرىندەگى ءجۇزۋ باسسەيندەرىنە تەكسەرۋ جۇرگىزىپ, سۋدىڭ قۇرامى مەن ساپاسىن, قاۋىپسىزدىگىن انىقتاۋ ماقساتىندا سىناما الدى. ەرەجە بويىنشا باسسەيندە بوگدە زاتتار مەن باسقا دا قالدىقتاردى جوياتىن ارنايى قۇرىلعى جۇمىس ىستەۋى ءتيىس. مۇنداعى سۋ سۇزگىدەن وتكىزىلىپ, حيميكاتتارمەن تازارتىلۋى كەرەك. وسىنداي بىرنەشە كەزەڭدىك تەكسەرۋدەن كەيىن عانا باسسەينگە تۇسۋگە رۇقسات ەتىلەدى.
سپورت كەشەندەرىندە ورنالاسقان باسسەيندەردىڭ تازالىعى مەن سۋدىڭ ساپاسىن قاداعالاۋ بارىسىندا تۇتىنۋشىلاردىڭ قۇقىقتارىن قورعاۋ دەپارتامەنتى 28 سىناما العان.
بۇعان قوسا, استانا قالاسى سەس قىزمەتىنىڭ ماماندارى ەنتەروۆيرۋستى ينفەكتسيانىڭ تىركەلۋىنە وراي سۋدىڭ ساپاسى مەن قاۋىپسىزدىگىنە ەلورداداعى جانە رەسپۋبليكا بويىنشا سۋ قويمالارىنداعى زەرتحانالىق تەكسەرۋدى كۇشەيتتى.
«ەنتەروۆيرۋس باسسەيندەردەن تابىلعان جوق. دەگەنمەن, ولار كارىز سۋلارىنان تابىلدى. ون سىنامانىڭ بىرەۋىنەن ۆيرۋس انىقتالدى. بۇل – اتالعان ۆيرۋستىڭ قورشاعان ورتادا بار ەكەندىگىنىڭ دالەلى. سوندىقتان, ءبىز جۇيەلى جۇمىس جۇرگىزۋدەمىز» دەدى قر تۇتىنۋشىلار قۇقىعىن قورعاۋ اگەنتتىگى توراعاسىنىڭ مىندەتىن اتقارۋشى
جانداربەك بەكشين.
