ەلوردا كۇنىنە اركىم وزىنشە دايىندالۋدا. اسىرەسە, قىدىرىپ كەلۋشىلەردىڭ كوپ بولاتىنىن جاقسى بىلەتىن استانالىقتار داستارقان قامىنا الدەن كىرىسكەن. باس شاھاردىڭ تۇرعىندارىنا وڭتۇستىك قازاقستان وبلىسىنىڭ كاسىپكەر-شارۋالارى ساپالى ءارى ارزان باعاداعى ونىمدەرىن ۇسىندى. سەنبى, جەكسەنبى كۇندەرى ورتالىق الاڭدا وتكەن اۋىل شارۋاشىلىعى جارمەڭكەسىندە 200 توننادان استام جەمىس-جيدەك پەن ەت ونىمدەرى ساتىلدى. وڭتۇستىكتىك ونەرپازدار ءان ايتىپ, بي بيلەپ, جارمەڭكە كورىگىن قىزدىردى.
بەرەكەلى ءوڭىردىڭ استانادا وتكىزگەن جارمەڭكەسىندە 12 ساۋدا نۇكتەسى قۇرىلىپ, 24 كاسىپكەر ونىمدەرىن ۇسىندى. ەڭبەكتەرىنىڭ العاشقى جەمىسىن الا كەلگەن ديقاندار ازىق-تۇلىك, كوكونىس پەن جەمىس-جيدەكتى نارىقتاعى باعادان 25 پايىزعا تومەن ساتتى. وڭتۇستىك قازاقستان وبلىسى اكىمىنىڭ ورىنباسارى بەرىك وسپانوۆتىڭ ايتۋىنشا, كەيبىر ونىمدەر نارىقتاعى باعادان 50 پايىزعا دەيىن تومەن پۇلدانعان. «بارلىق كوكونىس تە, جەمىس-جيدەك تە ءوزىمىزدىڭ ايماقتا وسىرىلگەن, شارۋالارىمىزدىڭ ماڭداي تەرىنىڭ جەمىسى. بارلىعى – تابيعي, تازا, ساپالى. ەڭ باستىسى, تاۋارلارىمىزدى ەلوردالىقتارعا وتە ارزان باعامەن ساتۋدامىز. استانا نارىعىنان كەيبىر ونىمدەر 50 پايىزدان دا تومەن ساتىلۋدا. وتكەن جىلى وبلىس اۋماعىنان 2 ملن 200 توننا باقشا ونىمدەرى شىعارىلعان بولاتىن. بيىل دا وسى كورسەتكىشتەن تومەندەتپەيمىز» دەيدى ب.وسپانوۆ.
جارمەڭكەدە قىزاناق, قيار, بولگار بۇرىشى, كارتوپ سىندى قات كوكونىستىڭ ءبارى بار. استانا جۇرتى ەكى كۇن بويى تاڭمەن تالاسا قىرىققاباتتى قاپتاپ, قارا ورىك پەن شيەنى جاشىگىمەن اكەتتى. ءتىپتى, ەلىمىزدىڭ وڭتۇستىگىندە عانا وسىرىلەتىن كۇركەتاۋىق ەتى دە جارمەڭكەدەن تابىلدى.
«ساۋدانىڭ وتىمدىلىگى جاقسى, 20 توننا باقشا ءونىمىن اكەلگەنمىن, 35 كەلى عانا قالدى. حالىق ريزا بولىپ جاتىر. استانا جۇرتى جارمەڭكەنى شىرايلى شىمكەنتتىڭ باس قالاعا جاساعان سىيى دەپ باعالادى» دەيدى سايرام اۋدانىنىڭ تۇرعىنى شۇحرات قۇرماناليەۆ.
العاشقى جەمىسىن الىپ ۇلگەرگەن وڭتۇستىك ءوڭىرى ەلىمىزدىڭ بارلىق ايماعىن باۋ-باقشا ونىمدەرىمەن قامتاماسىز ەتىپ وتىر. شىمكەنتتىڭ كوكونىسى رەسەي, بەلارۋس ەلدەرىمەن قاتار ەۋروپانىڭ بىرنەشە قالاسىنا ەكسپورتتالادى ەكەن. بۇگىندە وبلىستا 800 مىڭ توننا كوكونىس وسىرىلسە, بۇل سونداعى حالىقتىڭ قاجەتتىلىگىنەن 2 ەسەگە ارتىق.
بۇل جارمەڭكەنىڭ جالعاسى بار. شىمكەنتتىك باعباندار «كۇزگە سالىم تاعى كەرۋەن تارتىپ كەلەمىز» دەيدى.
اسحات رايقۇل
