– بۇل جولعى جولداۋدىڭ ءمان-ماڭىزى مەن مازمۇنى ايرىقشا بولدى. بۇرىن «نەگە مەملەكەتتىك تىلدە سويلەمەيدى؟» دەگەن شاعىمدار كوپ بولاتىن. بايقاساڭىز, وسى جولى ءبىزدىڭ پرەزيدەنت ەكى تىلدە بىردەي سويلەدى.
سونداي-اق مەملەكەت باسشىسى قوعام ءومىرىنىڭ بارلىق باعىتىنا توقتالا كەلە, پارلامەنت پەن ۇكىمەتتىڭ قوعام الدىنداعى رولىنە جانە مىندەتىنە قاتىستى جاڭا قاعيداتتىڭ باسشىلىققا الىناتىنىن جەتكىزدى. بۇل – وتە ماڭىزدى ماسەلە.
«پارلامەنتتىڭ تومەنگى پالاتاسى بىرەۋلەرگە جاساندى پرەفەرەنتسيا بەرمەي, ەلدىڭ بۇكىل ەلەكتورالدى لاندشافتىن كورسەتۋى ءتيىس. وسىلايشا ماجىلىستەگى قازاقستان حالقى اسسامبلەياسىنىڭ كۆوتاسىن قىسقارتامىز. مەنىڭشە, بۇل ساياسي دا, زاڭدى دا تۇرعىدان دۇرىس. بۇل كۆوتا سەناتقا بەرىلەدى جانە 9-دان 5 دەپۋتاتقا دەيىن قىسقارادى. سوعان وراي, ماجىلىستەگى دەپۋتاتتىق ورىننىڭ جالپى سانى قىسقارادى» دەدى پرەزيدەنت.
ۇنەمى الەۋمەتتىك ماسەلەلەرمەن اينالىساتىندىقتان, سوڭعى ۋاقىتتا بالالار مەن ايەلدەرگە قاتىستى تۇرمىستىق زورلىق-زومبىلىقتى كۇشەيتۋگە, قاتايتۋعا قاتىستى مەملەكەت باسشىسىنىڭ ناقتى تاپسىرمالار بەرگەنىن ەرەكشە اتاپ وتكىم كەلەدى.
«بۇگىندە ازاماتتار مەن قوعام بەلسەندىلەرى ايەلدەر مەن بالالارعا قاتىستى زورلىق-زومبىلىق ءۇشىن جازانى قاتاڭداتۋ قاجەتتىگىن ءجيى كوتەرىپ ءجۇر. مەن وسىنداي قۇقىق بۇزۋشىلىقتاردى كريميناليزاتسيالاۋدىڭ ورىندىلىعىن انىقتاۋعا نۇسقاۋ بەرگەن بولاتىنمىن. باس پروكۋراتۋراعا وسى ماسەلەنى جان-جاقتى زەردەلەپ, شەشۋدى تاپسىرامىن» دەدى ق.توقاەۆ.
ۇلتتىق قۇرىلتاي اتاۋى قانداي ادەمى! شىنىندا دا, ءوزىمىزدىڭ ءداستۇرىمىزدى دارىپتەيتىن ەجەلدەن كەلە جاتقان كەرەمەت ءسوز, ماعىناسى تەرەڭ, وتە زور, ياعني باسقاشا ايتقاندا, بارلىق قوعامدىق كەڭەستەردىڭ ورتالىق ورگانىن قۇرۋ ماعان ەرەكشە ۇنادى. سەبەبى بۇل ءار ادامنىڭ بويىندا پاتريوتيزم سەزىمىن وياتادى. پرەزيدەنت ايتقانداي, وعان شىنىمەن دە حالىق اراسىندا بەدەلى بار ادامدار كىرۋى كەرەك.
اسىرەسە, وبلىس اتاۋلارىنىڭ قازاقشالانۋى ماعان قاتتى ۇنادى. بۇل انىق, حالىقتىڭ جۇرەگىنەن شىققان شىنايى شەشىم بولدى. ماسەلەن, اباي وبلىسى. قۇلاققا قانشالىقتى جىلى ەستىلەدى دەسەڭىزشى! جالپى مەن سەمەيلىكتەرگە ۇلكەن قۇرمەتپەن قارايمىن. ويتكەنى ۇلى ابايدىڭ جەرىندە وسكەن ادامداردىڭ بولمىسى بولەك. سوندىقتان قاي جاعىنان, ەكونوميكالىق نەمەسە گەوساياسي تۇرعىدان الساق تا, اباي وبلىسىن قۇرۋ وتە دۇرىس بولدى.
ۇلىتاۋ وبلىسىنا كەلسەك, ءوز باسىم جەزقازعان وبلىسىندا تۋىپ-ءوسىپ, سول جەردە مەكتەپ ءبىتىردىم. ءبىر كەزدەرى ەكونوميكالىق تۇرعىدان دۇركىرەپ تۇرعان, تاۋ-كەن ونەركاسىبى ەرەكشە دامىعان ايماق قوي بۇل. جايرەمدەگى تاۋ-كەن كومبيناتى كۇللى رەسپۋبليكاعا تانىمال بولاتىن. ەندى سول وبلىستىڭ اتاۋى قايتا قايتارىلۋى, ارينە, تۇرعىندار ءۇشىن زور مارتەبە دەپ بىلەمىن.
جەتىسۋ وبلىسىنىڭ قاپشاعاي قالاسىنا حالقىنا قالتقىسىز قىزمەت ەتكەن د.قوناەۆتىڭ ەسىمىن بەرۋ دە كوپتىڭ كوكەيىندەگىنى ءدوپ تاپقان ماڭىزدى ءارى دۇرىس شەشىم بولدى.
ۇلكەن ساياسي وزگەرىستەردى باستان كەشىرىپ جاتقان قازىرگىدەي كەزدە مەملەكەت باسشىسىنىڭ شەشىمدەرىن, سونىڭ ىشىندە پرەزيدەنتتىك بيلىككە قاتىستى پىكىردى قولدايمىن. راسىندا دا, جەرگىلىكتى جەرلەردەگى اكىمدەر سياقتى پرەزيدەنت تە پارتيادان بوس بولۋى كەرەك. بۇل تۋرالى بۇرىن كوپ ءسوز بولعانمەن, ونى مۇنداي دەڭگەيدە ايتۋعا ەشكىمنىڭ باتىلى جەتپەگەن ەدى.
سونىمەن بىرگە مەملەكەت باسشىسى ق.توقاەۆ بارلىق ازاماتتار ءۇشىن مۇمكىندىكتەر تەڭدىگىنىڭ مىزعىماس كەپىلى بولۋعا ءتيىس ەكەنىن ەسكەرتە وتىرىپ, پرەزيدەنتتىڭ جاقىن تۋىستارى ءۇشىن كۆازيمەملەكەتتىك سەكتورداعى ساياسي مەملەكەتتىك قىزمەتشىلەر مەن باسشىلار لاۋازىمدارىنا ورنالاسۋعا زاڭنامالىق تىيىم ەنگىزىلەتىنىن اتاپ ءوتتى. ءسوز جوق, بۇل شەشىمدى دە قۇپتايمىن.
قاراقات ابدەن, «قازاق قىزى» قب ايەلدەر مادەني-
ادامگەرشىلىك تاربيە ينستيتۋتىنىڭ قۇرىلتايشىسى:
